原文：

春天的时候我祖母还坐在后门空地上包粽子呢。有一只洗澡的大木盆装满了清水, 浸泡着刚从湖边苇地里劈下的青粽叶, 我家屋前屋后都是那股凉凉的清香味。我走过去把手伸进木盆, 挨祖母骂了, 她不让人把码齐的青粽叶搞乱了。我们白羊湖一带的人都包“小脚粽”, 大概算世界上最好看最好吃的粽子。祖母把雪白的糯米盛在四张粽叶里, 窝成一只小脚的形状来, 塞紧包好, 扎上红红绿绿的花线。有一只粽子挂到我的脖子上了, 我低头朝那只粽子左看右看, 发现祖母包的粽子一年比一年大, 挂着香喷喷、沉甸甸的。祖母挎着竹篮走过横七竖八的村弄, 去五里外的白羊湖边采青粽叶。我跟着她。我们站在湖边的黄沙地上望着四处可见的苇丛, 然后赤脚涉过一片浅水, 走进最南面那丛芦苇里。祖母喜欢这里的粽叶。

——苏童《祖母的季节》（节选）

译文：

1

Seizcin ndit raeujremj,

Naiq naengh yienh laeng ranz;

Suek faengx baen lwglan,

Sim van gvaq gwn dangz.

Baihnaj bunz faex hung,

Ndawde raemx cang rim;

Rongfaengx ndaw haenx cimq,

Ngaeuz fwjhau mbin miengh.

Naiq ngamq daj henzhuz,

Gvej ndaej bog rongfaengx;

Ceh youq ndaw bunz raemx,

Suek haeuxfaengx yaek yungh.

Rumzliengz cififi,

Heiq va rang ceiq faengz;

Ci haeuj bak haeuj ndaeng,

Hom daengz uk daengz ngviz.

Gou byaij haeuj laeng yienh,

Ndenq fwngz haeuj bunz raemx;

Lwgfwngh deng naiq raen,

Deng ndaq gaenj sup fwngz.

Naiq ndi hawj gou gauz,

Cix lau rong fan swenz;

De bouxlaux gaenjmuengz,

Luenh liux youh lauqhong.

Biengz Bwzyangzhuz raeuz,

Gyaez bau “siujgyozcung”；

Faengx gyang moj lumj gung,

Raeng lumj beq hengh ga.

Faengx suek ndaej ndeingonz,

Hai daeuj homringring;

Haeuj bak ndi fug ndwnj,

Gwn liux lau ndi miz.

Naiq dawz haeuxcid daeuj,

Daek haeuj ndaw rongfaengx;

Noh liuh coq cungqgyang,

Baeb sam fueng daeuj coh.

Caeux gwnz fwngz bongxbongx,

Dog haeux cungqgyang moj;

Ngu rong ma doxcoh,

Cag hoengzloeg soh heux.

Naiq gip aen faengx ndeu,

Venj haeuj gwnz hoz gou;

Goemzgyaeuj swix gvaz louq (lawq),

Naiq gou caen lighaih.

Naiq le suek gij faengx,

Aen’aen caen baenzyiengh;

Bi beij bi hung mengx,

Homfwt engq naekcaem.

Cin daengz daxnaiq gou,

Aen giuq venj gwnz mbaq;

Byaij ngutngeuj loh haz,

Gvaq mbanjbya goxlueg.

Byaij haj leix lai loh,

Bae coh Bwzyangzhuz;

Seiqcawq ngonzgyu’gyu,

Mbiengj huz haenx rongfaengx.

Naiq gonq gou gaenlaeng,

Lohdin gaenq gvaq feuz;

Rongfaengx cazcaz heu,

Ceuq（daet） caz lawz cix hab.

Byaij haeuj mbiengj baihnamz,

Raen go’em dieg haenx;

It bi seizcin daengz,

Naiq ceiq faengz ma mbaet.

(都安瑶族自治县：蓝国武/Lanz Gozvuj)

2

Mwh seizcin daxbuz gou lij naengh youq dieg hoengq doulaeng duk faengx ne. Miz aen batfaex hung swiq ndang ndeu coux rim raemxsaw, cimq gij rongfaengx heu ngamq daj henzhuz ndaw dieg go’ngox mbek roengzdaeuj haenx, dangqnaj ranz baihlaeng ranz gou cungj dwg gij heiq rangringring liengzseuseu de. Gou byaij gvaqbae iet fwngz roengz ndaw batfaex bae, deng daxbuz ndaq lo, de mbouj hawj vunz gaujluenh gij rongfaengx daeb ndei haenx. Gij vunz youq rangh dieg Bwzyangzhuz dou cungj duk “faengxdin’iq”, daihgaiq suenq dwg gwnz seiqgyaiq gij faengx ceiq ndeiyawj ceiq ndeigwn. Daxbuz dawz haeuxcid hausaksak cang youq seiq mbaw rongfaengx ndawde, guh lumj yiengh din’iq ndeu, saekred duk ndei, cug diuz maeraiz hoengzhoengz heuheu ndeu. Venj aen faengx ndeu haeuj aen hoz gou daeuj, gou ngaem gyaeuj dawz aen faengx haenx yawj bae yawj dauq, raen gij faengx daxbuz duk haenx bi hung gvaq bi, rangfwtfwt、naekdoemdoem. Daxbuz beq aenswx byaij gvaq roenmbanj caet vang bat raeh haenx, bae daengz henz Bwzyangzhuz liz mbanj haj leix gyae haenx yaeb rongfaengx heu. Gou riengz de bae. Dou ndwn youq gwnz dieg sahenj henzhuz, muenghyawj doengh cazngox seiqlengq cungj yawj ndaej raen haenx, yienzhaeuh lohdin dangh gvaq benq raemx dinj ndeu, byaij haeuj ndaw cazngox ceiq baihnamz bae. Daxbuz haengj gij rongfaengx gizneix.

（南宁市武鸣区：黄美菊/Vangz Meijgiz）

3

Seizcin daeuj, daxbuz gou lij naengh youq laeng ranz, suek haeuxfaengx laeng gwnz dieghoengq ne. Miz aen batfaex hung dajcaemx ndeu coq rim raemxsaw, gij mbawfaengx heu moq ngamq daj ndoengngox henzhuz mbaet ma de, youq ndaw raemx ceh dwk, ranz gou baihnaj baihlaeng cungj miz heiqhom, lumj raemxmboq liengzliengz. Gou byaij bae daengz gyang, fwngz coq roengz ndaw batfaex, daxbuz couh ndaq gou lo, mbawfaengx heu daeb ndei lo, de mbouj hawj vunz loengh luenh bae. Dieg rangh Bwzyangzhuz dou, cungj suek “faengxdin’iq”, youq gwnz seiqgyaiq, faengx neix lumj dwg faengx ceiq ndeiyawj、ndeigwn. Daxbuz aeu haeuxnah hausek, coq youq seiq mbaw rongfaengx bae, ut baenz yiengh din’iq, cug ndaetndaet, gyonj ndeindei, de yungh caghoengz cagloeg geugeu, gyaeundei lumj va. Miz aen faengx ndeu daiq haeuj gyaeujhoz gou, gou gumjgyaeuj daeuj yawj swix yawj gvaz, raen daxbuz suek haeuxfaengx, bi hung gvaq bi, gou lumj aen faengx neix, bibi majhung lo, aen faengx hoij youq hoz gou homfwtfwt、caemgeggeg. Daxbuz daiq aen lamzcuk ndeu byaij gvaq diuzloh mbanj, byaij gvaq haj leix rog, daengz henz Bwzyangzhuz, mbaet mbaw- faengx heu daeuj guh faengx. Gou riengz de byaij. Dou soengz youq dieg sahenj henzhuz, muengh haeuj ndoengngox gizlawz cungj raen haenx, leux cix lohdin yamq gvaq rangh raemx feuz, byaij haeuj ndaw ndoengngox baihnamz. Daxbuz gig maij mbawfaengx gizneix.

（凤山县：韩辉/Hanz Veih）