Gouj、Sawcih Bouxcuengh《Sam Cien Saw》

Mbouj faen gienj, cek ndeu, 35 yieb. Mbouj rox coh bouxsij, caubonj Cingciuz. Ceijsa, cangbwn, Sawndip Sawgun doxgap, sawmaeg. Ceksaw sang 23.6 lizmij, gvangq 19.5 lizmij, moix buenq yieb 8 baiz 6 cih, song baiz 2 cih daengz 25 cih mbouj doxdoengz. Bonj saw neix 20 sigij 80 nienzdaih daj Gvangjsih Cungzcoj Si Lungzcouh Yen Ginhlungz Cin soucomz, seizneix yo youq Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh.

Cinzsijvangz doengjit roek guek le, youq dieg Lingjnanz ndalaeb Gveilinz Gin、Sienggin、Nanzhaij sam aen gin, dieg Guengjsae cujyau gvihaeuj Gveilinz Gin, Guengjsae gak minzcuz hainduj cugbouh yungz haeuj aen gyaranz hung Cunghvaz Minzcuz. Sam Guek Song Cin Namz Baek Ciuz seizgeiz, aenvih dieg Cunghyenz hoenxciengq, baenz gyoengq vunz senj coh baihnamz, gyoengqde mboujduenh hawj dieg Guengjsae gak minzcuz comzyouq daiq daeuj hongdawz caeuq swnghcanj gisuz senhcin, lumjbaenz hongdawz diet、gisuz vaiz dajcae、gij sezsih coih miengraemx daengj, lailai coicaenh dieg Guengjsae gij suijbingz cauhguh daezsang caeuq swnghcanj gvanhaeh gaijcaenh. Daegbied daengz Dangzdai le, gaenriengz aen cidu gohgij genj vunz doihengz, Guengjsae mbouj noix aenyienh hainduj hwngbanh gak loih hagdangz, mbangj lwghag doenggvaq gohgij gaujsi yienh ok bonjsaeh. Dangz Cinhgvanh Caet Bi (633 nienz), Dwngzyen Lij Yauzcinz gauj ndaej cinsw, baenz gwnz lizsij Guengjsae boux cinsw daih’it. Neix hawj Guengjsae gak minzcuz lwghag laeb hwnj yienghndei, hag Sawgun caeuq vwnzva Bouxgun baenz lwghag coz maqmuengh doenggvaq cihsiz gaijbienq minghyinh seizhwng moq. Vihliux engq ndei bae hag Sawgun, guhdaengz Sawgun caeuq cihsaw minzcuz ndaej cienjvuenh, gij vunz miz vwnzva haenx hainduj bien sawloih, sawcih couh dwg ndawde loih ndeu.

Cek saw neix mbouj miz daez.《Sam Cien Saw》dwg bouxbien gag an, aenvih ndaw saw sou haeuj daih’iek 3000 cih Sawgun cug cih cekgej, ndigah baenzneix heuh. Neix dwg bonj sawloih Sawgun caeuq Sawndip doiqciuq, couh lumjbaenz《Sinhvaz Swdenj》banj sawcih minzcuz, ndaej bangcoh nyinhdoeg cih Sawgun ciengzseiz raen haenx, liuxcih hag gij saw mizmingz Sawgun.

Bonj saw neix daejlaeh dwg aeu Sawndip daeuj gej Sawgun, Sawgun youq gwnz, cihsaw hung, hoizgej youq laj, song baiz cihsaw iq. Moix cih Sawgun aeu Sawndip cawqgej haenx baudaengz song bouhfaenh, it dwg Sawgun doiqwngq Sawndip baenzlawz sij, ngeih dwg aeu Sawndip cekgej gij eiqsei Sawgun. Lumjbaenz Sawgun cih “天”，doiqwngq Sawndip dwg “公式”(yaem gyawj gwnz), hamzeiq dwg “公式公式bouxfaz”, couh dwg bohmbwn; Sawgun cih “男”，doiqwngq Sawndip dwg“公式”, doeg baenz “sai”, eiqsei dwg bouxsai、lwgsai.

Sawcih youq sawgeq cihsaw minzcuz Guengjsae gig noix raen, daengz seizneix youq Lungzcouh Yen dieg henzguek dingzlai dwg minzcuz cab youq, ndawde gij cihsaw minzcuz gig nanz yawj rox, seizneix fanhoiz cingjleix saw cih lij gig hoj.

Cib、Saw Ywbingh Bouxcuengh《Cojcienz Maedfueng》

Mbouj faen gienj, cek ndeu, 40 yieb. Mbouj rox coh bouxsij, Cingciuz caubonj. Ceijsa, cangbwn, Sawndip Sawgun doxgap, sawmaeg. Ceksaw sang 20.5 lizmij, gvangq 15.5 lizmij, moix buenq yieb 8 daengz 9 baiz, baiz miz 3 daengz 26 cih mbouj doxdoengz. Bonj saw neix youq 2016 nienz daj Gvangjsih Baksaek Si Nazboh Yen soucomz, seizneix yo youq Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh.

2016 nienz 9 nyied, vunzhong Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh daengz Baksaek Si Nazboh Yen bujcaz sawgeq saujsu minzcuz, bouxbujcaz Nazboh Yen duiyouh lauxsae Cwnz Meij mbouj haeujsim dwen daengz gienh saeh ndeu, naeuz goengcoj de gaenq dang gvaq canghyw hakdoj (dangq hakdoj deihfueng), cojcienz fuengfap ywbingh ciuhgonq, de swhgeij yienznaeuz caengz hag gvaq, hoeng daj iq yawjraen hix rox saek di cihsiz ywbingh. Vunzhong cam: “Ndaw ranz lij souyo miz gij sawgeq ywbingh lwi?” Cwnz lauxsae han naeuz: “Mbouj ndei gangj la!” Vunzhong sikhaek roxnyinh daengz, ndaw fwngz de lauheiq miz “baujboiq”! Hoeng lau de mbouj nyienh hawj, vunzhong daegdaengq cienj vahdaez, mbouj gyaepcam dem, cix dwg gangj daengz gij hong ciengjgouq soucomz sawgeq ywbingh Bouxcuengh dwg baenzneix: “Ywcuengh gaenq baenz monz gohyoz doglaeb ndeu, youq ywbingh saedguh hix miz haujlai cauhmoq caeuq dwkbyoengq, laebhwnj Gvangjsih Ywcuengh Yihyen. Hoeng hojsik Ywcuengh cungj dwg bak cienz fueng’yw caeuq fuengfap ywbingh, daengz seizneix lij caengz raen miz saek bonj sawgeq ywbingh aeu Sawndip sij, yozgoh lijlun yenzgiu giepnoix giekdaej vwnzyen, raeuz guh hong sawgeq saujsu minzcuz caen roxnyinh najnyaenq ha!”

“Bouxlawz naeuz mbouj miz? Gou gizneix couh miz bonj ndeu!” Cwnz lauxsae ciengj gangj.

“Caen bw? Aeu daeuj raeuz yawj baez ndeu ndaej lwi?” Vunzhong vuenheij dwk hai bak couh naeuz.

“Yawj ndwi ndaej, hoeng mbouj ndaej dawz bae bw!” Cwnz lauxsae lij miz “diuzgen bengxgya”.

Ndaej yawj hix mbouj loeng, sien yawj gonq menh gangj ba. Vunzhong han gij diuzgen le, Cwnz lauxsae daj aen daeh’aemq riengzndang de dawz ok bonj saw iq ndeu. Bonj saw neix gya naengsaw ceij ndongj, fungmienh sij miz “Cojcienz Maedfueng” seiq cih saw. Cek saw mbouj na, ndawde gij doz ndang vunz fwngz veh haenx ciemq haujlai yieb. Cwnz lauxsae lwnhnaeuz, bonj saw neix dwg goengcoj de cienz, cienz daengz de gaenq miz haj daih vunz. Daj cek saw neix yieb daeuz sij cohdieg “Dacinghgoz Gvangjsih Sihswdau Faenfouj Ya’gyazdung Lungjcunh”, ndaej yaenqcingq bonj saw neix wnggai dwg caubonj Cingciuz.

Raen miz “baujboiq” le, baenzlawz gangjfug bouxyosaw dawz sawgeq dauq baujhoh, couh gaujniemh vunzhong yungh banhfap lo. Gangj bae gangj dauq, ngutngut ngeujngeuj, gyonj daeuj gangj gvaq song ndwen le, bonj saw sawyw Sawndip daih’it couh sou haeuj ndaw ranzsaw sawgeq Gvangjsih Bouxcuengh Swcigih Saujsu Minzcuz Gujciz Baujhu Yenzgiu Cunghsinh lo.

“Cojcienz Maedfueng” dwg Sawgun, eiqsei dwg gij danyw fueng’yw ndaw saw geiqloeg haenx dwg fuengzcug seiqdaih cienzswnj. Ciuhgonq Bouxcuengh boux roxsaw caeuq boux gaemdawz cihsiz ginwngz haenx gig noix, miz mbangj vunz aeu sij saw、cienz dinfwngz daeuj ciengxbak, gaemdawz cihsiz caeuq dinfwngz maqmuengh swhgeij gag miz, ndigah youq haujlai saw ndawbiengz Bouxcuengh sij mingz “cojcienz maedfueng” “ce hawj lwglan” “mbouj cienz vunz rog” doengh cih saw neix. Neix dwg bouxcawj ceksaw baenzneix doiqdaih cienzswnj, cix mbouj dwg coh saw. Hoeng bonj saw neix bonjlaiz mbouj miz coh, vihneix ciuq yungh gwnz fungmienh “Cojcienz Maedfueng” dangbaenz coh saw.

Bonj saw neix dwg sawyw Bouxcuengh bouh daih’it. Gij mbouj doengz loih sawyw gijwnq, daih’it dwg cihsaw yungh Sawndip caeuq Sawgun causij. Daihngeih dwg gij fueng’yw caeuq fuengfap ywbingh hab gij daegdiemj Ywcuengh ciengzseiz raen haenx, lumjbaenz yawjnaek yw binghrog, lai roengz goengfou gyaep heiqdoeg; gij fuengfap ywbingh faen yw goek caeuq rog, yw binghgoek aeu yawj ok binghyiengh guhcawj, dingzlai yungh fuengfap cojcienz, ciuq bingh daeuj yw, giemgoq cawjcingq, yw binghrog youq neiyungz fuengmienh baudaengz gij fuengfap binghrog aeu yw daeuj oenq、oep nem ywbingh daengj, miz gij yienghceij Ywcuengh seizneix. Bonj saw neix geiqloeg gij bingh ciengzseiz raen lumjbaenz dwgliengz、rueg、oksiq、mauhfung、baezdoeg、lwgnyez lau rumz daengj baenzlawz yw caeuq bak lai diuz fueng’yw, fanjyingj ndawbiengz Bouxcuengh ywbingh baenzlawz hwngfat, doiq yenzgiu gij lizsij yw Bouxcuengh miz camgauj gyaciz.