Daihgya cungj geizheih dwk cim bae coh de. Bauj Lu naeuz:“Gwz, dwg ‘yinzgwz’, yinzgwz dijbauj, ndigah hawj de majhung le aeu rox gijmaz dwg yinzgwz.” Vunzlai youh bekfwngz hwnjdaeuj, ngaek gyaeuj doengzeiq gij yawjfap Bauj Lu. Linz Vaz naengh youq bangxhenz, umj Baujgwz cabbak naeuz:“Lij miz aen mingzcoh ndeu daihgya lij mbouj rox bw.” De ceij bae coh boux baengzyoux mehmbwk Siuh Youh.

“O, gou daeuj gaisau ba, de heuh Li Fangh.” Siuh Youh ndwn hwnjdaeuj gaisau naeuz.

Couh yienghneix, aen ranz caembyambyam Linz Vaz bienq nauhyied lo.

Gvaq geij ngoenz, Siuh Youh caeuq Li Fangh youh bae Bwzswz dajgoeng lo. Siuh Youh baez bae le, Bauj Lu youh bae ranz Linz Vaz. Mbat neix, Bauj Lu cix mbouj lumj gaxgonq guhcaeg bae lo. De aeu gak cungj lijyouz bang hong daeuj guh gyaij, damjlaux haeujok ranz Linz Vaz, caeuq Linz Vaz itheij gwn haeux.

Ceij bau mbouj ndaej feiz. Bauj Lu caeuq Linz Vaz gij saeh neix, mbouj geij nanz couh deng vunz rox caez lo. Gij saeh rwix cienz okdaeuj le, Linz Vaz hix najna doiq gyoengqvunz gangj:“Mehmbwk bouxlawz mbouj ndwet? Vih gijmaz sou haemhlaep caeuq bouxsai sou ninz. Gou couhdwg aeu Bauj Lu, couhdwg aeu Bauj Lu! Mbwn ndaej doemq lwi?”

Lungzsam rox le, caenndang hwnj ranz Linz Vaz bae naeuz:“Mehgwz, mwngz ndeindei ciengx daeg lan neix couhdwg lo, dou bang mwngz dawzcae raeqnaz, ndaej ciengx bak mwngz couh baenz lo, dou gouz mwngz gaej caiq haq lo, ndei lwi?”

Linz Vaz doiq gyoengqvunz baklai haenx gig hozndat, seizneix lungzsam youh hwnj dou daeuj gienq dem, de najsaek mbouj ndei doiq lungzsam naeuz:“Mwngz ndaej ciengx bakvang, bouxlawz dangj bakraeh.”

Lungzsam dingq le, mbouj miz vah gangj lo.

Vunzlai dingq le, mbouj miz vah gangj lo.

Sam

Gij saeh saetnaj Bauj Lu caeuq Linz Vaz, riuz bae daengz biengz, gij gyahoh Bauj Lu caeuq bohmeh de genhgez fanjdui. Gyoengqvunz hix cingq ngeixlwnh foedfoed, miz vunz naeuz:“Baenzlawz boux mbauq ndeu bae aeu boux yahmaiq ndeu ne? Gangj mbouj ndei mingh Linz Vaz haek gvan.” Hix miz vunz naeuz:“Linz Vaz dwg mbouj dwg ngah gij ngaenz Bauj Lu……” Lungzsam dingq le gig ndatheiq. Lungzsam youh hwnj laeng Linz Vaz bae gouzcingz, hoeng Linz Vaz gangj vah engq haebhoz haebheuj, lungzsam naeuz: “Hawj mwngz bae, hoeng daeglan Baujgwz bouxlawz hix mbouj ndaej daiq bae, de dwg faen ranz Siuh.”

Liuh mbouj daengz, bet nyied cibngux gvaqlaeng, Linz Vaz aemq daeglwg de daeuj daengz ranz lungzsam, de naeuz de aeu daiq daeglwg bae Gvangjdungh hawj dahnuengx de daiq, swhgeij haeuj cangj bae dajgoeng. Linz Vaz baez gangj ok bak, lungzsam couh rox de siengj caeuq Bauj Lu bae lo.

“Daemz dek mbouj ndaej hah bya, naz dek mbouj ndaej hah haeux, mwngz bae couh bae, hoeng mbouj ndaej daiq daeglan bae.” Gij vah lungzsam gangj haenx geng lumj diet, Linz Vaz couh sohsoh baenq dauq bae ranz.

Ngoenz daihngeih gyanghaet, ranznden ndaej aen siusik caensaed ndeu, naeuz Linz Vaz caepcawq youq mbwn lij caengz rongh aemq lwg okbae lo. Lungzsam dingq le sikhaek ganj daengz bakmbanj bae donj Linz Vaz.

“Vah gou gangj mwngz dangq guh rumz boq? Mwngz hawj lwgnyez hawj gou.” Youq mwh Linz Vaz caeuq Bauj Lu ganjroen, lungzsam sawqmwh cung ok henz roen daeuj lanz. Gyoengqde doxbeng doxrag, doeklaeng lungzsam ciengj ndaej daeglan bae ranz lo. Linz Vaz caeuq Bauj Lu gyaeuj hix mbouj baenq couh youq bakmbanj ra mbouj raen lo……

Seiq

Li Fangh caeuq Siuh Youh rox aen saeh neix, ganjgip ma ranz. Gyoengqde yawjraen gij raemxda daeglan Siuh Baujgwz haenx, ndawsim cibfaen hojsouh. Gyanghwnz laeg lo, Li Fangh ninz mbouj ndaek, de doiq Siuh Youh naeuz:“Ngoenzcog raeuz bae lingx mbawcingq gezvwnh ba, lwgnyez aeu miz meh ha.” Siuh Youh gaem ndaet faj fwngz Li Fangh, raemxda doek okdaeuj.

Daj seizhaenx hwnj, Li Fangh caiq hix mbouj okbae dajgoeng lo.

Roek bi gvaqbae. Siuh Baujgwz hix hwnj siujyoz it nienzgaep. Miz ngoenz ndeu, de cuengqhag ma ranz doiq Li Fangh naeuz: “Mehsimj mehsimj, aen ban gou miz geij boux doengzhag naeuz mwngz dwg gaeqboux, mbouj rox ok gyaeq.” Li Fangh gig doeksaet, cam:“Boux…… bouxlawz gangj?” Baujgwz naeuz: “Gyoengqde naeuz dwg vunzlaux gangj. ” Li Fangh mbouj gangj vah lo.

Gij vah Siuh Baujgwz caen hawj Li Fangh yaemz haujlai nanz, hoeng de mbouj ndaej gvaiq lwgnyez, yaek gvaiq couh gvaiq vunzlai bak lai. De rox, 6 bi lo, wnggai hawj Siuh Youh seng boux lwg ndeu, hoeng de couh cuengq mbouj ndaej boux lwggyax neix. Gaeqboux couh gaeqboux ba…… Li Fangh siengj gvaq haujlai.

Yaek gvaq cieng lo, ranzranz cungj bwh ndaej nienzhuq lo. Li Fangh gaeb geij duz gaeqboux hung dawz daengz gwnzhaw bae gai, de byaij gvaq bakdou Youzcwngsoj seiz, bouxsoengqsaenq Siujlij heuh Li Fangh naeuz:“Beixnuengx ha, Siuh Baujgwz miz mbaw biuq ngaenz ndeu ngamq daengz, dwg youq Gvangjdungh geiq daeuj. ” Li Fangh ciep mbaw biuq ngaenz baez yawj, 5000 maenz ngaenz, boux geiq ngaenz dwg Linz Vaz.

Li Fangh ma daengz ranz, cuengq gij biuq ngaenz youq ndaw daehbiuq, de cingq naemj Linz Vaz vihmaz geiq baenzlai cienz hawj Siuh Baujgwz, ndaemnduek roxnyinh da laep, couh laemx youq henz aen gvih densi. Baujgwz daj baihrog guhcaemz dauqma, yawjraen Li Fangh laemx youq gwnznamh, de buet gvaqbae ngauzngaez naeuz:“Mehsimj mehsimj, mwngz baenzlawz la?” Hoeng Li Fangh maez gvaqbae lo. Siuh Baujgwz lau dwk daej hwnjdaeuj, de buet bae heuh lungzsam, lungzsam ganj daeuj lo, sikhaek heuh vunz ndawmbanj soengq Li Fangh bae yihyen. Boux canghyw naeuz: “Boux vunzbingh neix gig gojnaengz dwg geizlaeng bingh’aizcwng aen dungx, dou gizneix mbouj miz banhfap yw, sou bae ndaw singz ba!” Li Fangh deng cienj daengz si yinzminz yihyen, Siuh Youh rox le gaenj lumj feiz doek gwnz din nei youq baihrog ganj dauq.

Seizdoeng ndwenlab, rumznit cihuhu, baenzlawz hix boq mbouj hawq gij raemxda gwnz naj Siuh Youh. Siuh Youh baez buet haeuj yihyen, Li Fangh cingq coq yangjgi. Siuh Youh naengh youq ndaw ranzbingh, ndawsim hoengqliuliu……

Cib ngoenz gvaqbae lo, hix couhdwg ndwenlab ngeihsam, ranzranz cungj baet ranz gvaq cieng, hoeng yihyen youh dunghcih naeuz Li Fangh gaenq bingh naek. Canghyw laeglemx naeuz Siuh Youh, cungj bingh neix gaenq dwg geizlaeng lo, dou gaenq roengzrengz lo. Siuh Youh yienghyiengh cungj mingzbeg liux.

Li Fangh mbouj ndaej mbouj ma ranz. Siuh Youh okbae ra lungzsam doxyaeng, daj lungzsam haenx rox Bauj Lu caeuq Linz Vaz daengz Gvangjdungh dajgoeng youq ndaw ranzco dengdoeg meizheiq, song boux cungj dai lo. Siuh Youh buet dauq ranz, daengz henz rwz Li Fangh naeuz: “Fangh, mbouj ndei lo, Bauj Lu caeuq Linz Vaz youq Gvangjdungh dengdoeg meizheiq, gyoengqde dai lo……” LiFangh dingq le cij siengj daengz saeh Linz Vaz geiq cienz hawj Baujgwz haenx.

LiFangh naeuz:“Vaiq, vaiq heuh Baujgwz daeuj.” Siuh Youh fwngz cing Baujgwz daeuj daengz henz mbonq Li Fangh, Li Fangh aeu fwngz ceij aen gvih densi naeuz:“Aeu aen daehbiuq haenx daeuj, ndawde miz mbaw biuqcienz lwgnyez ndeu.” Siuh Youh bae aeu aen daehbiuq daeuj, Li Fangh naeuz:“Lwg ha, hawj daxmeh caiq gaem fwngz mwngz mbat ndeu, daxmeh bae lo, mwngz aeu ndeindei gvaq saedceij, aeu hag rox guh gwn guh daenj……”

Siuh Youh hai ndaw daeh, cawz mbaw biuq ngaenz Baujgwz caixvaih, ndawde cienzbouh dwg gij dan roek bi neix daeuj Li Fangh youq yihyen guh soujsuz liuzcanj, Siuh Youh sikhaek mingzbeg gij goekrag Li Fangz vihmaz mbouj aeu lwgnyez.

Li Fangh caenfwngz gyau mbaw biuqngaenz hawj Baujgwz seiz, fwngz de couh menhmenh doek roengzdaeuj lo.

Mbwn engqgya nit lo!

（2 sat）