Gij fwen gyaeujfaex dwg haemh haeuj ranz sang haenx bouxsai daiq gyoengq hauqnamz cienh gyaeujfaex eu he, de faen baenz song cungj:《Baz Biek Gvan》 caeuq 《Gvan Biek Baz》. Danghnaeuz baz dai, bouxdauh couh eu fwen 《Baz Biek Gvan》; danghnaeuz gvan dai, bouxdauh couh eu fwen 《Gvan Biek Baz》. Lajneix geij hot fwen sij dwg souj daih’it 《Baz Biek Gvan》:

It

It biek ce ranzmbingj,

Biek lwgnding lajeiq;

Doxbiek bae haemhneix,

Langh lwg eiq gag ninz.

Vit ce ranz ce riengh,

Biek beixnuengx aencingz;

It biek ce ranzmbingj,

Biek lwgnding laj eiq;

Langh lwggyax gag ning,

Cuengq sing raemxda leih（lae）;

Doxbiek bae haemhneix,

Langh lwg eiq gag ninz.

Ngeih

Ngeih biek ce beixnuengx,

Nuengx mwngz guenj gyadangz;

Caencik caih mwngz dang,

Gyadangz caih mwngz suenq.

Lwg daej sim youh fanz,

Caih sou nangz coengh suenq;

Ngeih biek ce beixnuengx,

Nuengx mwngz guenj gyadangz.

Dai ce meh ce boh,

Geij cib loh simfanz;

Caencik caih mwngz dang,

Gyadangz caih mwngz suenq.

Sam

Sam biek ce fuengzbangh,

Caih sou ganq lwgnding;

Ngoenz gyo cij ranzmbingj,

Cingzngeih sou gaej lumz.

Gyangngoenz gyo cij vunz,

Gyanghaemh sou cix ganq;

Sam biek ce fuengzbangh,

Caih sou ganq lwgnding.

Lwg naengh daej cix muengz,

Muengh miz meh buenx ninz;

Ngoenz gyo cij ranzmbingj,

Cingzngeih sou gaej lumz.

Seiq

Seiq biek ce goeng yah,

Mbouj miz naj doiq sou;

Cienq ok bak vaq dou,

Bae cien cou mbouj dauq.

Vit baz liuz baz nangz,

Gou nanz doiq ndaej gvaq;

Seiq biek ce goeng yah,

Mbouj miz naj doiq sou.

Lwg noih lwg ndwi rox,

Lohloh goq caih sou;

Cienq ok bak vaq dou,

Bae cien cou mbouj dauq.

Haj

Haj biek ce daiq da,

Ra bae duenx haemhneix;

Yaek fuk cix fukheiq,

Ndwi raen beix sou bae.

Dwk cenj laeuj denz muenx,

Cuengq guenq rouj raemxda;

Haj biek ce daiq da,

Ra bae duenx haemhneix.

Gvih dwk laeuj congz lingz,

Cuengq sing raemxda leih（lae）;

Yaek fuk cix fukheiq,

Ndwi raen beix sou bae.

Roek

Roek biek ce ranzmbingj,

Duenx aencingz haemhneix;

Langh lwgningq lajeiq,

Hoiz veih haeuj yaemgan.

Lwgmbwk langh rox ngeix,

Cix daiq laex boiz cingz;

Roek biek ce ranzmbingj,

Duenx aencingz haemhneix.

Cou dai haeuj ndaw im,

Lingh aeu veih ciep ceih.

Langh lwgningq lajeiq,

Hoiz veih haeuj yaemgan.

Caet

Caet biek ce gya ranz,

Caih ndang sou gag suenq;

Gvan baz haemhneix duenx,

Lingh suenq aeu bouxvunz.

Cam caencik baengzyoux,

Ra aeu boux caezhangz;

Caet biek ce gya ranz,

Caih ndang sou gag suenq.

Yaek caz gwnz caz laj,

Ra aeu boux rox suenq;

Gvan baz haemhneix duenx,

Lingh suenq aeu boux vunz.

Bet

Bet biek ce naxningq,

Veih mingh gou ndwi baenz;

Vit bae naj ce laeng,

Aen sou nanz boiz liux.

Iq batcih gou ceng,

Youz seizseng gou dingh;

Bet biek ce naxningq,

Veih mingh gou ndwi baenz.

Yaek beixbeix nuengxnuengx,

Doxduenx haemhneix baenz;

Vit bae naj ce laeng,

Aen sou nanz boiz liux.

Gouj

Gouj biek ce beixnuengx,

Duenx aencingz ndwi bauq;

Saet cienh buen gya dauq,

Mbouj ndaej dauq yiengzgan.

Biek goujcug loegcin,

Aencingz beixnuengx duenx;

Gouj biek ce beixnuengx,

Duenx aencingz ndwi bauq.

Yienghyiengh dingq caez cuenz,

Bae cien nienz mbouj dauq;

Saet cienh buen gya dauq,

Mbouj ndaej dauq yiengzgan.

Cib

Cib biek daengq sou doh,

Bae ra loh vuengzlingz;

Canghdauh doh congz lingz,

Vuengzlingz hwnj diendangz.

Sam bauq daeuj cingmingz,

Sam sing daeuj yinxloh;

Cib biek daengq sou doh,

Bae ra loh vuengzlingz.

Bae raen coeng raen coj,

Ra sam loh im cung;

Canghdauh doh congz lingz,

Vuengzlingz hwnj diendangz.