Gaenh geij bi neix, Vanzgyangh Mauznanzcuz Swciyen haeujlaeg saedhengz aen canloz “vunzcaiz giengz yienh”, hopheux beizyangj vunzcaiz bouxcoz, laebhwnj aen vunqsik beizyangj “sam yiengh gap baenz aen” gihcwngz donlen、 gietdoiq bang son、 cwngcwz baujcang, doidoengh vunzcaiz bouxcoz youq gihcwngz majhung baenz caiz, vih aen yienh engq ndei hwngfat dwk haeuj rengz cozoiq.

Genhciz aeu gihcwngz dangguh aen cindi youqgaenj beizyangj vunzcaiz bouxcoz, cingsim genj baij 21 boux ganbu bouxcoz maenhndei daengz aen mbanj(segih) youqgaenj dang boux gunghcoz duiyenz capmbanj、 boux bangfwngz cunhcihsuh, cujciz ganbu bouxcoz camgya hong cungdenj cwngdieg ceksenj、 diuzhuz ngaekngeu、 ceihleix reihnaz daengj, mwh caen guh lienh bonjsaeh、 dem caizganq, saedyienh saedhengz donlen caeuq naengzlig daezswng giethab ndei.

Cungfaen leihyungh aen seizgei daemxcengj “cujdonzsiz”, haeujlaeg saedhengz “cinglamz gunghcwngz”, cauhmoq doihengz vunqsik beizyangj “sueng daujswh cidu”. Youq gyauyuz lingjyiz, 56 doiq saefouh lwgsae doenggvaq sonhag yenzdauj、 goq guhyiengh daengj fuengsik, daezswng conhyez dinfwngz lauxsae bouxcoz; youq yihliuz lingjyiz, baengh conhgyah soujsuz guhyiengh sonhag、 lwnhgangj lijlun caeuq daujlun gij bingh ngeiznanz, mizyauq daezswng dinfwngz linzcangz canghyw bouxcoz. Youq nungzyez lingjyiz, guekgya gohgi donzdaegbaij conhgyah yungh gij fuengsik “gwnz muengx + yienhsaed”“lijlun beizyin + gyangnaz cijdauj” dox giethab, gungganq “bouxguhnaz moq” miz dinfwngz nungzyez 20 lai boux, daiqdoengh 9 hangh binjcungj moq dinfwngz moq doeknamh wngqyungh.

Doengzseiz, vih louz vunzcaiz bouxcoz roengzdaeuj, aen yienh neix mboujduenh laeb ndei laeb caez dijhi cwngcwz baujcang, lozsiz vunzcaiz boujdiep、 ranzyouq baujcang daengj, siucawz gij youheiq gwndaenj. Guh hozdung gap baengzyoux, daphwnq bingzdaiz baedauq muenxcuk gij cingzgamj aeuyungh vunzcaiz bouxcoz，hawj gyoengqde roxnyinh gvisug. 2024 nienz daengx yienh dem moq vunzcaiz bouxcoz(18 — 35 bi) 469 vunz, doengzbeij demlai 30.27%, ndawde 81 boux bouxcoz gagnaeuz baema ranzmbanj doekrag gihcwngz, vih lajmbanj saenqhwng dwk haeuj rengzhoengh moq.

(Danz Cuibuj/谭翠朴 Yi Mungsenh/玉孟先)