Haemhlwenz loq raen mbwn ok ndit,

Gou youh dawz bit daeuj sij sei;

Sij ok sei haenh hot hot ndei,

Ngoenzneix dawz bae soengq hawj Dangj.

Guengjsae fwenhaij cien bi lai,

Eu fwen sim hai youh sim sangj;

Fwendanq soengq hawj Gungcanjdangj,

Bouxboux sim’angq lumj gwn dangz.

Cunghgung laebbaenz mauh(gvaq) bak bi,

Guekcoj gizgiz cungj vuenh yiengh;

Mbanjcuengh lwglan doengzcaez ciengq,

Vunzlai cungj siengj haenh Dangj raeuz.

It gouj ngeih it bi de haen,

Cunghgung laebbaenz vunz angqyangz;

Mbawgeiz gwzming yaengx hwnj sang,

Vunzlai angqyangz coux ngoenz rongh.

Bide caet nyied byajraez mboeng(yiengj),

Youq dieg baihdoeng hoenzneuneu;

Lungz hung ngangx（ngiengx） gyaeuj saeceij ndiu,

Nditndongq cungj ciuq rongh doh biengz.

Gyahhingh Nanzhuz comz vunzak,

Gwzming couh dak gyoengqde gangj;

Laebbaenz Cungguek Gungcanjdangj,

Diuzloh raezrangh baengh de daz(yinx).

Siengj daengz bide Dangj laebbaenz,

Bouxboux sim haen maenjfofo;

Gouq guek gouq minz ok dieghoj,

Daiq vunz byaij loh hengz gwzming.

Fwnfwn rumzrumz bae fwndou,

It loh byaij daeuj lumj fwensei;

Nyig rumz buq langh hai ruz bae,

Vuet oen rag mae coh baihnaj.

Nanzlumz it gouj ngeih it nienz,

Fwnrumz lienzlienz bongj gwnzdeih;

Aendangj daiqlingx daengz ngoenzneix,

It loh guh saeh yienghyiengh baenz.

Dangj raeuz daiqlingx bak bi lai,

Diuzloh yied hai cix yied gvangq;

Cunghyangh dawz dox onjdangqdangq,

Swnh rumz buq langh bae mbouj dingz.

It gouj ngeih caet hwnj rumz laux(hung),

Bet nyied it hauh gwnzbiengz ning(doengh);

Byajraez doengh deih hengz gwzming,

Nanzcangh ndaw singz hoenzfeiz hwnj.

Dangj raeuz hai ruz langh fubfi,

Betit Gijyi youq Nanzcangh;

Hai guh gwzming diendeih gvangq,

Youq gwnz Cingjgangh comz Hungzginh.

Daj namz bae baek byaij mbouj dingz,

Mbawgeiz saeknding mbinyagyag;

Gaenriengz Dangj byaij goengrengz ak,

Dwkciengq hojyak caemh mbouj lau.

Fanjdung seiqlig ceiq cix guengz,

Seiqmienh betfueng gung Dangj raeuz;

Doengh boux daiqlingx miz geiqmaeuz,

Vunzlai caez aeu yunghrengz buek.

Gujdenz Veiyi rongh’angjdangx(ronghsagsag),

Dinghlaeb youz Dangj cijveih cungq;

Hungzginh dwkciengq ceiq yinghyungj(ak),

Daj iq bienq hung nyieg bienq giengz.

“Cojgingh” cujyi loeng nanz lumz,

Suhgih fanj humx sonjsaet daih;

Lizhai dieggoek goj fouznaih,

Sienghgyangh betbaih deng hoenx yak.

Youq mwh youqgaenj Dangj vuenh daeuz,

Gyoengq Hungzginh raeuz bouxboux angq;

Mauz cujsiz daeuj gouq aen Dangj,

Daj neix cix yangj(ndongj) baenz gangdiet.

Seiq doh Cizsuij byoengq fanh nanz,

Cung ok yiemjgvan deuz dieg humx;

Fan gvaq byanae haeuj diegnyum(diegnywj),

Cangzcwngh nanz lumz gij hojnanh.

Cungqvunz cienfanh doengzcaez hwnj,

Gyaep bing Yizbwnj ok Cungguek;

Haenqrengz gaj caeg caez bingqbuek,

Hawj raeuz Cungguek mbwn dauq lamz.

Geijlai dangjyenz sim genqndongj,

Haenqrengz bae bongh youq baihnaj;

Mbouj lau gyaeuj doek lwedhoengz saj,

Gwed cungq bae gaj gyoengq vunzcaeg.

Sam daih canyiz dwk ndaej hingz,

Bak fanh bouxbing gvaq Cangzgyangh;

Dued ndaej dienyah minz caez angq,

Gyo Gungcanjdangj ndaej dangranz.

Ciengq go diuq foux bongh baenaj,

Bae gwnz bae laj cungj sim’angq;

Bingdoih bouxminz dingq vah Dangj,

Diuz neix mbouj gangj vunz hix rox.

Ciencien fanhfanh dangjyenz ndei,

Bouxboux cungj geiq ngoenz haeuj Dangj;

Gungcanj cujyi dwg lijsiengj,

Youq naj geizdangj(dangjgeiz) cungj mieng gvaq.

Duzmax ndangcangq buet cix biu(vaiq),

Gwnz rin gyaq giuz byaij onjdingh;

Mbouj lumz simnduj caeuq sawjmingh,

Mwhmwh sim dingh cungj bae gonq.

Youhliengz conzdungj daihdaih cienz,

Itcig doxlienz daengz ngoenzneix;

Ciep guh saehnieb doengzcaez ngeix,

Gwzming daengz daej mbouj doenghngauz.

Guek ndoq yaek bienq gunghyezva,

Mboujduenh fazdaz guh hwnjbae;

Gunghnungz gohgi caeuq ginhdui,

Yienghyiengh doengzcaez hwnjsusu.

“Song dan it sing” mbwndeih doengh,

Caux guh saehhoengh goenglauz sang;

Byawz mbouj boiqfug Gungcanjdangj,

Ligliengh de yangj(ndongj) baenz gaiqmaz.

Cungguek gaijgwz hailangh le,

Vunzhung lwgnyez cungj simdoengh;

Dangj daiq bouxminz byaij loh hoengh,

Gwndaenj mbouj yoengh(yungh) mwngz youcaeuz.

Gaijgwz hailangh ndei dahraix,

Diuzloh yied byaij cix yied baenz;

Ranzlaeuz hwnjdaeuj aen dem aen,

Roeglaej mbouj raen yiemhranz gaeuq.

Gaijgwz hailangh yamqdin vaiq,

Dangj Ngeihcib Daih engq cauhmoq;

“Lungz ak” roengz haij bae aeu hoq(huq),

Lij miz “cangzngoz” hwnj ronghndwen.

Youq Cibbet Daih byaij gvaqdaeuj,

Dawz fanj nduknaeuh guh saeh haen;

Lenzcwng gensez ca ndaej gaenj,

Dingh guh nyinhcaen hawj gwnzbiengz.

“Haj vih it daej” miz hengzdoengh,

Mbouj ndaej cuengqsoeng guh dahraix;

Ginggvaq Cibgouj Ngeihcib Daih,

Heiqyak gaiqgaiq yaek baet caez.

Haeujlaeg gaijgwz cungj hezdiuz,

Mbouj dwg gangjriu caeuq gangj- hung(gangjboq);

Saedyienh daengx guek cungj duetgungz,

Mehbaj bohlungz bouxboux angq.

Miz muengx roengz haij gaeb ndaej fw(duzfw),

Miz dwngx dwk ngwz cungj ndaej dawz;

Dangj raeuz vix yiengq gvaq gizlawz,

De heuh guh rawz(lawz) raeuz cix hwnj.

Cwngci ginghci song fwngz ca,

Gorangz did ngaz mbouj lau dimz;

Hungzgvanh diuzgung lumj ndaekgim,

Cwngcwz fouqminz fanh ranz hoengh.

Bak ndaej cimz mak raen vandiemz,

Gihcwngz diuyenz cingzgvang rox;

Cingcinj banggungz guh ndaej doh,

Siujgangh swnghhoz van dangzrwi.

Gwnz bya roq gyong cienz bae gyae,

Dangj raeuz seizseiz hengz saeh daih(hung);

Vih minz fuzvu guh dahraix,

Ciuhciuh daihdaih mbouj bienq sim.

Cungguek fazcanj vaiq fouzbeij,

Saeh’angq gwnzdeih lai baenz roix;

Couhlumj hwnj laeuz bae gwn oij,

Mbaekmbaek hwnj doiq(sang) hohhoh diemz.

Gausuk goengloh doeng daengz mbanj,

Byaij loh mbouj anj(baeg) vunz sim van;

Vangjloz densangh haeuj daengz ranz,

Ngoenz miz ngaenz canh mbouj ok dou.

Bya heu raemx loeg mbwn heusi,

Singzmbanj gizgiz suenva maeq;

Roeg heuh va rang vanzging ndei,

Gwndaenj vuenheij lumj bouxsien.

Goenglaux lienhndang youq gvangjcangz,

Ndangdaej cungj cangq lumj lwgmbauq;

Daxbuz diuq foux riu sing laux(hung),

Lumj sien boq hauh youq gwnzmbwn.

Nanzlumz ngeih lingz ngeih lingz nienz,

“Sinhgvanh feiyenz” daeuj cienzlah;

Gij bingh yienghneix caengz raen gvaq,

Dangj daiq cien’gya(conhgyah) boq nanzdaez.

Gak sengj doengzcaez bang Vujhan,

Beixnuengx mbanjranz mbouj doxbwnj(mbouj yungh cam);

Dangjyenz soujsien daiqdaeuz hwnj,

Doengh boux yihswngh(canghyw) ceiq sim- hoengz.

Ceng faen dued miux gangq(dingj) binghraq,

Lwglan Cunghvaz gamj binqbuek;

Doengh boux yinghyungz yunghrengz buet,

Byawz beij Cungguek raeuz lij ngoz(ak).

Ca fuengz binghraq ca swnghcanj,

Daiqlingx ranzmbanj caez gung hoj;

Baujcingq beksingq raeuz swnghhoz,

Cungqvunz docih Gungcanjdangj.

Roengzrengz guh hong mbouj lau anj(baeg),

Cienzmienh fazcanj caiq gyagiengz;

Dangj gangj gijmaz raeuz couh riengz.

Dingh engq fouqgiengz youq ngoenzcog.

Lizsij fazcanj daengz ngoenzneix,

Gij saeh vuenheij buek dem buek;

Fanh vunz doengz guh moengh Cungguek,

Gyoengqraeuz caez buet bae baihnaj.

Dangj Ngeihcib Daih saedcaih haen,

Doengzcaez coh aen muzbyauh moq;

Song aen bakbi guh baenz soq(saedyienh),

Daengzcog guekcoj engq fouqgiengz.

Baengh miz fwnraemx miuz cij hoengh,

Baengh miz ndit ndongq va cij nding;

Ngoenzneix fanh saeh guh ndaej hingz,

Dangj raeuz aencingz raez lumj dah.

Angqhoh laeb Dangj bak lingz seiq,

Biengzdeih vuenheij nditrongh angj;

Vuenyungz mbouj lumz Gungcanjdangj,

Aencingz yaek gangj cienfanh nienz.