Ndaw sim gou, miz bouxvunz youh lujlaj youh ndiepgyaez gou ndeu youq de，bouxde couh dwg daxboh gou. Youq ndaw saedceij bingzciengz, de buenx gou hawj gwnz loh majhung gou cungj raeujrubrub.

Geiq ndaej ngoenz haihag daih’it, gou caeuxcaeux sousib ndei doxgaiq, daxboh gangj caenlili naeuz haengjdingh dawzseiz soengq gou bae hagdangz, yienghneix, gou muenghngwdngwd ndwn youq laj gofaexgeq bakhaw caj de. Gofaexgeq hungmaengh, gwnz go naengfaex cungj dwg raiz geq raiz gaeuq, gou ndwn youq laj raemhfaex, yaep youh yaep ngaem gyaeuj yawj soujbyauj, ndaw sim cungj angq dwk naemj haggeiz moq、ndwenngoenz moq yaek miz gij saeh ndei haenx. Seizgan baenz faen baenz miux gvaqbae, bakhaw baenzlawz cungj mbouj raen gij ngaeuz sug daxboh haenx. Gou hainduj simgip seiqcawq muengh, ndaw sim luenh dangqmaz. Couh youq seiz gou siengj mbouj caiq cajdeq de, gyaq ci sugnaj ndeu cij daeuj daengz baihnaj gou. Daxboh gipmuengz roengz ci, najgaej dwk naeuz, aenvih sibgvenq, de gingqyienz hai ci bae danhvei, bae daengz byonghloh seiz fwt siengj daengz gou lij youq bakhaw caj de. Seizhaenx, caenhguenj gou miz di ndatheiq, hoeng yawjraen gij yiengh najgaej de, sojmiz gij mbouj dawzhoz haenx hix hoenz siu fwj sanq lo. Dou doxcim le riu lo. Yienznaeuz ngoenz haihag daih’it nguhdaengz lo, hoeng faenh daxboh dahlwg song vunz doxrox doxnyiengh haenx, cix hawj haet haenx bienqbaenz gig raeujrub youh miz eiqsei.

Lijmiz baez ndeu, gou youq hagdangz mbouj siujsim dwk aen soujbyauj doek, simgaek dangqmaz lwnh daxboh nyi. De mboujdan mbouj ndaq gou, dauqfanj sikhaek daiq gou youh bae cawx aen cinwngz soujbyauj moq ndeu. Youq ndaw diemq, de doq hozunq son gou baenzlawz yacaij soujgih yonjgen, doq gangjriu naeuz:“Mwngz fwngz menh din nguh, caen dwg bouxngawz iq dahraix!” Yienznaeuz ndaw vah daiq miz loenghriu, hoeng gou hix gamjsouh daengz faenh gyaez daxboh dijbauj haenx. Seizhaenx gou daep hwnj soujbyauj moq, lumjnaeuz hix daep faenh gyaezmaij caeuq maqmuengh daxboh naekgywdgywd haenx, gamjsouh daengz gyaezmaij duh daxboh lumj raemx raeuj lae haeuj ndaw sim.

Daxboh gou couh dwg boux vunz yienghneix, de lujlaj seiz ciengzseiz hawj gou daej riu mbouj baenz, hoeng engq lai dwg gij saeh lumjnaeuz gig mbouj haeujsim haenx, cix yaenq youq ndaw sim gou laeglaeg bae, hawj gou engqgya insik moix diemj moix di gou caeuq daxboh doxndiep doxbuenx raeujrub haenx.

(Cungh Fanghginj raiz

Lingz Hinghningz hoiz)