Sinhvazse Baekging 6 nyied 29 hauh dienh Mboengqneix, Cunghgung Cunghyangh cungjsuhgi、Guekgya cujsiz、Cunghyangh Ginhveij cujsiz Siz Ginbingz hoiz saenq hawj gyoengq vunzmbanj Sihcang Linzcih Si Bahyiz Gih Linzcih Cin Gazlah Cunh, caensim deqmuengh gyoengqde.

Siz Ginbingz youq ndaw saenq hoiz naeuz, yawj raen fak saenq daeuj, naemj daengz 4 bi gaxgonq bae Gazlah Cunh, aenmbanj seuqcengh gyaeuget、vunzmbanj simndei lauxsaed, gou roxnyinh ndei lai. Rox geij bi neix ndaw mbanj bienq yiengh moq, gyoengq beixnuengx lai miz ngaenz lo, lawh gyoengqsou vuenheij.

Siz Ginbingz daegbied gangj daengz, daihgya youq ndaw saenq naeuz ndaej deng, yawj Bwzdoujsingh byaij mbouj loeng roen, riengz Gungcanjdangj byaij ndaej vuenyungz. Maqmuengh gyoengqsou miz gij cwngcwz ndei hwng bien fouq minz Dangj dazyinx, caen hen ndei minzcuz doxgiet, caux ndwenngoenz lai gyaeundei vuenyungz, baujhoh ndei gij gingj gyaeundei diegsang diegnae, cat gaiq binjbaiz “mbanj vadauz” lai rongh, coengh rengz hung hwnqguh henzguek guekcoj hoenghvuengh maenhdwd.

2021 nienz 7 nyied, Siz Ginbingz cungjsuhgi youq mwh gaujcaz Sihcang bae Gazlah Cunh yawjngonz camnai vunzlai gvaq. Gazlah Cunh aenvih vadauz doengh cix okmingz. Ciuq Siz Ginbingz cungjsuhgi son naeuz, aen mbanj neix geij bi neix baeyouz lajmbanj、guh hung cizdij ginghci、coihaeuj minzcuz doxgiet doengh gij saeh neix aeundaej cingzcik moq, ndaej “daengx guek minzcuz goxgiet baenaj mozfan cizdij” daengj mingzdaeuz. Bineix dwg Sihcang Swcigih laebbaenz 60 hopbi, gyoengq vunzmbanj Gazlah Cunh mboengqneix raiz saenq hawj Siz Ginbingz cungjsuhgi, lwnh ndaw mbanj bienq ndaej baenzlawz yiengh, naeuz yaek laemx- sim gyo’mbaiq haenqrengz baenaj、caux ndwenngoenz lai gyaeundei.