Cinz Cunghdai miz sim fanjgang, hoeng it fuengmienh roxnyinh mehmui gouq mingh de; lingh fuengmienh, de rox mehmui yienznaeuz gouq de lo, hoeng de mboujgvaq dwg gaiq noh singjsien iq henz bak de, de seizseiz cungj ndaej dangguh saejdaeuz de gwn bae. Ndigah, de mbouj cak, youzcaih mehmui got dwk.

Banhaemh, Cinz Cunghdai guh aen fangzhwnzloq ndeu, loq raen mehmui ndaem bienqbaenz dahsau lengj ndeu, gyoengqde doxing, lij hengz gij laex gvanbaz.

Gvaqlaeng, mehmui ndaem mboujdanh mbouj miz gij eiqsei yaek gwn Cinz Cunghdai, lij ngoenzngoenz cungj lumj bawx nei caeuq de unj, hag de cawj gijgwn, gangj vah vunz, lij hag vunz byaij roen dem. Gyoengqde caemh hwnj bya bae dwk nyaen, caemh roengz dah gaeb bya. Banhaemh, boux vunz duz mui ndeu, engq lumj boux gvan boux baz nei doxgot ninz.

Gvaq bi ndeu le, gyoengqde yienzfaenh miz gezgoj lo, duzmui seng roengz duz lwg bizbwd hung ndeu.

Daeglwg naj 、 fwngz 、 ga daengj cienzbouh caeuq bouxvunz ityiengh, mbouj miz saek di yiengh mui.

Riengz daeglwg ngoenz ciemh ngoenz majhung, Cinz Cunghdai hainduj simnyap mbouj angq lo, aenvih de mbouj gamj siengj, lwg maj youq ndaw gamj, majhung le yaek miz maz cwtsik. Mehmui yawj youq ndaw da, ndaw sim hix nyapnyuk dangqmaz.

Doeklaeng miz ngoenz ndeu, duz muimeh ndaem soengq Cinz Cunghdai daengz bakgamj, yienzhaeuh ndenq daeglwg hawj de, yungh gij vah vunz ngamq hag rox haenx naeuz:“Baema ranz ba, ma daengz ndaw seiqgyaiq vunz lajmbwn bae, ciengx lwg raeuz majhung, beizyangj de baenz boux vunzak ndeu.”

Cinz Cunghdai raemxda laebyoegbyoeg, de cingznaek yawj mehmui ndaem, gag daejsaekwk naeuz:“Mbouj, raeuz…… raeuz doengzcaez baema ba.

Hoeng, mehmui uet raemxda, doi de deuz, yienzhaeuh buet haeuj ndaw gamj bae, aeu rin hung saek maenh bakgamj.

Cinz Cunghdai youq bakgamj ngaeuq haujlai nanz, duz muimeh ndaem cungj mbouj hai “dou”, mbouj miz banhfap, de cijndei umj daeglwg raemxda doq rih doq bae.

Ma daengz ranzcoj Sanhdungh le, Cinz Cunghdai cix caiq mbouj dwen duzmui ndaem neix saek cih, caenh naeuz swhgeij baenzgya lo, mehyah singq Mui, lwg heuh Cinz Yaucuj. Aenvih Cinz Cunghdai baenzbi lumj Gungjswj nei dauqcawq youz bae hawj vunz gangjhag, ndigah gyoengq ranznden gig saenq mbouj ngeiz.

Cinz Yaucuj majhung le, cingq bungz Vujvangz Fazling, de bae daengz laj ciengq Vujvangz. Aenvih de ciepswnj le gij rengz saenz daxmeh de, song fwngz ndaej yaengx goengq bya iq ndeu, mbat cax ndeu bag roengzbae, ndaej bag goengq bya hung ndeu baenz song mbiengj. Youq ndaw bak fanh bing, aeu aen gyaeuj bouxdaeuz vunzdig lumj mbut daeh aeu doxgaiq, baih vunzdig baez raen mingzcoh de couh lau dwk nyouh sinz. Ndigah, de moix gung biet haek, moix hoenx cungj hingz. Vih Vujvangz guh baenz aen daih nieb neix, laeb goenglauz geizheih baez dem baez. Ndigah, cancwngh ndaej hingz le, de deng Vujvangz fung guh guk mbei daihcienggun, daxmeh de deng fung baenz duzmui vuengz, aen congh mehmui youq haenx heuhguh Gamjyahmui.

Hoeng, mehmui vuengz cix baenzlawz hix mbouj nyienh caeuq daeglwg bae gingsingz yiengjsouh yungzdaeuz fouqgviq, caemhcaiq, doeklaeng Cinz Cunghdai hix gvaqseiq lo. Mbouj miz banhfap, Cinz Yaucuj gouz Vujvangz hawj de ma ranz ciuqgoq daxmeh.

Vujvangz niemh de hauqswnh, cix yungh bienmax baez ceij, veh Gvangjsih seizhaenx lij fwzrwgrwg haenx baenz Lozyezgoz, fung Cinz Yaucuj guh Lozyezhouz.

Daj seizhaenx hwnj, Cinz Yaucuj ma daengz Gvangjsih hai diegguek ciu lwgminz. De comz bing youq Mbanjsaihingh, hai gvangq aen gamj mehmui baenz yenjbinghdangz, moix ngoenz hawj daxmeh youq ndaw yenjbinghdangz yawj bing. De lij daegdaengq guh aen eij hung maenhsaed ndeu, moix ngoenz de cungj umj daxmeh hwnj eij hung, bang daxmeh roi gyaeuj dajcang. Yidi rox le, cix gaengawq aen goj gamjdoengh vunz neix daeb baenz goengq bya ndeu.

Neix, couh dwg Byayahmui ngoenzneix.（2 sat）