Raen bouxwnq daiq duzma、duzmeuz bae youzlangh, ndaw uk gou sawqmwh miz aen siengjfap geizheih ndeu: Gou daiq duzbit okbae youzlangh caemh mizyinx ba! Siengj daengz couh guh, ndaej daxboh daxmeh doengzeiq le, gou umj duzbit Donzdonz, buet roengz lajlaeuz bae.

Duzbit gou Donzdonz daengx ndang bwnhenj, miz fouq da iqet lumj naed caw nei, mwh de angq, couh aj aen bak bejbetbet de gaga dwk ciengq go, byaijroen hwnjdaeuj, faj din iq lumj mbawraeu haenx bek youq gwnz deih yiengjbaba.

Ngamq okbae daengz rog laeuz, Donzdonz couh iet hoz doeng yawj sae yawj. De bi swix bi gvaz gaen youq baihlaeng gou, seiz mbouj seiz hemq gaga. Caengz byaij bae geijlai gyae, couh miz geij boux nyezdoih yawjraen Donzdonz, hula doq humx gvaqdaeuj: “Yawj ha, bitlwg! Caen dwggyaez ya!” Couhlienz doengh boux daxau daxnax youzbyaij haenx cungj dingz roengzdaeuj, aeu soujgih itmienh gaep itmienh riu: “Caen dwg baez daih’it raen vunz daiq duzbit daeuj youzlangh!”

Byaij yaep he le, dou daeuj daengz henz daemz. Raen daengz raemx ndaw daemz fubfub febfeb, Donzdonz mbe fwed bekbek geij baez, gaga heuh dwk, budung sing ndeu diuq roengz raemx bae. Aiya, gou lijcaengz son Donzdonz youzraemx ne, de mbouj siujsim deng saekndaek baenzlawz guh? Gou cingq simgip, mbouj siengj daengz duz bitlwg neix buba buba cak song baez, couh onjdwtdwt youz okbae lo. Yawj gij yiengh neix, duzbit sengcingz couh rox youzraemx ya! De yaep ndeu ndaem haeuj ndaw raemx, yaep ndeu iet hoz coh gou heuhgaga, lumjbaenz caeuq gou gangj: “Mwngz yawj, gou leixhaih ba!” Youz baeg le, de lumj aen ruz iq nei youz ma henzhamq, saeujsaeuj gij bwn mbaeqmbatmbat gwnz ndang, doq boemz youq gwnz diegnywj dak ndit. Gou hix buenx de dak ndit. Gij yienghceij de haepda dak ndit caen dwggyaez!

Diuzroen ma ranz, ginggvaq benq diegnywj ndeu, miz duz mbaj henj ndeu youq diegnywj mbinfoux. Donzdonz raen le, ngauznged ngauznged buet gvaqbae, vadvad doiq fwed iq de, hemqgaga, lumjbaenz dwg naeuz: “Vaiq dingz roengzdaeuj caeuq gou guhcaemz!” Raen duzmbaj yied mbin yied sang, gou ganjvaiq heuh de: “Bit huk ha, gaej gyaep lo, mwngz gyaep mbouj dawz law!” Duzbit mbouj fugheiq dwk ngeng gyaeuj coh gou heuh coenz ndeu, nyeux gyaeuj yawj duzmbaj yied mbin yied gyae haenx, youh yawjyawj gou, gyaeuj duiq hoz unq riengz gou ma ranz lo.

Ngoenzneix, Donzdonz daiq hawj gou haujlai angqyangz caeuq doeksaet. Gou naebsim, gvaqlaeng gou lij yaek daiq de lai bae gizwnq, lailai louz roengz gij dauqngeix gyaeundei!

(Liuz Yijcwngz raiz

Lij Siulingz hoiz)