5 nyied 27 hauh, Neimungzguj Dunghliuz Si Gaihluj Yen Sizyen Siujyoz caeuq Fanghcwngzgangj Si Fangzcwngz Gih Daihsam Siujyoz hamj gvaq cien leix, aeu gij hingzsik gwnzmuengx baedauq hai cawjdaez doihhoih “nyezrauh Neimungzguj Gvangjsih sim coh Dangj gwnzmuengx caemh lwnh cingz doxgiet” hoh “roekit”.

Youq vanzcez “gwnzmuengx baijok ranzmbanj gyaeundei”, hagseng Gaihluj Sizyen Siujyoz bienqbaenz “siujsijcej doenghnywj”, sengdoengh gaisau dangdieg haeuxyangz canjyez、 binjbaiz “singz lwgmanh sauj hoengz Cungguek”、ciengx vaiznoh caeuq dapbaed daengj vwnzlij swhyenz, doenggvaq gij gojgaeq gwzming lezsw Mwzsinh caeuq faexyiz geq ciuhgeq daengj vwnzva fuzhau cienzndenq vwnzva doenghnywj ndei. Fangzcwngzgangj Daihsam Siujyoz “siujdaujyouz henz haij” cix daiqlingx daihgya “gwnzmuengx youz” gingj geizheih sa ndaem Bwzlangdanh、 funghcingz henzguek Dungcungh、 Nazliengz hawgeq yiengh Fazgoz, baijok gij bauj swnghdai cazgimva、 ndoengfaex hoengz caeuq faenjgienj、 haijsien daengj daegsaek gijgwn ndei, hawj gij vwnzva dieg namzbaek youq gwnzmuengx doxgyaux doxbungq.

Vanzcez “doengzsim ciengxlwenx coh Dangj” doi hozdung daengz ceiq hoengh, song dieg hagseng gwnzmuengx caez ciengq 《Gou Gyaez Mwngz Cungguek》, aeu gij sing go goksadsad bae biujdaz gij cingz gyaez guek, baijok gij lijsiengj saenqniemh bouxcoz nyezrauh seizdaih moq giendingh mbouj bienq dingq gij vah Dangj、 gaen Dangj byaij. Doeklaeng vanzcez baedauq “doengz raiz cingz minzcuz”, gyoengq lwgnyez baijok gij doz veh、 saenq saw daengj doxgaiq cingsim guh haenx, sij caensaed hohfuk, gietdoiq bienqbaenz “boux baengzyoux ndei gwnzmuengx”, hawj gij cehfaen minzcuz doxgiet youq saedhengz baedauq ndawde majrag didnyez.

Gaenriengz go doihgeiz yiengj hwnjdaeuj, doihhoih gwnzmuengx yienzmuenx hai sat. Song hagdangz bouxfucwz naeuz, daengzcog yaek laebdaeb doxgap gyauhliuz, gyalaeg gyoengq lwgnyez doiq gij cingzgamj nyinhdoengz aen leixniemh “Cunghvaz Minzcuz ranz vunz ndeu”, coicaenh bouxcoz nyezrauh Neimungzguj Gvangjsih samgyau, couqmaenh gij eiqsik Cunghvaz Minzcuz ranz vunz ndeu.

(Dwng Gizleiz/邓淇檑)