Gicej mboengqneix cam Swcigih Caizcwngdingh rox, vih fugsaeh daihbuenz guhhong caeuq daengx buenz ginghci sevei hwngfat, 2025 nienz gih raeuz dungjcouz cunghyangh、swcigih gak hangh ngaenzcienz 20.8 ik maenz, haenqrengz baujcang gauhyau bizyezswngh miz hong guh.

Ciuq Swcigih Caizcwngdingh Gyaugohvwnzcu mizgven bouxfucwz lwnh, gih raeuz dingjmaenh cwngfuj caeuq hawciengz caez okrengz, gya’gvangq gak giz、gak loh aeu vunz guh hong. It fuengmienh, yungh ndei hawciengz gietdingh yungh vunz, anbaiz 1 ik maenz haeujcoengh doengh aen giyez iq sou vunz bae guhhong, 1-5 nyied, gyoebsuenq fat saetnieb baujyiemj baez dog gyalai gangjvei boujdiep 1600 fanh maenz, bangrengz sou gauhyau bizyezswngh daengj bouxcoz guhhong 1.05 fanh boux; lingh fuengmienh, gyaak dazyinx bae gihcwngz guhhong, anbaiz 11.49 ik maenz haeujcoengh “dwzgangj lauxsae”“baihsae dajveh”“sam coengh it fuz” doengh gij hanghmoeg fugsaeh gihcwngz neix, doihaeuj gij dajveh gungganq “deihfueng swhfanswngh goenggya ok cienz”“lajmbanj dinghdan dinghyiengq hagseng guh canghyw mienx cienz”, saedhengz aen cwngcwz gauhyau bizyezswngh gaiqneix bae gihcwngz guhhong bouj cienzhag.

Doiq gauhyau bizyezswngh mwh ngamq cauhnieb rahong, ngaizcienz caizcwng daj cauhnieb caeuq rahong song dieg okrengz. Haeujcoengh cauhnieb, anbaiz 1.24 ik maenz gunghawj danbauj ciqngaenz boujsik hawj gauhyau bizyezswngh doengh gij vunz daegbied cauhnieb neix, 1-5 nyied gaenq fat cauhnieb danbauj ciqngaenz ca mbouj lai 4000 fanh maenz; anbaiz 1910 fanh maenz fat boujdiep bangfuz hawj 18 aen giyez cauhnieb gauhyau bizyezswngh. Haeujcoengh rahong, anbaiz rahong cauhnieb boujdiep 2 ik maenz, guj haeujcoengh mauhgvaq 12 fanh gauhyau bizyezswngh rahong cauhnieb; dajveh anbaiz 3 ik maenz, doeksaed gij cwngcwz guekgya banghag ciqngaenz mienx sik caeuq bonjcienz doilaeng boiz.

Vih coihaeuj gauhyau bizyezswngh guhhong lai ndei, gih raeuz lij haeujcoengh son dinfwngz、cizyez gyauyuz、fugsaeh dazyinx guhhong sam fuengmienh neix. 1-5 nyied, gyoebsuenq coh gauhyau bizyezswngh guh son dinfwngz miz boujdiep 3400 vunzbaez; doiq mbangj hangzyez ra mbouj ndaej vunz, buedcienz 1.68 ik maenz doihaeuj cizyez gyauyuz canjyez caeuq gyauyuz yungzhab, hawj vunz caeuq gangjvei doxngamj; anbaiz 750 fanh maenz haeujcoengh dazyinx guhhong、hoih sueng leh doengh gij saeh neix. (daj 《Gvangjsih Yizbau》 aeu daeuj hoiz Huz Daiveij)