Bonjbauq siusik(gicej Veiz Yingjcinh) Mboengqneix, “minzcuz dijbauj cien bi ndaejgeiq——langhbaij vwnzva dangjanq Liuz Sanhcej” youq Nanzningz guh, hozdung dwg Swcigih Dangjan’gvanj、Nanzningz Si Guekgya Dangjan’gvanj lienzhab cawjbanh. Ciuq cam rox, neix dwg Gvangjsih cwngfuj caengzmienh baez nduj coengh Liuz Sanhcej laebguh vwnzva dangjanq caemhcaiq langhbaij okdaeuj.

Baez langhbaij neix yungh dangjanq langhbaij Liuz Sanhcej guhlawz daj gij cienznaeuz ndawbiengz, bienqbaenz gij yiengh bouxvunz caensaed, caiq hwngfat baenz aen binjbaiz vwnzva gak cuz bouxminz haengjgyaez, cungfaen langhbaij gij saehbaenz mbaw mingzben vwnzva Liuz Sanhcej liggaiq Swcigih Dangjveij、Cwngfuj roengzsim ganq haenx.

Baez langhbaij neix faen ding hainduj、Liuz Sanhcej ndaw vwnzyen sijliu、Cungguek moq laebbaenz le Liuz Sanhcej vwnzva hwngfat、gaijgwz hailangh le hwngfat mwnhoengh Liuz Sanhcej vwnzva、seizdaih moq cienzswnj caeuq cauhmoq Liuz Sanhcej vwnzva 5 aen banjgvai, doenggvaq 300 lai faenh dangjanq vwnzyen dijbauj, langhbaij Liuz Sanhcej vwnzva goekgaen、hwngfat caeuq mwnhoengh, aeu neix gangj ndei gij gojgaeq Cungguek goekrag youq Gvangjsih haenx, gyaak Cunghvaz vwnzva gagsaenq, coengh fugsaeh Gvangjsih hwnqguh aen gih guhyiengh couqmaenh gij eiqsik Cunghvaz Minzcuz ranz vunz ndeu ok gij rengz dangjanq.

Ciuq gaisau, baez langhbaij neix doxgaiq baugvat heiqbonj fwngz cau、sawgeq vwnzyen、mbawsiengq、yingjsieng swhliu doengh gij neix, ndawde miz ca mbouj lai 100 gienh Liuz Sanhcej vwnzva dangjanq dwg baez nduj oknaj. Ndaw ding gaiq doxgaiq ceiq geq, dwg cek saw 《Sawcuenh Gaeuq》 bi 1914 Sanghvu Yinsuhgvanj okbanj haenx, liz seizneix gaenq miz 110 lai bi lizsij. Lijmiz mbangj di doxgaiq hix dijbauj, lumjbaenz heiqcaijdiu 《Liuz Sanhcej》 heiqbonj fueng’anq daih’it nyuenzgauj; bi 1960 mwh heiqgofoux 《Liuz Sanhcej》 haeuj Ging yienjok, mbawsiengq bouxyienj heiq yienj sat caeuq Cuh Dwz、Vuhlanzfuh、Dwng Yingjcauh doengh gij vunz neix youq Cunghnanzhaij Vaizyinzdangz hab’ingj; gij vwnzgen bi 1963 Vwnzvabu baefuk doengzeiq coh Yindunizsihya Vazgyauz gunghawj 《Liuz Sanhcej》 mizgven swhliu daengj, ciuyinx haujlai vunz daeuj yawj.