7 nyied 12 hauh, aen hoih yaenglwnh yozsuz “ceihleix henzguek caeuq yendaiva yiengh Cungguek” youq Bwzswz Yozyen guh. 120 boux lauxhangz Cungguek Sevei Gohyozyen、Cungguek Yinzminz Dayoz daengj lai aen gauhyau doxcomz giz ndeu, hopheux ceihleix henzguek caeuq yendaiva yiengh Cungguek bae yaenglwnh.

Ngoenzhaenx, gyoengq lauxhangz youq gwnz hoih gangjvah doxyaeng, mboujdan miz daj dangjsij dangjgen、minzcuz lijlun、fapceih hwnqguh doenghgij dieg neix bae lwnh ceihleix henzguek, youh miz damqra gih raeuz couqmaenh gij eiqsik Cunghvaz Minzcuz ranz vunz ndeu、swhcwng gyauyuz yungzhaeuj saedguh ceihleix caeuq daezlienh gij gingniemh ceihleix dieg henzguek Neimungzguj、Sinhgyangh、Gizlinz doenghgij dieg neix dem.

Gyoengq boux lauxhangz caeuqfaenh haihoih nyinhnaeuz, henzguek hoenghvuengh dwg aengiek youqgaenj guekgya hwngvuengh, guekgya hung’ak dwg gij baujcang gaenbonj henzguek andingh. Mwh doinyoengx yendaiva yiengh Cungguek baenaj, ceihleix henzguek aeu gaemmaenh aen yenzcwz “caezcaemh doxgiet buekguh、caezcaemh mwnhoengh hwngfat”, mboujdan cukmaenh fajciengz ancienz guekgya, hix aeu hawj gij doekbyai guhhoengh laujgih doengrad bae, guhbaenz dieg henzguek ciengzgeiz onjdingh caeuq hwngfat ndei saed.

Baez hoih yaenglwnh neix dwg Swcigih Dangjveij Dangjsij Yenz- giusiz、Bwzswz Yozyen、Cungguek Yinzminz Dayoz Cunghgung Dangjsij Dangjgen Yozyen、Vaznanz Swhfan Dayoz Cunghgung Dangjsij Dangjgen Yenzgiuyen doxcaez cawjbanh.

（daj 《Gvangjsih Yizbau》 aeu daeuj genj hoiz Vuj Yungjci）