Vujsenh Yen Dungzlingj Cin Mbanjsaihingh baihlaeng miz goengq bya ndeu, heuhguh Byayahmui, gwnz Byayahmui miz aen conghgamj ndeu, heuhguh Gamjyahmui. Aen gamj neix gvangq lumj aen lijdangz, geij bak vunz naengh youq ndawde hix mbouj ndaet. Baihlaeng Byayahmui, lumj duz mui ndeu cingq naengh youq gwnz daengqeij ciuq gingq dajcang.

Dingqgangj, Gamjyahmui miz aen goj geizheih ndeu.

Cienznaeuz, gaxgonq, Sanhdungh miz boux daegmbauq he heuhguh Cinz Cunghdai, youz daengz Mbanj- saihingh, bungz raen duz manaez hung dungx iek ndeu, de baez raen Cinz Cunghdai, sikhaek coemj hwnjbae. Cinz Cunghdai nyeux gyaeuj couh buet. Seiz de buet daengz bakgamj, couh deng duzmanaez hung gyaep dawz lo, manaez hung haeb dawz aen hoz de, gamz de haeuj ndaw gamj bae.

Hoeng, Cinz Cunghdai mbouj- caengz ngaiz gwn bae. Caemhcaiq, haet laeng de lij guh aen fangzhwnzloq ndeu, de loq raen bonjfaenh bienqbaenz boux lwgnding ndeu, cingq ninz youq ndaw rungj daxmeh, ndoet gwn gij raemxcij daxmeh diemz haenx. Miz raq rumz ndeu ci gvaqdaeuj, de daengx ndang saenzdedded, singj lo. De cengq da yawj seiz, “ ya…… ya…… ya……” daih hemq hwnjdaeuj.

Yienzlaiz, de fatyienh swhgeij cingq ninz youq ndaw rungj duzmui, cingq ndoet gwn gij cij de, duzmui aiq miz haj bak gaen, song fwngz got dwk de, lumj daxmeh ndiep lwg nei hawj daeglwg de gueng cij. Duzmui ndaem raen de ndiu lo, riunyumnyum cuengq de roengz le, yienzhaeuh buen ngauq rinloet ndeu daeuj, saek dai aen bak- gamj.

Aen dou deuzmingh deng saek, Cinz Cunghdai sim naeuz:“Dai lo, ngamq deuz ok bak manaez, seizneix youh baenz gij gwn ndei duzmui hung lo.

Hoeng, de engq doeksaet dwg, duzmui mboujdan mbouj gwn de, lij daj baihlaeng rag ok duzmanaez dem, Cinz Cunghdai baez yawj couh rox, duz mabag neix dwg duz ngoenzlwenz yaek gwn de haenx. Mboujgvaq, mbouj rox vihmaz, de caeux couh ngaiz moeb dai lo. De cingq doeksaet dwk bak aj lumj cih “o” hung ndeu, duz muimeh ndaem sik roengz song diuz ga, diuz ndeu ndenq hawj de, lingh diuz cix bonjfaenh gwn hwnjdaeuj.

Hoeng, Cinz Cunghdai mbouj gamj gwn, diuz ga manaez lwedraengraeng, singsoepsoep, de gwn mbouj roengz. Caiqlij, de siengj, mui ndaem gwn liux manaez couh gwn bonjfaenh lo, baenzlawz lij miz simcingz gwn doxgaiq dem.

Mehmui dangyienz mbouj rox Cinz Cunghdai siengj gijmaz, de gwn diuz ga manaez sat le, cim Cinz Cunghdai boux daengx ndang saenzdedded neix yawj haujlai nanz, lumjnaeuz siengj gangj gijmaz cix itcig gangj mbouj okdaeuj.

Banhaemh, mehmui youh sik le song diuz ga manaez, lumj gyanghaet nei, diuz ndeu ndenq hawj Cinz Cunghdai, diuz ndeu de lienz bwn daiq lwed gwn roengz dungx bae.

Cinz Cunghdai siengj mbouj gwn, hoeng aen dungx de cix heuh hwnjdaeuj. Mwhneix, de hix yawj okdaeuj lo, duz muimeh ndaem camhseiz lij mbouj siengj gwn de, “lauheiq, de siengj ciengx biz le caiq gwn, lauheiq, de siengj caj bouxhek daeuj le caiq caez gwn. Mboujguenj de, gou dienz dungx imq gonq caiq gangj.” Cinz Cunghdai yienghneix siengj, de soucomz gij fwnz ndaw gamj, mbon rin okdaeuj, diemj dawz feiz le, dawz song diuz ga manaez neix gauj cug le, diuz ndeu ndenq hawj duzmui, diuz ndeu gag gwn.

Mehmui ndaem coengzlaiz mboujcaengz gwn gvaq gij noh manaez baenzneix rang, ndigah, gwn imq le de couh caeuq Cinz Cunghdai yiyi yaya doxgangj. Daj ndaw vah duzmui, Cinz Cunghdai roxnyinh, aen gamj neix couh dwg rongz mui meh ndaem. Ngoenzlwenz de dauqma seiz, manaez hung cingq youq ndaw congh yaek gwn Cinz Cunghdai. Duzmui ndaem dangyienz mbouj hawj duzmanaez ciemq aen congh de, de sikhaek cung hwnjbae caeuq manaez doxhoenx, ginggvaq buekmingh haenqrem, duz- manaez deng de moeb dai lo. Hoeng mwhneix, Cinz Cunghdai gaenq mbouj miz heiq lo, mbouj miz banhfap, duzmui cijndei oet bakcij haeuj ndaw bak de bae. Cinz Cunghdai ndoet gij cij de le cij dauqcungz lix gvaqdaeuj.

Mehmui ndaem gangj sat, couh aeu got Cinz Cunghdai ninz.（1）