5 nyied 30 hauh, Nanzningz Si Yinzminz Cwngfuj Sinhvwnz Bangunghsiz hai hoih, lwnh vunz rox bi 2025 ndwen lwnh minzcuz doxgiet baenaj Nanzningz Si guh ndaej baenzlawz yiengh.

Bi 2025 ndwen 4 doxdaeuj, Nanzningz Si guh yienghsaeh ndwen lwnh minzcuz doxgiet baenaj, baengh lwnh coi son、baengh ciet coi yungz、baengh yungz coi hab， doihaeuj hwnqguh aen suenranz cingsaenz caemhmiz Cunghvaz Minzcuz, couqmaenh gij eiqsik Cunghvaz Minzcuz ranz vunz ndeu aeundaej cingzcik ndei, guhbaenz minzcuz doxgiet hoenghhwdhwd.

Ciuq cam rox, daj bi 2009 hainduj, Nanzningz Si gaenq lienzdaemh 16 bi guh yienghsaeh ndwen lwnh minzcuz doxgiet baenaj. Aen ndwen neix saeh guh lai、miz daegsaek. Mboujdan youq gwnzsienq lajsienq guh saeh son lwnh, youh guh gak cungj doxdax mizyinx dem, lijmiz gak cuz bouxcoz nyezrauh doxcunz doxgyau、ciuvunz guhhong、baeyouz coihaeuj doxcunz doxgyau doxyungz caeuq langhbaij doxgaiq daihgeq doengh gij saeh neix.

Mboengq ndwen guh yienghsaeh, Nanzningz Si guh Cungguek—Dunghmungz（Nanzningz） feih- yizcouh、ciet angq minzcuz vwnzva bouxcoz nyezrauh、minzcuz doxgiet yindungvei mizyinx、ciet Yahva Bujmyau、ciengjdap miz ciengj doengh gij saeh vunzlai haengjgyaez neix, hawj gak cuz vunzlai mwh doxcaez caeuqfaenh ndaej lai doxcunz、lai doxgyau、lai doxyungz.

Mwh yienjheiq, laebnda vunz- gihgi caeuq gak cuz vunzlai doiq fwen、caez diuq foux doxgiet, mboujdan gaengaenj aen cawjdaez hong minzcuz, guhyiengh youh moqsag, gak cuz bouxcoz haengjgyaez raixcaix.

Caemhcaiq, Nanzningz Si lij laebnda camhdeihdiet cawjdaez minzcuz doxgiet、aen ruz cawjdaez, hailaeb diuz ciensienq “bahsw fwen”， hawj gak cuz vunzlai mwh youz aen suenranz gyaeundei swnghdai hab youq, ndaej roxnyinh gij yinxdaeuz minzcuz vwnzva.

Linghvaih, Nanzningz Si gak segih cujciz vunz guh gwn ngaizhumx、ciet gvaq ngoenz、gagnyienh fugsaeh doengh gij saeh neix, guhbaenz aen ciengzgingj huzndei gak cuz vunzlai caemh gwn daiz ngaiz ndeu、caemh diuq loh foux ndeu.

(Cinz Yen)