Gangjgoj mbouj ngamj byongh coenz lai, laeuj ndei doxgwn cien boi noix. Laujuj haenh gij giemxdourin Vangz Gencingh soucomz haenx, de genyi Vangz Gencingh lai soucomz gij doufaex、cuengfaex ranzgeq, gij muhrin、doiqrin caeuq fagcaefaex、fagrauqfaex、aendaehnengj、baengz- ndongq daengj, cujyau mwngz siengj aeu, lajmbanj gijmaz cungj miz, caiqlij aeu sienggih ingj gij ranzhaz, gij diengzhaex yaek loemq、liengzvax、ranzvax caeuq ciengz- namh haenx……

“Uj ginghlij, siengj mbouj daengz mwngz rox baenzlai.” Vangz Gencingh haenhdanq naeuz, lumj youq ndaw mokfoenfoen haenx yawj- raen di ndit ndeu ciuq roengzdaeuj, de roxnyinh Laujuj hawj de hwnj dangz goq ceiq miz ik ndeu, doengzseiz hix hawj de rox sourom gij doxgaiq neix dwg doiq gwnzbiengz miz gungyen, gij yiyi haenx mbouj dwg gimngaenz ndaej gujyawj, de cungjsuenq mingzbeg lo, deq mbouj miz hong guh le, de couh bae hag hai ci, cawx aen ci’ngeihsouj ndeu bae mbanj gvaq haw, rib sou gij “bauj” ciuhgeq yaek ngaiz ndek deuz haenx.

（Ngeihcib Sam）

Vangz Gencingh hwnq congz deq ranz rongh, haetneix de aeu bae hawhuqgeq yawj miz mbouj miz doxgaiq ciuhgeq de naemj aeu haenx. Cib diemj cung dungx iek le de bae ra haeux gwn. Youq gaicibcih yawjraen aen bouqhaeux ngamq haicieng ndeu, de byaij gvaqbae naengh roengzdaeuj, siengj daengz song lauxdoengz, couh dwk denva hawj Lij Danenz, dwg hauhhoengq, youh dwk hawj Lungzingh, Lungzingh gig angq, cam youq gyawz, Vangz Gencingh naeuz liux, Lungzingh gig sug giz dieg neix, de naeuz byaijdin cib lai faen cung couh daengz.

Vangz Gencingh caiq dwk denva hawj Lij Danenz, cungjdwg hauhhoengq.

Cenj caz daih’it habbak dungx raeuj, cenj caz daihngeih ndat bak cik dungx, lauxdoengz Lij Danenz baenzlawz yienghneix ni, hong mbouj baenz guh hix mbouj yungh caiq gven soujgih ha!

Vangz Gencingh vih lauxdoengz youheiq.

Lungzingh daeuj daengz, gij biujcingz de mbouj nit mbouj ndat, hawj Vangz Gencingh miz di mbouj cwxcaih, “naengh, naengh gwn caz gonq.” Vangz Gencingh daihfueng dwk naeuz. Lungzingh naengh haeuj daengq cam: “Baenzlai nanz mwngz caeuq lauxdoengz Lij Danenz lienzhaeh lwi?” Vangz Gencingh naeuz: “Dwk haujlai baez denva cungjdwg gven gih roxnaeuz hauhhoengq.” Lungzingh naeuz: “De yiemq cienz nizswjfwnj gou song fanh maenz caengz hawj gou, roetma, gij lauxdoengz neix mbouj baenz!”

（34）