Laeb Dangj daengz banneix,

Ndaej bak lingz seiq bei(bi),

Gwndaenj ngoenzngoenz ndei,

Raeuz meiz(miz) fwen daeuj haenh.

Seizneix gwndaenj ndei,

Meiz(miz) dienh meiz(miz) gihgai,

Raeuz gaenriengz Dangj byaij,

Cwxcaih gvaq ndwenngoenz.

Seizneix miz gihgai,

Caen daih ndei mbouj gvaq,

Nungzgih daeuj rauqnaz,

Genga mbouj uq namh.

Yungh gihgai dajcae,

Ngoenz bae geijcib raih,

Reihnaz lai mbouj naih,

Mbouj yungh sai goengrengz.

Ndaem haeux daengz baenzsou,

Raeuz cungj yungh gihgai,

Sou ndaej raih dem raih,

Vunz cwxcaih riri.

Gaxgonq raeuz daj rin,

Gen in rin lij gyoq,

Seiz yungh gihgai roq,

Rin’gyoq bienq baenz mba.

Gaxgonq hwnj ranzlaeuz,

Raeuz aeu fwngz doxndenq,

Seiz yungh gihgai venj,

Senj gvaq caengz youh caengz.

Seiz yungh gyaujbangih,

Raeuz mbouj hiq(heiq) gyaux naez,

Doeng dienh baenq geij baez,

Yungh naez caen fuengbienh.

Ndaw mbanj miz gihgai,

Bouxboux maij bae aeu,

Bouxlawz hwnj ranzlaeuz,

Cix bae aeu daeuj yungh.

Raemx sou daeuj daengz ranz,

Diuzhanz mbouj hwnj mbaq,

Swiqdin caeuq swiqnaj,

Deq laj suijlungzdouz.

Nenjmijgih nienj haeux,

Raeuz mbouj heiq mbouj you,

Nienj haeuxgaeq haeuxmou,

Mbouj ok dou hix ndaej,

Baez ciep dienh hwnjbae,

Haeux gag lae okdaeuj,

Cawj haeuxmou haeuxlaeuj,

Youq sim mbaeulele.

Ciuhneix caen ndei lai,

Cawj ngaiz denfangoh,

Donq cawj byaek cawj noh,

Mbouj sinhoj caux feiz.

Yungh dienh daeuj cawj ngaiz,

Caih raeuz hanh seizgan,

Bae doengh caeuq bae mbanj,

Ndaw ranz haeux gag baenz.

Gungcanjdangj lingjdauj,

Bauj lajmbanj saenqhwng,

Lwgminz fwngz gaem fwngz,

Gwndaenj hwngfwdfwd.

Haenh lai cix miz lai,

Haenh daengz dai mbouj liux,

Dangj lumj daengngoenz ciuq,

Ciuh beij ciuh fouqmiz.