7 nyied 3 hauh, hong sawqdiemj hwnqguh binjbaiz langhyawj “denjying Cunghvaz” buek daih’it diemj hwnqguh youq Gvangjsih Caizgingh Yozyen Duzsuhgvanj cingqsik biengjbaiz caemhcaiq doiq baihrog hailangh, neix dwg daj bineix 1 nyied 14 hauh Guekgya Minzveij Daengx Guek Siujsoq Minzcuz Sawgeq Cingjleix Yenzgiusiz yaenqfat 《Aen Dunghcih Gvendaengz Guh Ndei Hwnqguh Sawqdiemj Binjbaiz Langhyawj “Denjying Cunghvaz”》 doxdaeuj, aen diemj hwnqguh daih’it hong hwnqguh sawqdiemj binjbaiz langhyawj “denjying Cunghvaz” Gvangjsih hailangh, hauh’ok gij hong hwnqguh sawqdiemj binjbaiz langhyawj “denjying Cunghvaz” cingqsik doek namh raenhamq.

Buek daih’it giekdeih yenzgiu couqmaenh gij eiqsik Cunghvaz Minzcuz ranz vunz ndeu Gvangjsih neix youz Swcigih Minzcunghveij anmingz, Gvangjsih Caizgingh Yozyen baezneix dwkyiengj hong sawqdiemj “cungq daih’it”, dwg haeujlaeg hagsib gvancez lozsiz gij swhsiengj vwnzva Siz Ginbingz、 gij swhsiengj youqgaenj gvendaengz gyagiengz caeuq gaijndei hong minzcuz Siz Ginbingz cungjsuhgi caeuq gij gidij banhfap 《Yigen Cunghgung Cunghyangh Bangunghdingh Goz- vuyen Bangunghdingh Gvendaengz Doicaenh Hong Sawgeq Seizdaih Moq》, muzdiz dwg doenggvaq gauhyau aen cindi youqgaenj beizyangj vunzcaiz caeuq yenzgiu yozsuz neix, engq ndei doidoengh Cunghvaz conzdungj vwnzva maenhndei cauhguh cienjvaq、 cauhmoq hwngfat, vih gyavaiq cauxbaenz lizsij swhliu dijhi、 gangjvah dijhi、 lijlun dijhi Cunghvaz Minzcuz ranz vunz ndeu Cungguek gag guhcawj ok rengz.

Binjbaiz langhyawj “denjying Cunghvaz” dwg aen bingzdaiz cienzboq vunzlai caemh yungh comz senhconz yawjsaw、 langhbaij okdaeuj、 yenzgiu leihyungh、 beizyangj vunzcaiz sawgeq gak minzcuz youq doxcaez. Hong hwnqguh sawqdiemj aen binjbaiz neix youz Guekgya Minzveij Daengx Guek Siujsoq Minzcuz Sawgeq Cingjleix Yenzgiusiz gidij cijdauj, gaenjmaenh hopheux diuz sienqmeh couqmaenh gij eiqsik Cunghvaz Minzcuz ranz vunz ndeu, ciuq aen fuengyiengq caezcaemh caeuq doedok “doxyungz” bae guh, gyoebcomz baijok gak loih cwngzgoj okbanj daejyienh leixniemh “haj aen caezcaemh” haenx, gangj ndei gij goj Cunghvaz Minzcuz ranz vunz ndeu.

Youq ndaw hwnqguh binjbaiz langhyawj “denjying Cunghvaz”, Gvangjsih Caizgingh Yozyen daengj gak aen danhvei caemhguh gungh couzcomz Cunghvaz conzdungj vwnzva maenhndei baujhoh yenzgiu cwngzgoj okbanj gungh 1200 cungj suenq miz 1500 cek, vih gyoengq lauxsae hagseng hagsib、 sonhag、 yenzgiu daezhawj le cingsaenz vwnzva swhyenz fungfouq.

（Vangz Yigiz/黄誉琦 Cinz Yenfeih/陈燕飞 Liu Gez/廖洁）