Dingqnaeuz, Gamjganjmajdung gvangq hajcib lai mij, sang ngeihcib lai mij, gizhaenx gyaeuj baihlaj guh fazdencan le, raemxdah swnghwnj, aen gamj seizneix cij raen miz geij mij sang cib lai mij gvangq lo, aen saz daeuj daengz bakgamj, couh deng baenqgyaeuj dauqlaeng.

Aen saz dou yaek bae Cingzyinzvanh, youq bakgamj Gamjganjmajdung baenq baez van hung ndeu, youq gyang dah langhfwdfwd haenx yaeng’yaeng vad baenaj. Youq gwnz saz, sing fwen gaen raemx foebfeb, yaepseiz biu hwnj mbwn bae, yaepseiz caem daengz najraemx. Hoengheiq sangjswtswt, nyinh sim nyinh bwt. Raemxdah heuauau, dingq mbouj nyi miz sing wnq. Gij bya song haenz Dahraemxhoengz goengq rangh goengq raezrwdrwd, youh hung youh soem; ndaw Dahraemxhoengz, raemx foebfeb mbaepmbaep, lae bae fwenfwen; gwnz dah bingzcwtcwt haenx mok hau biu daeuj, seiz raen seiz mbouj, mbwn heu gvangqlangh, gyaeundei dangqmaz.

Aen saz yaeng’yaeng hai haeuj aen van Cingzyinzvanh, ndaw van raemx bingzcwtcwt, sawdik heuneu, ruzdwkbya youq gyang dah yaeng’yaeng youz, raemx foebfeb loq rongh loq laep. Bya heux ndaw raemx, fwj caem daej dah. Gwnz haenzdah baihswix, goleux hai va, hoengzfwg lumj feiz. Song haenzdah nya heuswdswd, faex loegauau, bya raemx doxgyaux, dwg fuk doz vunzraeuz nanz veh okdaeuj ndeu. Ga giuzvenj ndeu vang gvaq gwnz dah, bouxyouz youq gwnz giuz baebae dauqdauq, yaepseiz sing riu goksasa, yaepseiz sing fwen rwenzrwdrwd, dwg fuk doz sing vunz sing raemx doxgyaux roeg heuh va rang ndeu.

Dingqnaeuz, gadah Dahcuhgyangh daj Yinznanz Canhyiz ginggvaq Yinznanz Gveicouh lae haeuj Gvangjsih, ngutngut ngeujngeuj lae daengz Dava Gungconh Yangh gizneix, sawqmwh bienqbaenz aen dah gvangq ndeu, doeng sae gvangq song sam cien mij, namz baek gvangq sam seiq bak mij, baenz gyaengh dah youh raez youh gvangq ndeu, vunz ndwn youq gizsang, daengx da dwg gadah mbwn caeuq raemx doxrangh ndeu.

Aen van Gungconh raemx laeg lae gip, doengxngoenz bouxsai yaek ok dah bae dwkbya, mehmbwk cungj daengz biendah daeuj soengq, ndwn biendah muengh bouxvunz ndawsim bingzan doxdauq, doeklaeng vunz couh heuh aen van neix guh Cingzyinzvanh. Miz fwen naeuz:

Daeuj daengz Cingzyinzvanh,

Simfanz gaen rumz bae,

Yawj bae gyawj bae gyae,

Gizgiz cungj maez vunz.

Banhaemh laeglemx daeuj daengz, baenz raq baenz raq rumzhaemh cidoengh gova gofaex Mbanjsanggiuz, ndaw mbanj roen seuqfit caemrik haenx baenz bang baenz bang bouxgeq doxhanh daeuj youzbyaij, miz gangj miz riu. Giz daeng ronghsaksak haenx, bouxmbanj mizmbangj doxcomz eu fwen, mizmbangj itheij diuq foux, angqangq yangzyangz.

Banhaemh Mbanjsanggiuz daengndongq bitbit, gij ranz youq gak siengq gak yiengh haenx, gwnzdingj lajlaeuz, saek daeng myab hoengz myab henj, lumj gij ndaundeiq baeyouz gwnzmbwn, loq raen loq mbouj, lumj raemxgim lae doengh, daeq hwnj daeq roengz. Baenz daiz baenz daiz haeux laeuj hawj vunz baez yawj couh myaiz yawh okdaeuj, mbouj iek hix naemj gwn. Bouxcawj ndatsim dwk ndenq noh gingq laeuj, caengz gwn couh roxnyinh sim raeujrubrub.

Beixnuengx daeuj daengz neix,

Caen vuenheij lailai,

Mbouj miz maz cauhdai,

Aeu laeuj nai baedauq.

Gingq cenj laeuj daih’it,

Gikcingz naek baenz rin,

Raeuz beixnuengx miz sim,

Cingzngeih rim caiq roenx.

Gingq cenj laeuj daihngeih,

Dou dauhleix mbouj raez,

Laeuj neix laeuj saeqmaex(细米),

Ndawde cingzngeih naek.

Gingq cenj laeuj daihsam,

Laeuj youh van youh get，

Caeuq beixnuengx doengz yet,

Gwn diet(laemx) cij miz sim.

Song fwngz gaem cenj laeuj,

Lumj aen gyaeuj duzlungz,

Gingq cenj laeuj hawj mwngz,

Gwn roengzbae caiq gangj.

Eu fwen buenx gwn laeuj,

Raeuj aen sim raeuz caez,

Gingq daengz ndoet roengzbae,

Ciengx ndangdaej beixnuengx.

Singfwen unqngaeungaeu hopheux gvaq gyangdaiz, bouxboux gwn angq sim van, raeuz youq ndaw gangj riu gangj angq neix, caen mbouj naemj liz bae.

Bya ndei raemx ndei Sanggiuz ndei,

Ndaw mbanj gizgiz meiz(miz) fwen langh,

Gwnzbya lajlueg gaeq baenz bang,

Ndaw daemz gyangdah bya gungq biz.

Bya ndei raemx ndei Sanggiuz ndei,

Seiqgeiq lumj cin hai bak va,

Lwgmbauq daegdaeg maengh lumj bya,

Lwgsau dahdah lumj enq gvai.

Bya ndei raemx ndei Sanggiuz ndei,

Gingj ndei gwn ndei hawj vunz siengj,

Bya gyaeu raemx gyaeu riuz daengx biengz,

Hek daeuj daengz neix mbouj senjdin.

Mbanjsanggiuz youq laj bya hung rungx, youq ndaw raemxdah nyinh, yienghyiengh guh ndaej hwngqfwgfwg, gizgiz rimroenx gyaeundei, cingq lumj daihsam daihseiq ciet souj go 《Gou Youq Sanggiuz Deq Mwngz》 ciengq haenx.

“Baengzyoux a baengzyoux gou deq mwngz,

Gyoengq lwgsau Sanggiuz unqswnh youh saundei,

Miz yienz cien leix caeuq mwngz caiq doxraen,

Gingjsaek maezvunz raeuz gangjriu guh’angq.

Baengzyoux a baengzyoux gou deq mwngz,

Gyoengq lwgmbauq Sanggiuz maenh’ak youh simsoh,

Laeujhaeux Byasanhbauj mbouj gwn fiz mbouj youq,

Cukhoh baengzyoux ndangcangq ndaej gyaeu.”

Gingjsaek Sanggiuz yawj mbouj gaeuq, gojgaeq Sanggiuz dingq mbouj caez, beixnuengx Sanggiuz cingz mbouj lumz, gou itdingh daeuj youz Sanggiuz baezngeih, cin hah cou doeng, daeuj cimyawj gij geiqciet Sanggiuz gingjsaek mbouj doengz.

Mwngz hix daeuj ba, gou youq Sanggiuz deq mwngz.

（2 sat）