It、Sawging “Feizdau” Mauz- nanzcuz《Vahdoj Comzcaez Gienj Ndeu》

Mbouj faen gienj, cek ndeu, 61 yieb. Mbouj rox coh bouxsij, Cinghgvanghsi samcib bi (1904 nienz) caubonj. Ceijsa, cangbwn, Sawdoj Mauznanzcuz cauloeg, sawmaeg. Ceksaw sang 21.5 lizmij, gvangq 17.5 lizmij, moix buenq yieb 7 baiz, baiz 14 cih. Haeujsenj buek daihngeih 《Mingzloeg Sawgeq Dijbauj Guek- gya》, bienhauh 06857. Cek caubonj neix youq 2008 nienz daj Hozciz Si Vanzgyangh Mauznanzcuz Swciyen Yananz Yangh Yananz Cunh Mbanjyabuj soucomz, seizneix yo youq Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh.

Bonj saw neix dwg sawging “feizdau” Mauznanzcuz. “Feizdau” dwg vah Mauznanz, eiqsei dwg hoiznyienh, dwg yizsiz caeqbaiq ndawbiengz Mauznanzcuz. Yizsiz “feizdau” gaengawq gij muzdiz hoiznyienh mbouj doengz, faen baenz mbinjhoengz caeuq mbinjhenj song cungj. Mbinjhoengz dwg vunzlai yiengq Swngmujniengzniengz gouzaeu lwg le guh hoiznyienh docih, oklaeng gij goj ndawbiengz ciuhgonq: Lwggyax Cungding ndaej daengz Swng- mujniengzniengz soengq yah seng lwg, doeklaeng lumz aen lumz cingz youh deng saetbae, ginggvaq cingj saenz hoiznyienh, cij ndaej daengx ranz vunz doxcomz. Mbinjhenj dwg aenvih ndaw ranz vunzranz caeuq doihduz miz bingh gouz ndei le guh hoizaen docih. Guh yizsiz hoiznyienh yaek cingj goengsae guh cujciz, gag ranz ndeu ndalaeb guh. 20 sigij 50 nienzdaih gaxgonq mbinjhenj caeuq mbinj- hoengz cungj dwg dandog guh, seizneix song cungj yizsiz doxgyonj guh. Hozdung bingzciengz dwg daih vunz ndeu guh baez ndeu, hix miz song daih、sam daih guh baez ndeu, gek yied nanz, guh yied hung, yungh cienz hix yied lai. Bingzciengz daih vunz ndeu guh heuhguh “boiz nyienh iq”, yaek cingj 6 daengz 10 boux goengsae daeuj guh fapyaz, yungh duz vaiz ndeu、caet duz mou, caeuq bit gaeq daengj 26 duz doihduz daeuj caeq; caj daengz sam daih vunz cij guh heuhguh “boiz nyienh hung”, yaek aeu 72 duz doihduz guh huqcaeq, yungh cienz gig lai. Guh hozdung sam hwnz sam ngoenz, hix mizmbangj guh roek hwnz caet ngoenz. Mauznanzcuz “feizdau” yungzhab Mauznanzcuz vahbak vwnzyoz、heiq、foux、yinhyoz daengj yisuz yenzsu, baenz gij minzsuz hozdung neiyungz fungfouq, ciepcoux gij maqmuengh gyaeundei vunz Mauznanz gouzaeu minzcuz seiqdaih hwng’vuengh、 hwngfat mwnhoengh. 2006 nienz 5 nyied 20 hauh, Mauznanzcuz “feizdau” ginggvaq Gozvuyen baecinj lied haeuj buek daih’it gaep guekgya feih- vuzciz vwnzva yizcanj daibyaujsing hanghmoeg mingzloeg.

Cek saw neix dwg “feizdau” ndawde mbinjhoengz, youq ndaw- biengz Mauznanzcuz ciep cojcoeng soengq fuk、ciep yah ngamq baenzgya daengj yizsiz boiznyienh seiz doeg ciengq.

《Vahdoj Comzcaez Gienj Ndeu》ndawde “Vahdoj” dwg vah Mauz- nanzcuz. Aenvih Mauznanzcuz cujyau comzyouq Vanzgyangh Mauznanzcuz Swciyen Sangnanz、Cunghnanz、Yananz diegbya, vunz yungh mbouj lai, dan youq dieg neix aen minzcuz neix yungh, ndigah heuhguh “Vahdoj”. “Vahdoj Comzcaez Gienj Ndeu” eiqsei dwg aeu vah Mauznanz geiqloeg gij yizsiz hoiznyienh comzcaez gienj ndeu.

Daengx bonj saw baudaengz ciep cojcoeng gyoengq saenz ndaw ranz、ciep yah baenzgya、ciep cojcoeng soengq fuk、yienh laeuj roek guen、sam cuj fanjdauq docih buzvuengz、ciemq hai saenzsiengq daengj cib lai aen ciengciet. Geiqloeg banh yizsiz hoiznyienh mbinjhoengz gij cwngzsi、bouhloh、bwhcaep huqcaeq caeuq swzciengq de daengj. Doenggvaq guh yizsiz、baujyouh ranzcawj caeux di seng lwg、doihduz hwng’vuengh、miz fuk miz caiz.

Doenghbaez yozsuzgai nyinh- naeuz, Mauznanzcuz cij miz gij vah swhgeij mbouj miz cihsaw swhgeij. Sawging 《Vahdoj Comzcaez Gienj Ndeu》cienzbouh dwg aeu Vahdoj Mauznanzcuz causij, caemhcaiq cihsaw cauh cih fuengsik lai yiengh, geiqloeg yaem、eiqsei maqhuz cinjdeng, gag baenz dijhi, dwg vunz Mauznanz vwnzva dajcauh youqgaenj. Bonj saw neix doiq yenzgiu gij lizsij、vwnzva、saenqyiengj、fungsug、vahgangj、cihsaw Mauznanzcuz daengj cungj miz camgauj gyaciz youqgaenj.

Ngeih、Sawging “Feizdau” 《Sawging Guh Yizsiz Mbinjhoengz Hoiznyienh Soengqlaex》

Mbouj faen gienj, cek ndeu, 36 yieb. Mbouj rox coh bouxsij, Cinghgvanghsi ngeihcib bet bi (1902 nienz) caubonj. Ceijsa, cangbwn, bouhfaenh baihnaj caubonj dwg aeu Sawgun cauloeg, cab miz Sawndip Bouxcuengh caeuq Sawdoj Mauz- nanzcuz, bouhfaenh baihlaeng aeu Sawdoj Mauznanzcuz causij, sawmaeg. Ceksaw sang 21 lizmij, gvangq 14.5 lizmij, moix buenq yieb 7 baiz, baiz miz 14 daengz 16 cih. Haeujsenj buek daihngeih《Mingzloeg Sawgeq Dijbauj Guekgya》, bienhauh 06856. Cek caubonj neix 2008 nienz daj Hozciz Si Vanzgyangh Mauznanzcuz Swciyen Yananz Yangh Yananz Cunh Mbanj- yabuj soucomz, seizneix yo youq Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh.

Bonj saw neix dwg sawging “feizdau” Mauznanzcuz, youq ndaw- biengz Mauznanzcuz guh yizsiz hoiznyienh yungh. Youq ndawbiengz Mauznanzcuz, gouz baed simmuengh guhbaenz le yaek guh yizsiz hoiznyienh, gyoengq baedsien soengq fuk bauj bingzan.

“紅筵滿供之本”dwg Sawgun, eiqsei dwg sawging yungh youq guh yizsiz mbinjhoengz hoiznyienh soengqlaex.

Daengx bonj saw faen baenz sam bien, song bien baihnaj cujyau aeu Sawgun causij, cab miz saek di Sawdoj Mauznanzcuz, ciengq gangj baenzlawz cingj Swngmuj、yahsien daengj gyoengq baedsien soengq fuk bauj ranzcawj. Bouhfaenh baihlaeng aeu Sawdoj Mauznanzcuz caeuq Sawndip causij, neiyungz daihgaiq dwg Buenzguj、sam vuengz haj daeq gyoengq baedsien bauj bingzan, ranzcawj guh yizsiz hoiznyienh docih daengj. Ndaw saw cawqgej miz “sien doeg bien baihnaj caiq ciep song bien baihlaeng”, lij sij miz “Danz Yinzmingz cauh moq gaijliengz” gij saw neix.

Bonj saw neix dwg Sawgun、Sawndip Bouxcuengh、Sawdoj Mauznanzcuz doxgap. Bouh saw ndeu yungh sam cungj cihsaw, neix youq ndaw sawgeq Cungguek hix raen mbouj lai. Aenvih Mauznanzcuz ciengzgeiz doxdaeuj caeuq Boux- cuengh、Bouxgun cabyouq, dingzlai vunz rox gangj Vahcuengh caeuq Vahgun, rox yungh Sawgun. Engq youqgaenj dwg, aeu gij cihsaw aen minzcuz wnq daeuj geiqloeg gij saw swhgeij, neix dwg minzcuz vwnzva nyinhdoengz caeuq yungzhab gig sang, hix dwg minzcuz gvanhaeh doxhuz aen sukingj ndeu.(sat)