Fog raemxheu ndeu, moux nazbiz ndeu, gij cingzngeih ranzmbanj gaenq lumj singfwen nei heux youq henzrwz. Go’nywj gofaex hoenghhwdhwd, duzbid duzroeg heuhceuceu. Ndaw suen iq, geij cik namhhenj, go byaekhaemz dog did youq gizhaenx, heuswdswd, yinx gou dauqngeix gij saeh gaxgonq……

Seiz lwgnyez, baenz suen saekheu lij caengz loenq liux, seizhah caet nyied couh mbouj yiu cix daengz, gij damsim guh’angq gou hix riengz nywj faex did hoenghhwd. Youq rog buenq gyaengh ciengznamh, yo miz haujlai yinxdaeuz. Mbwn ciemhciemh buemx, gou cij ngaizngednged ma ranz. Gou yamq haeuj ranzdajcawj, youq ndaw heiqfwi ngeungeu haenx, myaegraen buenq bat byaekhaemz, heumyigmyig lumj youz, dajcang hawj aen ranzdajcawj engq miz rengz- hoengh. Daxbuz cingq song fwngz riengjret mbit byaek swiq byaek, caenh raen daxbuz fajfwngz baez yaengx, gij sing faeg byaek haenx con haeuj rwz gou daeuj. Byaekhaemz gvailolo ninz youq gwnz heng, nyaemhcaih fagcax ronq de. Riengz roengzdaeuj, ciep raemx, dwk feiz, cuengq byaek, daxbuz fwngz mbouj dingz mbouj duenh, ndang baenqlulu, youh dwk gyu dwk youz, yaep he rek dang byaekhaemz ndeu couh ok rek lo. Gij byaekhaemz yienznaeuz cawj cug lo, dauqlij heuswd, lumjbaenz baez mbouj siujsim couh daj ndaw vanj ndonjdeuz.

Heiqfwi gyuemluemx, gij heiqhaemz haenx con haeuj ndaw ndaeng, youq ndaw uk gou banhsanq. “Haemz!” Gou ngauzgyaeuj degdeg. Daxbuz riunyumnyum: “Lai mupmup couh habhoz lo.” Gou najbyak nyaeuqyatyat. Mbouj geij nanz, caiq baez sawq mup, caenh mup raen gij haemz ndawde lai miz di hom ndeu. “Cimzcimz lu.” Muenghyawj najriu daxbuz, gou siujsim riri yaeuj aenvanj hwnj, ndoet gaemz ndeu. Ngamq haeuj bak, caenh roxnyinh heiqhaemz cog hoz, ndwnj mbouj roengzbae. “Bi! Haemz dai lo! Neix baenzlawz gwn?” “Lai cimzcimz couh roxyiuj gij feihdauh de lo.” Gij najnyaeuq daxbuz lumj luzraemx, fubfed youq gwnz naj huzswnh de. Gou caiq baez yaeuj vanj, menhmenh cimzgwn moix ndik feihdauh, raq homsisi he lumj raemxsaw nei roenx haeuj ndaw sim bae, gij angqyangz hix baez di baez di youq ndaw sim langhhai. Caiq yaeuj vanj, gaemz dog ndoet liux, gij homfwd haenx vanzlij youq ndaw hoz gvaengxgvax, haujlai nanz mbouj sanq.

“Gij dang byaekhaemz, couh yaekaeu sijsaeq cimzfeih, ngamq haeujbak caen dwg haemz, cijmiz hoizfeih caeuq dajcimz, cijndaej cimz ok gij hom de daeuj.” Gawq vah neix caeuq gij feihdauh vanj byaekhaemz haenx itheij gaek youq ndaw sim gou. Hoizfeih, baenzneix gyaenanz raezrangh, gij hom de yaemq haeuj sim vunz bae, hawj raeuz saedceij bienq ndaej engq ndei. Moix baez yaepyit cungj miz gij eiqsei mbouj doengzyiengh; moix cungj feihdauh cungj hawj vunz miz gak cungj dauqngeix. Caenh’aeu mwngz ra ndaej raen de.

Aen suen iq haenx, yienznaeuz geiqciet gvaq le gingjsaek hix bienq yiengh, hoeng go byaekhaemz haenx gij feihdauh de lij ciuqyiengh hawj raeuz roxnyinh miz seiqsei. Gij rengzhoengh de ciengxlwenx yaenq youq ndaw sim.

(Bwngz Yiyenz raiz Yinj Fuzgen hoiz)