第十三期

原文：

我幼时，即四十余年前，我乡端午节过得很隆重：我的大姐一月前制“老虎头”，预备这一天给自家及亲戚家的儿童佩带。染坊店里的伙计祁官，端午的早晨忙于制造蒲剑：向野塘采许多蒲叶来，选取最像宝剑的叶，加以剑柄，预备正午时和桃叶一并挂在每个人的床上。我的母亲呢，忙于“打蚊烟”和捉蜘蛛：向药店买一大包苍术白芷来，放在火炉里，教它发出香气，拿到每间房屋里去熏。同时，买许多鸡蛋来，在每个的顶上敲一个小洞，放进一只蜘蛛去，用纸把洞封好，把蛋放在打蚊烟的火炉里煨。煨熟了，打开蛋来，取去蜘蛛的尸体，把蛋给孩子们吃。到了正午，又把一包雄黄放在一大碗绍兴酒里，调匀了，叫祁官拿到每间屋的角落里去，用口来喷。喷剩的浓雄黄，用指蘸了，在每一扇门上写王字；又用指捞一点来塞在每一个孩子肚脐眼里。据说是消毒药的储蓄；日后如有人被蜈蚣毒蛇等咬了，可向门上去捞取一点端午日午时所制的良药来，敷上患处，即可消毒止痛云。——丰子恺《端午忆旧》（节选）

译文：

It

Mwh gou lij iq, couhdwg 40 lai bi gaxgonq, mbanj dou aen ciet ngux nyied co’ngux gvaq ndaej gig hoenghhwd: Dahcej gou youq ndwen gonq couh guh ndei “gyaeuj duzguk”, youq ngoenzneix daiq hawj gij lwgnyez ndawranz caeuq gij caencik. Boux hujgeiq ndaw bouqnyumx Giz Gvanh, daj co’ngux banhaet couh nyaengq guh giemqfuz: Bae ndaw daemzfwz aeu haujlai mbawfuz daeuj, genj aeu gij mbaw ceiq lumj faggiemq de, caiq gya gaenzgiemq, mwh daengz banngaiz caeuq mbawdauz itheij venj youq gwnz gyaeuj mbonq moix boux vunz bae. Daxmeh gou ne, nyaengq oenq nyungz caeuq gaeb duzgyau: De bae diemqyw cawx baenz daeh hung canghcuz caeuq bwzcij ndeu, cuengq youq ndaw lozfeiz bae, deq de ok heiq hom le, couh aeu haeuj moix aen rug bae oenq. Doengzseiz, cawx haujlai gyaeqgaeq dauqma, youq gwnz gyaeuj moix aen gyaeqgaeq roq aen congh iq ndeu, cuengq duzgyau ndeu haeuj ndaw bae, aeu ceij fung congh ndei, cuengq gyaeqgaeq youq ndaw lozfeiz bae saz. Saz cug le, hai gyaeqgaeq daeuj, dawz gij seihaiz duzgyau okdaeuj, aeu gyaeqgaeq hawj gyoengq lwgnyez gwn. Daengz banringz le, youh dawz bau yungzvuengz cuengq youq ndaw haijvanj ciemq Laeujsauhingh bae, gyaux yinz le, heuh Giz Gvanh dawz daengz gok ciengz moix aen ranz bae, yungh bak daeuj byoq. Gij laeuj yungzvuengz byoq lw le, youh yungh lwgfwngz yomx di, youq moix faq dou gwnzde cungj sij cih vangz; youh aeu fwngz lauz di daeuj cat youq saejndw moix boux lwgnyez bae. Dingqgangj dwg gij cwkrom yw siudoeg; gvaqlaeng danghnaeuz miz vunz deng duzsipndangj roxnaeuz ngwzdoeg daengj haeb le, couh daj gwnz dou aeu di yw ndei ngoenz ngux nyied co’ngux seiz cingqngux guh ndaej de daeuj, oep haeuj gizin bae, couh ndaej siudoeg cawz in lo.

（来宾市兴宾区：韦丽明/Veiz Limingz）

Ngeih

Seizde gou lij nomj, cix dwg seiqcib lai bi gaxgonq lo, mbanj gou ngux nyied co’ngux gvaq ndaej gig nauhyied: Dah cejdaih gou daezgonq ndwen de guhbaenz haujlai aen daehhom, moix aen daehhom lij siuq “gyaeujguk” hwnjbae dem, guh ndei yawhbwh daengz ngoenz co’ngux soengq hawj gyoengq lwgnyez ndawranz caeuq gij beixnuengx caencik raek. Ndaw bouqnyumx boux hujgeiq Giz Gvanh, co’ngux haetromh couh nyaengq cauh giemqfuz: De bae ndaw daemzfwz ra mbaw yiengfuz, mbaw lawz byaisoem lumj faggiemq couh senj aeu mbaw lawz, de gvej haujlai mbaw yiengfuz dauqma, cauh giemq haeuj gaenz, lumj caen giemq ityiengh, caepcawq ndei le, daengz banringz, caiq aeu giemqfuz caeuq ngedauz gyoeb cug baenz gaem baenz bog, dawz de venj gvaq gwnz gak aen mbonq bae. Daxmeh gou ne, haetromh couh nyaengq bae vuet nya gvej foed daeuj coemh, oenqngaungau, de vanzlij aeu faex damqraez cug guh sauqbaet, cienmonz bae ndawranz gokciengz sauq rongzgyau, duzgyau doek roengzdaeuj le, de couh aeu aen camj gyuemluemx duzgyau, caiq gaeb duzgyau dwk bingz: Daxmeh bae bouqyw cawx daihcumh canghcuz caeuq bwzcij daeuj, dwk haeuj ndaw loz bae coemh, miz heiq homfwt okdaeuj le, couh dawz haeuj moix aen rug bae oenq nyungz. Doengzseiz, de lij cawx haujlai gyaeqgaeq daeuj, moix aen gyaeujgyaeq roq byoengq aen congh iq ndeu, dwk duzgyau haeujbae, aeu sa fung maenh suek ndei, dwk haeuj ndaw loz oenq nyungz bae sez. Sez cug le, hai gij gyaeq, dawz duzgyau dai okdaeuj, couh hawj gyoengq lwgnyez gwn gij gyaeq lo. Daengz banringz, daxmeh youh dawz cumh yungzvuengz okdaeuj, raix roengz ndaw duix cang miz laeuj Sauhingh bae hoedndau ndei, heuh Giz Gvanh dawz laeuj gvaq moix aen ranzrug bae, aeu bak byoq gvaq gokgok gexgex. Lij lw gij laeujgwd yungzvuengz, Giz Gvanh aeu lwgfwngzvix coemj roengzbae, caiq youq moix benj dou gwnzde sij cih vangz ndeu: De aeu fwngz gvaix di yungzvuengz okdaeuj oet haeuj ndaw saindw gyoengq lwgnyez bae. Dingqnaeuz ywsiudoeg dwg yienghneix romce； beijswq ngoenzlaeng miz vunz deng duzsip、duzngwzdoeg haeb le, gojyij bae gwnz dou gvet di yw duenngux banringz guh ce haenx daeuj, baeng haeuj gizin bae, doq ndaej siudoeg, youh ndaej yw indot.

（平果市:农国先/Nungz Gozsenh）

Sam

Gou lij nomj seiz，couhdwg seiqcib lai bi gonq，ngoenzciet duenngux ranzmbanj gou gvaq ndaej nauhyied dangqmaz： Cejdaih gou ndwengonq couh guh aen “gyaeujguk”，yawhbwh hawj lwgnyez ranz swhgeij caeuq ranz beixnuengx raekdaenj. Boux hujgeiq Giz Gvanh aen diemq nyumxndaengq，gyanghaet duenngux couh nyaengq guh yiengfuz：Bae ndaw daemz mbaet daihbaj yiengfuz daeuj，daj ndawde genjok gij ceiq lumj giemq de，gya gaenh，yawhbwh banringz caeuq mbawdauz venj youq doengh aen mbonq bouxvunz. Daxmeh gou nyaengq guh “ien oenq nyungz” caeuq gaeb duzgyau：Bae bouqyw cawx bau yw canghcuz bwzcij hung ndeu daeuj，coq ndaw loz，deq de ok heiqhom，couh dawz bae oenq doengh aen ranzrug. Caemhcaiq cawx haujlai gyaeqgaeq daeuj，youq giz dingj gyaeqgaeq roq congh ndeu，cuengq duzgyau ndeu haeujbae，aeu mbawceij fung ndei，caiq dawz gij gyaeq coq aen loz aeu ma oenq nyungz bae boek. Boek cug lo， hai aen gyaeq daeuj，aeu duzgyau dai ok，hawj gyoengq lwgnyez gwn gyaeq. Daengz banringz，youh dawz bau yungzvuengz ndeu coq ndaw vanj hung Laeujsauhingh ndeu，ndau yinz lo，heuh Giz Gvanh dawz daengz ndaw gugged ranzrug bae，aeu bak daeuj byoq. Byoq lw di yungzvuengz，aeu fwngzyinx yub lo，youq doengh aen dou sij cih “vangz”；youh yungh fwngz dawz di ndeu daeuj，oet youq congh saejndw lwgnyez. Dingqnaeuz neix dwg cwkrom gij yw siudoeg；ngoenzlaeng danghnaeuz miz vunz ngaiz duzsip ngwzdoeg daengj haeb le，lij ndaej daj gizneix aeu di yw ndei ngoenzciet duenngux banringz guh de，oep gwnz gizin，doq ndaej siudoeg dingz in lo.（西林县：黄锋克/Vangz Funghgwz）

Seiq

Youq gou seiz iq couhdwg 40 bi gaxgonq, youq ngux nyied co’ngux, yangh dou gvaq ndaej daegbied lungzcung： Gij vunz ndawranz gou cungj cinjbi haujlai nanz, vihliux ciepcoux aen ciet neix daeuj daengz. Dahcej gou aen nyied gaxgonq guh “gyaeuj duzguk” lo, cinjbi youq ngoenzneix hawj lwgnyez swhgeij caeuq gij caencik daenj. Miz boux hujgeiq youq diegnyumx guhhong，de heuhguh Giz Gvanh, gyanghaet de couh nyaengq guh giemq yiengfuz: Bae henzdaemz ra haujlai mbaw yiengfuz daeuj, de mbouj dwg caezbienh ra, genj aeu gij mbaw ceiq lumj faggiemq de, caiq guh gaenzgiemq， daengz banringz couh caeuq mbawdauz itheij venj youq gwnz mbonq daihgya. Daxmeh gou ne, gaeb duzgyau caeuq “dwk nyungz”cij daih’it mingz lo：De bae bouqyw cawx baenz bau canghcuz bwzcij daeuj, cuengq haeuj ndaw lozfeiz bae, oenq gij heiq hom okdaeuj, yienzhaeuh dawz bae fungh ranz dou oenq. Doengzseiz, cawx haujlai gyaeqgaeq daeuj, youq moix aen dingj gyaeqgaeq hai congh iq ndeu, cuengq haeuj duzgyau ndeu, yungh ceij fung ndei, cuengq gij gyaeq neix haeuj ndaw lozfeiz bae saz, saz cug lo, hai gyaeq okdaeuj, dawz gij seihaiz duzgyau ok, cix hawj lwgnyez gwn. Daengz banringz lo, cij cuengq bau yw yungzvuengz haeuj vanj laeuj bae, doxgyaux ndei. Cix heuh Giz Gvanh dawz bae moix aen gokranz saj, aeu bak byoq. Gij lw de, couh dawz hohfwngz diemj youq moix aen dou sij cih vangz saw ndeu; cij diemj daengz moix it aen dungxsaej lwgnyez. Dingq vunz gangj dwg gij rom yw siudoeg; gvaqlaeng danghnaeuz miz vunz deng duzsip roxnaeuz duzngwz haeb, couh ndaej daj gwnz dou bae vat aeu di yw ndei youq ngux nyied banhaet guh haenx daeuj, oep daengz giz sieng neix, youh ndaej siudoeg youh ndaej dingz in.

（南宁市武鸣区：覃洁/Cinz Gez）

（6）