Aeu seieiq daeuj beij giz dieg ndeu cwxcaih、ndeiyouq, daihgaiq youq aen sigij gonq bet goujcib nienzdaih ndaw guek “hwng yinzvwnz segoh” hainduj. Mwhhaenx, gyoengq yinzvwnz yozcej fanfoek dwen daengz Dwzgoz cezyozgyah Haijdwzgwzwj bien faenzcih《Vunzraeuz, Seieiq Bae Douhyouq》. Giz naeuz “seieiq bae douhyouq” ceiq caeux dwg oklaeng coenz sei Hozwjdwzlinz: “Vunzraeuz, dwgrengz sinhoj, hoeng lij seieiq dwk youq gwnz daihdeih gvangqlangh neix youq onjdwt.” Hozwjdwzlinz hix ndaej, Haijdwzgwzwj hix baenz, gyoengqde yienzbonj eiqsei dangyienz dwg naeuz vunzlajmbwn wnggai baenzlawz gwn baenzlawz youq, dwg huzndei cix mbouj dwg nyaengqnyat muengzsueng, dwg dox aeueiq cix mbouj dwg dox haephangz caeuq dox sienghaih. Hozwjdwzlinz youq aen seizdaih de、Haijgwzdwzwj youq aen seizdaih de, lajmbwn cix mbouj onjdingh, cawzliux coenzvah baenzneix, mizgven gij saeh gyoengqde gou rox gig noix, gou ngeix, gij vah mizmingz yienghneix youq aen seizdaih gyoengqde, daihgaiq engq lai hamz miz gikheiq、fouznaih caeuq maqmuengh: Vunzraeuz, gvaq ndaej ndei、youq ndaej onj dwg cungj yienghsiengq ceiq ndei, cigndaej ciengxlwenx bae gyaepgouz.

Doengzseiz, gou nyinhnaeuz seieiq cix mbouj dwg hawhoengq, cix mbouj dwg yawj mbouj raen lumh mbouj dawz, seieiq gizsaed lumj “fanh miz rengzyinx” ityiengh mizyouq, lumjbaenz swzcangz caeuq fanhfaed, daihhaij caeuq raemx nei. Daj gizneix daeuj gejnaeuz, “Gveigangj seieiq” doiq gou daeuj gangj dwg gijmaz? Cigndaej yungh gij vah mizmingz Haijdwzgwzwj caeuq Hozwjdwzlinz daeuj lawh de “oknaj”? Youq gizneix gou mbouj siengj cigciep hawj ok dapanq, gou baenzneix naemj, cijaeu mwngz bae gvaq Gveigangj, mwngz doiq “seieiq bae douhyouq” haj cih saw neix, gag miz nyinhrox.

Gou baez daih’it bae Gveigangj dwg 1997 nienz 10 nyied, seizhaenx gou dwg Hozciz Si Duh’anh Yauzcuz Swciyen Gvangjbo Densi Giz boux gicej ndeu, lij mbouj rox Haijdwzgwzwj caeuq Hozwjdwzlinz, gou bae Gveigangj dwg aenvih yaek camgya aen vwnzyoz hozdung《Gvangjsih Vwnzyoz》guh haenx—— gij vwnzyoz hozdung seizhaenx, bingzciengz cungj senj youq gizdieg gingj gyaeu caemhcaiq yawjnaek vwnzva haenx. Gou codaeuz geiqndaej, Gveigangj mboujdan dwg gizdieg bouxseng’eiq comzyouq, caemhcaiq dwg gizdieg gyonjcomz yinzvwnz ndeu, 《Gvangjsih Vwnzyoz》senj youq Gveibingz youz dieg Gveigangj guenj haenx guh vwnzyoz hozdung dangyienz dwg swnh leix guhbaenz. Neix dwg gou baez daih’it camgya vwnzyoz hozdung, hix dwg gou baez daih’it daeuj daengz Gveibingz——Neix dwg gizdieg baeyouz mingzdaeuz yiengj goksad. Byasihsanh Gveibingz dwg goengq bya fuzgyau mizmingz ndeu, engq dwg mbaw mingzben Gveibingz ndeu. Seizhaenx, gou ngamq ndaej samcib bi lingz di, ngoenznaengz vih ciengx bak guhhong caemhcaiq ngamq dang daxboh, diuzroen vwnzyoz yiemzgek daeuj gangj caengz ndaej hwnjdin, ciep ndaej iucingj bae camgya hozdung, dangyienz gig angqyangz. Gou doiq baez vwnzyoz hozdung neix simmuengh dangqmaz, hix gig muengh bae Gveibingz raixcaix.

Daeuj daengz Gveibingz, youq aen binhgvanj laj dinbya Sihsanh, binhgvanj miz di yaez, hoeng aenvih depgyawj Byasihsanh, sangjswt、caemdingh, hawj vunz roxnyinh daengz Byasihsanh baenzneix ciuyinx vunz. Gwn caeuz le youq ndwi, gou boux vunz dog cimh riengz roen iq menhmenh byaij doxhwnj. Go faexgeq gwnz Byasihsanh angqcoux gou, gij rumz liengzseu angqcoux gou, gij sing saenzbaed angqcoux gou. Gou daj seiziq couh youq ndaw bya youq, bin gvaq haujlai byasang——Gaxgonq bin bya dwg vihliux ragwn, baebae dauqdauq cungj byaij vaiqvit, gig noix mbouj dwg viuhliux ganjroen cix byaij bae guhcaemz. Byasihsanh duenh roen ceiq baihnaj mbouj daih lingq, gou menhmenh byaij hwnjbae. Roen mbouj suenq gvangq, seizseiz miz vunz daj henzndang gou byaij gvaqbae, dwg gij vunz guhhong haenx dauqma, lij miz hekyouz diegrog. Mbouj daengz buenq diemj cung, ranz couh laep lo, Byasihsanh lumj aen dozraed laepamq hungloet ndeu, hawj vunz roxnyinh saenzmaed youh hungmbwk. Mbouj ndaej laebdaeb bin hwnjbae lo, gou dingz roengzdaeuj, fwt ngeux gyaeuj yawj dauq laeng, yawjraen buenq aen singz Gveibingz daeng ronghsag. Gou mbouj dwg sikhaek byaij roengz bya, cix dwg youq laj go faexgeq ndeu naengh roengzdaeuj, gwnz bya sing saenzbaed gig cingcuj, aen singz Gveibingz buenq singz daeng ronghlwenq haenx, go riuzhengz seiz mbouj seiz cienz daeuj. Mbiengj ndeu dwg bya fuzgyau mizmingz, mbiengj ndeu dwg ranz vunz daeng ronghgywg, cingqcaen hawj vunz ngeix mbouj liux mbouj cod: Henz rwz sing fuzgyau caeuq go riuzhengz gak miz gij yaemdiuh de, ndaw mwngz miz gou ndaw gou miz mwngz, seizneix ngeix hwnjdaeuj, neix gizsaed hamz miz gij seieiq noengznwd. Bauyungz、unqswnh, dwg gij yienghceij aen seiqgyaiq neix hab miz. Ngoenz daihngeih, gou riengz aen doihcaijfungh hung haenx hwnjbya, youq henz miuh gwnz bya “gouz” le yiengh doxgaiq iq ndeu: Ngamq dang daxboh, gou soengq dahlwg faenh huqlaex daih’it dwg duzvaiz aeu rin gaek baenz ndeu.

Baihnaj gangj gvaq, seieiq mbouj dwg hawghoengq, dwg lumj “fanh miz rengzyinx” nei, hawj Gveigangj miz seieiq, dangyienz dwg aen miuh gaeuqgeq ndaw luegbya, ramxdah fanfoed caeuq vunz Gveigangj gaenxguh hongnaz, mboujdan baenzneix, gij lizsij vwnzva gyaenanz engq miz gij seieiq laegcaem、noengznwd. Youq ndaw swhliu guenfueng hawj dou haenx, gou yawjraen seiq cih “yienh gaeuq singz moq”, baenzneix dinghvih caen habngamj lai lo. Gwnz lizsij miz cungj gangjfap ndeu, 2200 lai bi gonq, Cinzsijvangz dungjyiz Cungguek le, laebnda Lingjnanz sam yienh, yenfuj Gveilinz couh laeb youq Gveigangj; Sihhan seizgeiz gaijbaenz Yilinz Yen, Dangzcauz seiz gaij heuhguh Gvei Youh, Mingzcauz seiz gaij baenz Gvei Yen. Baezbaez gaij cohdieg, baihlaeng miz geijlai gojgaeq? 1988 nienz siu yienh gaij baenz si, heuhguh Gveigangj Si. “Gveigangj Gveigangj, gviq miz sokgangj”, guenfueng swhliu doiq gij coh Gveigangj gaijsiz doengsug rox ngaih, Dahsihgyangh ronz gvaq daengx si, gij roen haij ndaw dieg Gveigangj guenj haenx it bi seiq geiq ndaej doenghengz aen ruz 2000 dunh doxhwnj. Gij huq sokgangj ndaej haeujok、bi ndaej cauh ruz、bi aeu ruz daeh huq cungj ciemq Gvangjsih 50% doxhwnj. Youq Gveigangj, dandan cih “raemx” ndeu, couh cigndaej langhrengz dajcauh. “Miz rin daj dinbya gwnz dah baihgvaz vang loh youq ndaw dah, raemxlangh bonghfo……” Neix dwg Ciz Yazgwz youq ndaw saw《Youz Geiq Lueggaeuhung》de youz Gveigangj Lueggaeuhung seiz sij. Lueggaeuhung dwg lueg dah ceiq hung ceiq raez ndaw dieg Gvangjsih, vihmaz heuhguh “Lueggaeuhung”, guenfueng swhliu baenzneix gaisau: Cienzgangj ciuhgeq miz diuz gaeu hung lumj aendaeuj, hamj gvaq gwnz dah, gyangngoenz caem gyanghwnz fouz, hawj vunz banqraih gvaq dah, vihneix heuhguh Lueggaeuhung. 2024 nienz byaibi, gou caeuq gyoengq lauxsae baengzyoux naengh ruz gvaq Lueggaeuhung, gwnz dah caemrikrik, rumz dah cififi, mbouj raen miz “raemxlangh bonghfo”, neix dwg aenvih, gwnz Lueggaeuhung coih fai, lueg laeg miz huz bingz. Aen suijli gunghcwngz Lueggaeuhung coih fai, daeuj fuengz raemxrongz、hangzyin、fatdienh、diuhboiq raemx guhcawj……Vahsug naeuz, raemx dwg caiz, youq Gveigangj, baengh raemx guh ndaej hoenghhwd, linghvaih, dauqdaej dwg gijmaz “doxgaiq” ndaej dak hwnj seieiq? Daih’it dwg raemx: Raemx couh dwg seieiq.

Doengzyiengh, youq Gveigangj, bya caemh guh ndaej haemq ndei. Dandan dawz Gveigangj vwnzlij bumwnz baujhoh caeuq haifat bya daeuj gangj, cawzliux Gveibingz Byasihsanh gou ceiq caeux daengz haenx, Byabwzdisanh aen dieg baeyouz ngamq youq gwnz muengz okmingz haenx, baez daengz ngoenzgyaj hekyouz hix geujfoedfoed. Byabwzdisanh youq Gveigangj Si Bingznanz Yen Dabungz Cin, daj Gveigangj Si hwnj gauhsuz, hai ci song diemj cung. Bigonq byaibi, gou caeuq gyoengq lauxsae baengzyoux bin Byabwzdisanh. Roengz lanjceh, gyoengq byasang Bwzdisanh daengj youq dangqnaj, dou byaij gvaq lohcamx vunzbyaij riengz ngoengqbya bae soengswt——Naeuz byaij bae soengswt, dwg aenvih, gij mbaeklae hwnj bya mbouj lingq mbouj bingz, hawj mwngz bin bya ndaej roxnyinh rimhoz, youh mbouj hawj mwngz ngaebheiq fofo, daj mbiengjyaem daengz mbiengjyiengz, bangxdat sangvid, gofaex mwncup——Seizneix baihbaek senqsi nae hausaksak, hoeng Byabwzdisanh baihnamz cix gofaex heuswd, gou youh caiq baez roxnyinh daengz daswyenz cauh ok geizheih. Danqheiq liux, gou baenzneix ngeix: Bin Byabwzdisanh caeuq bin bya mizmingz gijwnq mbouj doxdoengz, bin bya mizmingz gijwnq, aenvih “gingj gyaeu maez vunz youq dingjbya gizyiemj” cix hawj mwngz byaij nanz youh baegnaiq; hoeng Byabwzdisanh, miz gij yungyiemj caeuq saenzgeiz caeuq doengh goengq bya mizmingz haenx doxdoengz, cix hawj mwngz cwxcaih、simdingh. Ngeix mbouj daengz lij ndaej baenzneix benz, caen dwg liuh mbouj daengz. Ndaej baenzneix gangj, Byabwzdisanh, dwg goengq bya doiq vunzraeuz yindung diemheiq ceiq ndei. Ngeix daengz gou baez daih’it bin Gveibingz Byasihsanh mbouj gaenj mbouj gip, daengz bin Byabwzdisanh caemh dwg mbouj gaenj mbouj gip, roxnyinh goengqbya caeuq goengqbya doxwngq youq byaibi 2024 saenzgeiz guhbaenz, neix nanzdauh mbouj dwg cungj seieiq ndeu bw?