“Valeux hai ndaej hoengzfwdfwd,

Haeuxnaengj haj saek coux beixnuengx,

Dahraemxhoengz laefwg lumj eu fwen le,

Gou youq Sanggiuz deq mwngz.

Laehcei rim bo sien youh sien,

Vahaeux rangfwt cin rim suen,

Dahraemxhoengz byabang youz baedauq le,

Gou youq Sanggiuz deq mwngz.”

Baengzyoux fat souj go heuhguh 《Gou Youq Sanggiuz Deq Mwngz》 ndeu hawj gou, souj go neix miz seiq hot, neix dwg daih’it caeuq daihngeih hot. Cingz laeg eiq naek, unqswnh ndeidingq, gou dingq song baez couh mizyinx lo, ngoenzngoenz gaem aen soujgih hag ciengq. Bak ciengq go, sim goenjnyo- nyo, gig naemj vaiq di daengz aen dieg heuhguh Sanggiuz haenx bae yawjyawj.

Gou rox, Dava Yauzcuz Swciyen youq Gvangjsih cungqgyang， youq Hozciz Si baihnamz, daengx yienh gaenh Dahraemxhoengz. Gizhaenx bya’bya faexfaex caeuq vunzvunz mbanjmbanj gizgiz baenz yawj maezvunz. Gij dieg Gahswhdwz gig daegbied, gingjsaek caeuq minzcuz daegsaek Dahraemxhoengz gig maezvunz, miz guekgya deihcaet gunghyenz Cizbwznung， miz Bwzlijvalangz Dahraemxhoengz， miz ranz rin geizheih Dava， miz suen funghcingz Yauzcuz daengj lai aen dieg ndeiyawj.

Gou couhdwg doiq souj go neix mizyinx, hix dwg doiq gij gingjsaek Dava mizyinx, gou gig naemj vaiq di bae daengz bien Dahraemxhoengz byaijbyaij, bae daengz Sanggiuz yawjyawj.

Doek gvaq ciengz fwncin ndeu, gij mbwn sam nyied bienqndaej engqgya moqsak ronghsak hwnjdaeuj, dauqcawq biu rim rangnamh caeuq rang’va. Gou youq ngoenz ok ndit he, gaen gyoengq baengzyoux itheij, angqfwngfwng bae Sanggiuz.

Gou dwg baez daih’it bae Sanggiuz, mbouj roxnaj roen, baengh daujhangz cijndaej baenaj.

Gou hai ci, mbouj ndaej ndeindei bae yawj gij gingjsaek gwnz roen, hoeng gij byasoem caeuq ga Dahraemxhoengz bonghfwtfwt dauqlaeng haenx gaenq hawj gou roxnyinh gig singjsien.

Sanggiuz dwg aen mbanj youq Gvangjsih Dava Yauzcuz Swciyen baihsaenamz Gungconh Yangh Gungconh Cunh ndeu, dieg gvangq 6.67 bingzfueng goengleix, miz 4 aen doih, 178 ranz, 900 lai vunz, reihnaz 10000 lai moux, liz Dava yienhsingz 19 goengleix, liz Gungconh Yangh Cwngfuj 2.5 goengleix, roenraemx roenhawq seiqlengq seiqdoeng, baedauq gig fuengbienh.

Vihmaz heuhguh Mbanjsanggiuz ni? Riuznaeuz geij bak bi gaxgonq, gyoengq vunzmbanj Gungconh Cunh aeu faex youq gwnz Dahraemxhoengz guh giuz gvaq dah bae guhhong caeuq bae haw bae mbanj. Aen mbanj youq gyaeuj giuzfaex baihgwnz couh heuhguh Mbanjsanggiuz, eiqsei dwg aenmbanj youq giuz baihde. Giuzfaex bibi cimq youq ndaw raemx, bibi nduk di naeuh di, mbouj geijlai nanz couh ngaiz vuenh baez faex he. Miz bi ndeu, Dahraemxhoengz fat raemxrongz, giuzfaex deng raemxrongz bongj bae lo, doeklaeng gyoengq vunzmbanj mbouj caiq caep giuzfaex, gaij aeu saz soengq vunz gvaq dah, itcig daengz seizneix.

Haj bi gonq, youq dieg gou bae Dava, roen iq youh ngutngeuj, aeu miz song aen lai cung cijndaej daengz, seizneix roen gauhsuz bingzrwenrwen, aen cung ndeu couh daengz lo, caengz daengz banngaiz, dou couh daeuj daengz yienhsingz Dava lo, boux baengzyoux daeuj ciep dou, heuh daihgya itdingh bae ranz de baez ndeu, baengzyoux miz cingz, raeuz mbouj ndaej mbouj miz eiq, daeuj daengz ranz baengzyoux, gyoengq beixnuengx de gaenq guh ndei geij daiz byaek, nohbit nohgaeq, nohyiengz nohvaiz baij rim daiz, daihgya angqfwgfwg gwn noh yet laeuj, riucancan gwn haeux gwn byaek, bouxboux gwn imq le laebdaeb riengz bien Dahraemxhoengz coh baihsae bae, aen ci gvaq bya haeuj mbanj, roengz lingq hwnj bo, sawqmwh doiqnaj baez rongh, dou daeuj daengz Mbanjsanggiuz aen mbanj youq bien Dahraemxhoengz haenx lo. Mbanjsanggiuz baihlaeng ing bya, baihnaj gaenh dah, ranz aen goz aen van, miz gak miz yiemh, aen daemq aen sang, miz raez miz dinj. Ciengzhau, vaxhoengz, cuengbik, aen’aen ndeiyiuq, gizgiz baenzyawj.

Mbanjsanggiuz miz bya miz raemx, doiqnaj dwg Dahraemxhoengz——Ga dahmeh Mbanjcuengh hwnzngoenz laefoedfoed baenaj haenx. Baihlaeng dwg Byasanhbauj lumj aen gyaq cuengq bit gyaeundei haenx. Dah songhenz, faexndoek faexceiz heuauau, valeux hoengzfwgfwg. Gwnz bya faex ndaet nya moengx, bi heu daengz haemh. Laj bya va rangfwtfwt, mak hoij rim go, faex raemhrwdrwd. Ndaw mbanj va hai roeg heuh, roen seuqswtswt.

Dieglawz miz raemx, diegde couh fouqmiz, dieglawz miz raemx, diegde couh gyaeundei. Mbanjsanggiuz dwg gij mbanj ciencien fanhfanh ndaejdaengz Dahraemxhoengz nyinh’ung ndawde aen ndeu, Dahraemxhoengz hawj Mbanjsanggiuz bienq ndaej engqgya miz sing miz saek. Youq gizneix, gij saekyiengh, gij saehgaeuq, gij gojgaeq lai dwk geq mbouj liux, yinx gak dieg bouxhek cungj aeu daeuj daengz neix yawjyawj, daeuj daengz neix dingqdingq.

Baeznduj daengz Sanggiuz, roxnyinh gizgiz moqsaksak, daihgya youq gizneix dingzdingz, yawjyawj gova gofaex, youq gizde ndwnndwn, yawjyawj laeuzgaeuq ranzmoq. Bouxcawj angqfwngfwng dwk daiq dou daeuj daengz aen sok Mbanjsanggiuz, gizneix dah gvangqrwenrwen, yawj dauq gwnz mbouj raen gyaeuj, yawj dauq laj mbouj raen byai. Rumzcin ci daeuj, raemxlangh foekfwed caengz gaemh caengz, gij riznyaeuq gwnz dah, myab fonx myab hau, lumj faiqgeu, lumj couzduenh, lumj genbuh, ndeiyawj dangqmaz, sawj vunz siengj gyae ngeix langh. Najda, ngaeuz ranz ngaeuz faex dauqingj youq ndaw raemx, yawj bae gyae yawj gizgyawj cungj dwg lumj coijsei lumj rizveh. Rumz liengz cifefe, dawz heiq liengz ci daeuj, hix dawz rang va ci daeuj, sawj vunz daengx ndang sangjswdswd.

Dou doxgaen hwnj saz, coh gyang Dahraemxhoengz hai bae. Aensaz boq gij raemx saw lumj gingq haenx yaeng’yaeng doengh baenaj, gij sing aen gihgi doi aen saz yiengjhumhum lumj yaek mbongq rin con raemx nei, hoeng seiqlengq dauq mbouj nyi miz saek di sing wngq. Gij raemx gizneix daiq gvangq daiq laeg daiq unqswnh, hawj vunz mbouj miz sim caiq bae siengj gij saeh wnq, baenzlawz hix ndaej nyi singyiengj dem.

Ndwn youq gwnz saz, ngiengx gyaeuj yawj Mbanjsanggiuz, couh raen goengqbya Byasanhbauj youq laeng mbanj daengjvidvid, lumj sam boux lwgva ing youq ndaw rungj gyoengq bya lai. Youh lumj sam boux daxmeh ndaetndaet dwk got dawz aen Mbanjsanggiuz.

Ngaem gyaeuj yawj Dahraemxhoengz, raemx laeg heungitngit, lumj raemxraiz, lumj raemx bouxsien, lumj raemxcij mehmbwn, caen naemj dawz gaemz he hwnjdaeuj couh ndoet geij amq. Gij ngaeuz dauqdingq ranghbya、ndoengfaex、ranzlaeuz, youq ndaw raemx foegfeb haenx yaepseiz soiq baenzmbiengj baenzmbiengj, yaepseiz youh comz doxcoh baenz siengq baenz yiengh, ndeiyawj dangqmaz.

Aen saz nyig raemx dauq gwnz, daeuj daengz aen Gamjganjmajdung, aen gamj neix lumj ndaek saeceij hung nei ajbak gvangqlwdlwd,najgamj raemx heuauau, heiqliengz moek vunz. Bouxvunz dangdieg naeuz, gij raemx daj ndaw Gamjganjmajdung lae okdaeuj neix, dwg gij raemx Dahbingzcih Bingzgoj Si lae daeuj, gij raemx neix lae gvaq gyangbya gemhrin, dawz nyapnyangj gak youq ndaw bya, dawz rinreq caem youq gyangrin, lumj boux lwgnyez manz nei boemzhaeuj ndaw rungj Dahraemxhoengz daeuj.（1）