Bonjbauq siusik(gicej Cau Dwzfeih) Mboengqneix, gicej cam Swcigih Gyauyuzdingh rox, Gvangjsih yaek coh daengx gih ciusou bujdungh gauhcungh haidin seiq bi bwnjgoh deihfueng swhfanswngh mienx cienz 1571 boux. Ciuq gvidingh, boux bauqgauj aeu dwg vunz Gvangjsih bujdungh gauhcungh bizyez, mbouj hanh dieg, cinj hamj si、yienh(si、gih) bauqgauj; ndawde, swhfanswngh dinghyiengq mwh youq hagdangz doegsaw mienx cienzhag, mienx cienzdozninz, caemhcaiq ndaej cienz boujdiep gwndaenj dem.

Ciuq ciuseng dajveh, hagdangz son’gyauq miz 10 aen, faenbied dwg Gvangjsih Swhfan Dayoz、Gvangjsih Minzcuz Dayoz、Nanzningz Swhfan Dayoz、Bwzbuvanh Dayoz、Yilinz Swhfan Yozyen、Bwzswz Yozyen、Hocouh Yozyen、Gvangjsih Minzcuz Swhfan Yozyen、Gvangjsih Gohgi Swhfan Yozyen、Gveilinz Swhfan Yozyen. Ciuseng ciennieb cawz siujyoz gyauyuz、siujyoz gyauyuz（Sawcuengh Vahcuengh fuengyiengq） 2 aen ciennieb, suyoz caeuq wngqyungh suyoz、Yinghyij、vuzlijyoz、swnghvuz gohyoz（rox swnghvuz gisuz）、dilij gohyoz、vayoz、yinhyozyoz、meijsuzyoz、dijyuz gyauyuz、sinhlijyoz（rox wngqyungh sinhlijyoz）、gohyoz gyauyuz daengj ciennieb cungj faen hagduenh dinghyiengq son- gyauq.

Diuzgen dwg gaujseng aeu gagnyienh bauqgauj aen ciennieb dinghyiengq son’gyauq guh lauxsae, caiqlij baujcingq bizyez le ei bae dinghyiengq yienh（si、gih）, daengz dinghyiengq yienh（si、gih） youwzyenz rox hagdangz yivu gyauyuz lajmbanj rox gauhcungh hezyi iekdingh haenx guh lauxsae ceiq noix 6 bi. Linghvaih, lij aeu camgya Gvangjsih bi 2025 bujdungh gauhgauj dungjgauj, gauhgauj faensoq daengz diuzsienq faensoq ceiq daemq bi 2025 Gvangjsih bujdungh gauhyau ciuseng loegaeu doxwngq buekbaez haenx; boux gaujseng bauqgauj yinhyoz、meijsuz、dijyuz gauhcungh haidin bwnjgoh ciennieb, aeu camgya Gvangjsih bujdungh gauhyau ciuseng yisuz dungjgauj doiqwngq goloih gaujsi rox dijyuz dungjgauj, caiqlij gaujseng gauhgauj faensoq caeuq yisuz dungjgauj rox dijyuz dungjgauj cingzcik cungj daengz diuzsienq faensoq ceiq daemq loegaeu bi 2025 doxwngq loihbied bwnjgoh buekbaez haenx; caeuq ciennieb wnq mbouj doengz, boux gaujseng bauqgauj siujyoz gyauyuz（Sawcuengh Vahcuengh fuengyiengq） ciennieb aeu ginggvaq dangqnaj gaujsi, caemhcaiq aeu rox gangj Vahcuengh （baugvat gak dieg vahdeihfueng Vahcuengh）.

Ciuq gvidingh, swhfanswngh dinghyiengq ciuq bujdungh gaudaengj hagdangz yozciz guenjleix banhfap guenjleix, bi daihngeih doeg sat, youz aen hagdangz gaujhaed swhfanswngh dinghyiengq, boux gaujhaed mbouj habgek siu gij swhgwz doeg ciennieb swhfanswngh dinghyiengq bae; boux gaujseng bauqdoeg ciennieb dinghyiengq son’gyauq ndaej loegaeu le, mbouj ndaej doiqdangj, mbouj ndaej cienjhag, mbouj ndaej cienj ciennieb, mboujnex bihaenx mbouj caiq loegaeu; boux hagseng doeg bizyez aeundaej mbawcingq bizyez bujdungh gaudaengj hagdangz caeuq mbawcingq miz swhgwz guh lauxsae, bae hagdangz hwnjdangz le, mizgven gihgou benhci、yinzliz swhyenz sevei baujcang daengj bumwnz ciuq gvidingh banh mizgven loegyungh soujsuz.