Raq rumz ndeu ci daeuj, baenz duj baenz duj va’gviq loenq daengz gwnz mbaq gou.

Va’gviq doenghyupyeb, lumj- baenz miz sengmingh nei, lumjnaeuz cingq lwnhgangj gij vunz、gij saeh、 gij cingzngeih haenx.

Gou ndaejgeiq, daxgoeng hwetgaeuz. Dou gig noix dauqma lajmbanj yawj de, it bi cix dauqma baez song baez, hoeng, moix baez dauqma, gou couh cibfaen maqmuengh, maqmuengh ndaej raen go va’gviq gyanghongh, gij yiengh hai va rimrangh haenx.

Youh daengz seizcou lo. Gou caeuq daxboh hwnjroen baema lajmbanj, itloh doegdanh soegsoux, dauqdaej daengz ranz lo. Mboujcaengz haeuj bakdou, couh sup ndaej gij heiqrang va’gviq. Gou couh haidin cung haeuj gyanghongh bae, angqvauvau dwk cimyawj gij va’gviq gwnz go. Gij nditndat con gvaq nyefaex ciuq daengz gwnz naj gou, gij heiqrang va’gviq, biu haeuj ndaeng gou, gou ngahngwdngwd dwk sup ha sup…… Goeng gou riugoekgoek byaij gvaqdaeuj, yaeng’yaeng mboengj mbaq gou: “Gyoengqsou ma lo, dauq daengz couh ndei lo, dungxiek caengz? Goeng guh gau va’gviq ceiq ndeigwn haenx hawj mwngz gwn!”

Gou song da baez rongh, buet haeuj ranz baihndaw aeu aen daengq iq ndeu daeuj, lauxsaed dwk naengh daengz henz ndang daxgoeng.

Mwh daxgoeng dawz va’gviq dubsoiq caeuq gij mba haeuxcid doxgyaux, heiqrang fwt seiqcawq sanqhai.

Gij rang va’gviq neix hawj vunz yaek fiz bae.

Daxgoeng lumj roxyiuj gou sim siengj gijmaz: Youq ndawsingz baenzlawz hix mbouj ndaej gwn gij gau va’gviq yienghneix rang. Dax- goeng doq cai mbahaeux doq naeuz: “Daxboh mwngz seiziq caeuq mwngz ityiengh, caemh haengj gwn gij gau va’gviq gou guh. Mboujgvaq de seizhaenx manz lai, seiz gou guhhong de cungjdwg youq henz napnap gizneix, faenjfaenj gizhaenx……Doeklaeng, caemh hag ndaej gij dinfwngz gou lo.”

Dingqnyi daxgoeng yienghneix gangj, gou caemh simdoengh lo, couh siengj roengzfwngz sawqguh. Couh yienghneix, gou couh vazdawz gaemz mbafaenj haeuxcid ndeu cuengq daengz gwnz va’gviq bae, aiya, vaih lo! Gaemz mba cai nyaz lo! Baez simgip dinfwngz engqgya luenhloeploep. Gou ganjgip heuh daxboh gvaqdaeuj, dawz gij mba faenj nyaznywd haenx cungj vut hawj daxboh. Daxboh liuq gou da ndeu le riu lo, vid genbuh haifwngz couh cai gaemz mba. Cai dwk cai dwk, gou roxnyinh daengx hongh cungj roenx gij rang va’gviq.

Gou naengh youq baihhenz, yawj gij yiengh daxgoeng caeuq daxboh boenqfoedfoed haenx, gag boiqfug gyoengqde gapgoeng caen doxhab. Daxgoeng caeuq daxboh lumj dwg ngeix daengz gij seizgan nanzndaej doxbuenx neix, gangjgangj riuriu bak mbouj dingz.

Gau va’gviq cai ndei le, daxgoeng dawz roengz aencaengq bae naengj, sam boux dou couh naengh youq laj go va’gviq cajdeq. Rumzhaemh cififi, daxgoeng yawj bae coh aen daengngoenz gizgyae couh yaek doekcongh haenx, yaeng’yaeng dwk haibak naeuz: “Lwg ha, sou yawj, doengngoenz yaek doek roengzbae lo. Gou cungj ngeix, miz saek ngoenz, gou hix lumj de yienghneix doek roengzbae, hoeng dauq mbouj rox caiq swnghwnj lo. Gou bi’ndwen geq lo, lij ndaej gyaeu geij bi dem?” De dingz yaep he: “Gou cungj muengh, muengh gij saedceij mwngz caeuq dahniq dauqma yawj gou haenx, sou bi daengz haemh couh dauq ranz baez song baez, gou cungj raen mbouj gouq ya!”

Gou cimyawj gij va’gviq biuloenq haenx, mbouj oksing.

Gou rox daxgoeng dwg gangj hawj doxboh dingq.

Daxboh nyaenx mbouj ndaej raemxda, mwh raemxda lae roengz seizhaenx, gou lumjnaeuz mingzbeg lo. Gij va’gviq rim go neix geiq rim gij caencingz naekna daxgoeng caeuq daxboh, cungjdwg mbaet hix mbaet mbouj liux、beng hix beng mbouj goenq. Gij gyaez haenx gek cien bya fanh raemx cungjaeu doxbungz doxdaemj.

Gau va’gviq naengj baenz lo, daxboh doep mbaq daxgoeng, sing unq naeuz: “Gou itdingh ciengz dauq ranz yawjyawj.”

“Ciengz dauq ranz yawjyawj, yawjyawj gij yiengh mwngz.”Gou youq ndawsim gag naemj.

(Moz Hanznih raiz

Vangz Caijsen hoiz)