It

Mbwn ngamq buemxsuemj, mokhaet gyuemluemz, ndaw mbanj gaeq heuh、bit hemq、 hanq swenj, sing’yaem gyonj doxcaeuq, lij cab miz gak ranz cienz ok sing gauhyazgoh heiq conh baenqfwdfwd, sing gucanj cawj byaek caujcaca.

Bohyaenx ranz Veiz caeuxcaeux couh soengq Daegyaenx ok rog bakmbanj henz goengloh caj ci. Lwg ndaej hwnj ci le de couh angqvauvau byaij dauqma.

“Bohyaenx, romh ha!” Bohyaenx baez yawj, dwg Bohlunz ranznden dongx, de riuj doengj swzliuh ndeu okdaeuj bae gueng bit.

Bohyaenx sim angjfwngfwng han naeuz：“W, soengq Daegyaenx gou bae dap ci, de ganj dauqbae hag- dangz……”

Bohlunz baez nyi Bohyaenx naeuz soengq lwg de bae hagdangz, mbouj guhsing lo, vaiqvi coh daemz bit byaij bae. De couh dwg yienghneix, baezbaez nyi vunz dwen gij vahdaez lwgnyez doegsaw, couh mbouj angq lo, baenq ndang cix deuz.

Song daeg lwg Bohlunz cungj mbouj maij doegsaw, daeg daeuz de Daeglunz caeuq Daegyaenx caemh dangq. Aenvih song ranz doxnden, Daegyaenx caeuq Daeglunz seiziq doengzcaez guhcaemz doengzcaez bae hagdangz. Cuhcungh bizyez le, Daegyaenx gauj hwnj ndaw yienh aen cungdenj gauhcungh ndeu, Daeglunz bae doeg gisuz yozyau, songde caiq hix mbouj haengj guhdoih lo.

Daeglunz giyau caengz bizyez couh mbouj doegsaw lo, riengz vunz bae ndaw singz guh dajcaep. Bohyaenx youq ndawhoz miz di yawj de mbouj hwnjda, roxnyinh de yaez gvaq Daegyaenx, ndaengmboeng dwk ngon fwen naeuz：

Lwgnyez doeg ndaej saw,

Gvai ndaw youh gvai rog,

Ngoenzneix deng ngaenz ok,

Daengzcog ndaej baenz ndei.

Lwgnyez mbwq bae hag,

Saek ngoenz gag rox haemz,

Gai rengz bae ra ngaenz,

Mbouj rox baenz vunzfouq.

……

Ngeih

Gyaeujmbanj baihdoeng aen geuq daemq haenx miz goreiz laux ndeu, goekfaex haj roek boux vunz cij got ndaej doh, vunzmbanj heuhguh Geuqfaexreiz. Bouxlaux naeuz, ciuh- gonq vunz yiemz aen geuq neix daemq lai, couh daegdaengq ndaem go faexreiz neix daeuj baex fungsij. Seizhah mbwn hwngq, goreiz laux lumj aen liengj hung cengq youq gwnz geuq, doengxngoenz vunzlai gyaez youq neix yietliengz ndoj raemh、 cejdaihbauq.

Mwh daengngoenz cingq, baihrog ndit yaek remj vunz, haujlai vunz souhong dauqma daengz Geuqfaexreiz naengh yietbaeg gangjgoj. Bohyaenx ma daengz lo, Bohlunz hix ma daengz lo, lij miz haujlai vunz cungj ma daengz lo, gyoengqde gangj ganq reihnaz, gangj ciengx bit gaeq, damzlwnh naeuz oij mbouj ndaej gyaq、haeux mbouj dijcienz, vafeiz nungzyoz cix bengz gvaq maz bae……

Boux Veiz lauxsae duiyouh youq ndaw mbanj ngoenz mbwqmbatmbat haenx raen Geuqfaexreiz cauzcoco, caemh daeuj caeuq nauhyied.

“Bohyaenx ha, Daegyaenx mwngz doegsaw ak bw!” Veiz lauxsae doiq Bohyaenx naeuz, de doenghbaez youq aen gyauyozdenj ndaw mbanj sonsaw lai bi, dangq lwgnyez neix de cungj ndaej son gvaq, seizhaenx de raen Daegyaenx bouxvunz uk gvai gvaq vunz, gangj it yiuj ngeih, couh nyinhdingh daeg neix itdingh ndaej baenzcaiz.

“W, lij suenq gvaq ndaej bae.” Bohyaenx baez ndaej nyi vunz haenh lwg de, couh miz di ndaengmboeng.

“Daegyaenx dwg mbanj raeuz boux daih’it gauj ndaej hwnj cungdenj gauhcungh, daengzcog haengjdingh hix dwg boux daih’it gauj hwnj daihhag!” Veiz lauxsae naeuz.

Bohlunz hwnqhangx byaij deuz lo, de mbouj nyienh dingq bouxwnq damzlwnh gij saeh lwgnyez doegsaw.

Sam

Daegyaenx youq yienhsingz doeg gauhcungh, dahnuengx youq ndaw haw doeg siujyoz, ngoenzngoenz aeu gyau ngaenz gwnhaeux, ranz Bohyaenx yienznaeuz mbouj fouqmiz, hoeng song gvanbaz haenqrengz guhhong, nyaenj bak haizhoz, lij cengqgengz gvaq ndaej bae.

Bihaenx ndwenloeg gauhgauj, Daegyaenx gauj ndaej gig ndei. Aen daihhag ndaw singz soujfuj geiq daeuj mbaw dunghcih haeujhag ndeu, Daegyaenx sim’angq, Bohyaenx engq sim’angq, daengx ranz cungj sim- angq, lumj gaenq yawjraen diuzloh sohsup ronghsag ndeu youq dangqnaj lo.

Bohyaenx bekbek mbaq Daeg- yaenx, coenzvah naekgywg naeuz：“Doeg daihhag ndaej gaijbienq minghyinh bouxvunz, byonghciuh laeng mwngz baenz ndei lo, mbat neix ndaej angjnaj cojcoeng lo.” Gangj le cienqnaj yungh fwngz lumhlumh aen gyaeuj dahlwg saeq, “Dahniq, mwngz hix aeu roengzrengz doegsaw bw, daengzcog lumj daeggo yienghneix gauj hwnj daihhag.”

Hoeng, angq gvaq le naj cix gag nyaeuq lo, doeg daihhag aeu ngaenz lai, gyawz ra ngaenz bae doeg?

Gyanghaemh, gwn caeuz gvaq, Daegyaenx song beixnuengx gag boux gag bae ndaw rug yawjsaw, Bohyaenx caeuq Mehyaenx caez naengh rog hongh youqliengz, boux gaem aen beizlat vad nyungz. Ronghndwen youq gyang fwjmbang gwnz mbwn, rongh miz di myox, caemh lumj miz gijmaz nyapnyuk youq ndaw hoz.

“Gaigak duzcwz bae.” Bohyaenx naeuz.

“Gai duzcwz bae, aeu maz daeuj dawz naz dawz reih?” Mehyaenx ngeizvaeg dwk naeuz.

Bohyaenx naeuz：“Binaj raeuz mbouj ndaem naz lo, gij nazreih hawjhak goeng lauxbanj daeuj co nazreih haenx liux bae, ndaej saek di ngaenzco suenq lo. Raeuz couh bae aen cangj gienjbenj guhhong, yienghneix boq reb raen haeux, ndaej ngaenz vaiqdangq. Seizneix dan baengh geij moux nazreih mbouj miz ngaenz soengq lwgnyez doegsaw bw.”

“Gai duzcwz bae hix caengz gaeuq song boux lwgnyez aen haggeiz ha!” Mehyaenx lij youheiq.

“Caiq gai geij guengj haeux haenx liux bae couh ca mbouj geijlai lo.” Bohyaenx ndaw sim miz daej lo.

“Mwngz fatbag ha, haeux gai liux bae ngoenzlaeng mwngz hoijmomh youq ha?” Mehyaenx doeksaet ndaq naeuz.

“Gai haeux aeu ngaenz daeuj dingjgaz le, ngoenzlaeng menhmenh doq ra ngaenz doq cawx haeux gwn, atlig couh mbouj nyaenx hung lo.” Bohyaenx gejnaeuz.

Mehyaenx dingq le gag ngeix moegmoeg, mbouj guhsing lo.

Bohyaenx doeklaeng youh naeuz：“Danghnaeuz lij caengz gaeuq, caiq bae coh gyoengq beixnuengx ciq, lumj Bohlunz baih ciengz haenx, geij bi neix caengz guh gijmaz daihsaeh, wnggai rom miz ngaenz, lij miz geij boux lauxbiuj mwngz caeuq geij boux nuengxgoux mwngz, boux ciq di couh ndaej lo. Soengq lwgnyez doegsaw dwg cingqsaeh, mbouj dwg bae guhdoj, vunz miz ngaenz haengj ciq hawj.” De gangj ndaej gig miz diuzleix.

Daegyaenx mbouj rox seizlawz daeuj daengz baihlaeng daxboh, Bohyaenx raen de le naeuz：“Lwg ha, mwngz caenh rox bae doeg ndaej lo! Ndaw ranz miz daxboh daxmeh dingj youq, couh suenq gai rek gai moj hix aeu soengq mwngz doeg, aen mbwn doemq mbouj roengzdaeuj!” De gangj dwk, ceh lwgda de loh’ok geij sei sailwed nding, lumj boux canghdoj miz muengh ndaejhingz yaek roengz mbat bonjlaux nei.

Daegyaenx cehda ndongqliklik, naeuz：“Boh, meh, sou cuengqsim, ranz raeuz ginghci souhaeuj noix, ciuq mizgven cwngcwz, gou ndaej sinhcingj ciq daigvanj bae doegsaw. Yienghneix ndaej gemj mbaeu diuzrap ranz raeuz……”

Seizneix, gwnz mbwn fwj sanq- deuz seuqsat, ronghndwen ciuq ndaej laj deih ronghsagsag.

Seiq

Caiq gangj Daeglunz bae ndaw singz guh dajcaep, de gaenx guh, mbouj ndoj gik, mbouj gan rengz, lauxbanj gig yawj hwnj de. De daj gyaux naez guh daengz caep cien, caiq guh daengz bae hoi dajcang, guh yiengh rox yiengh. Doeklaeng de gingqyienz gag guh baugoengdaeuz, lamx gunghcwngz roengzdaeuj heuh hujgeiq bae guh.

Bohlunz Mehlunz raen geij boux lwg de mbouj saek boux doeg ndaej baenz saw, gag liuhdingh mbouj miz bouxlawz baenzhuq, lau gyoengqde daengzcog mbouj miz naengzlig ciengx bouxlaux. Yienghneix cij ndei gaenxgyaek guhhong, ndaem oij ndaem gva, ciengx bit ciengx gaeq, yaek gag rom ngaenz banglaux. Songde ngoenzngoenz romh ok laep haeuj, mbaet gwn mbaet yungh, mbouj sij ndaej yungh faen ngaenz, bonj cunzcez rom ngaenz de ciemh ngoenz ciemh “na”.

Mbouj rox seizlawz, geij fungh ranzvax gaeuq deng cek lo. Daeglunz daiq ndaej geij boux hujgeiq dauqma, youq ndaw namhfaenx hoenz- coemcoem, youq ndaw ndit manh- saengsaeng, hanh lae hanh roenx. Geij fag naezdau roq cien dikdik daekdaek, gyaujbangih gyaux naez humhum, baenz fuk baenz fuk ciengz ciennding ngoenz beij ngoenz sang hwnjdaeuj. Mbouj geijlai nanz, aen ranzlaeuz daengx mbanj ceiq gyaqciq ndeu daengjcup hwnjdaeuj. Song ranz doxgyawj doiqbeij, aen ranzvax Bohyaenx yienh ndaej engqgya gaeuqget vaihvad.

Haeuj ranz moq ngoenzhaenx, guh geij cib daiz laeuj, bauqrengh yiengj bili bala, ceijbauq vanq ndaej daengx mbwn hoengzsieg sanqsu, lumj cienfanh duz mbungq- mbaj mbinfaenfaen. Daeglunz daiq ndaej dahyoux ndeu dauq- ma, dahde lengjlili, naj riunyumnyum. （1）