Nanzningz Si Gyanghnanz Gih baengh vwnzva lijyouz swhyenz lai, cizgiz damqra diuz loh moq hwnqguh mbanj minzcuz miz daegsaek caeuq lajmbanj lijyouz yungzhab hwngfat, cauhmoq saedhengz canloz “mbanj conzdungj + lijyouz” “mbanj minzcuz + lijyouz” yungzhab hwngfat, doenggvaq gveihva dazyinx, swhyenz cingjhab、 vwnzva coenghrengz sam fuengmienh okrengz, doidoengh minzcuz vwnzva caeuq lajmbanj lijyouz boiqhab hwngfat, laebdaeb uet rongh aen binjbaiz “aen mbanj vwnzva Vahsengj Cungguek”.

Hopheux gveihva byaijgonq, veh aen lamzdoz moq daengx dieg lijyouz. Gyanghnanz Gih nab mbanj minzcuz miz daegsaek caeuq lajmbanj lijyouz yungzhab hwngfat haeuj “Cibseiq Haj” gveihva, genhciz baijbouh “aen mbanj aen daegsaek”, lai vatcimh gij vwnzva swhyenz lajmbanj, doedok minzcuz ranzyouq、 gijgwn、 guh ciet daengj daegsaek, bienguh 《Nanzningz Si Gyanghnanz Gih Daengx Dieg Lijyouz Hwngfat Cungjdaej Gveihva》, doidoengh vwnzva lijyouz canjyez caeuq nungzyez、 vwnzva、 ciengx- ndang daengj hangznieb yungzhab ndei. Seizneix, Gyanghnanz Gih gaenq baenzgoeng cauhlaeb gih guhyiengh lijyouz daengx dieg Gvangjsih, vih lajmbanj lijyouz hwngfat ndaej youh ndei youh vaiq dwk giekdaej.

Hopheux gaijndei swhyenz, dajcauh daejniemh moq lajmbanj lijyouz. Giethab ndei mbanj minzcuz hwngfat caeuq daengx dieg lijyouz hwngfat, laebndei gij sezsih giekdaej mbanj minzcuz, gaijndei boiqdauq goenggungh gyaudoeng、 gij roen lajmbanj、 denliz doengsaenq daengj, caemhcaiq yungzhaeuj cinwngz daejniemh、 minzcuz vwnzva baij ok daengj daegsaek fuzvu, dajcauh caeuq daezswng gij canjyez caeuq swnghhoz vanzging lajmbanj. Baengh Yangzmeij Singzgeq、 Seiqgeiq Nazlangz、 Maz- swjseh Dujgaij Bozvuzgvanj、 Gwnh- cuzlij Yangjswnghguz daengj haedsim dieg baeyouz, daiqdoengh gij mbanj conzdungj seiqhenz hwngfat minzsuz ginghci, coicaenh lajmbanj lijyouz guh baenz benq、 guh ndaej ndei.

Hopheux vwnzva cienzciep, gikfat lajmbanj lijyouz rengzhoengh moq. Aeu baujhoh caeuq hwngfat lizsij vwnzva guh haedsim, ceiqdingh 《Sanhgyanghboh Mbanj Mizmingz Lizsij Vwnzva Baujhoh Gveihva (2020 — 2035 Nienz) 》, haeujlaeg vatcimh gij neihanz fungfouq vwnzva ndawbiengz minzcuz、 vwnzva dajndaem, dajcauh “ngoenzciet、 doxdax、 sienqloh” sam aen bingzdaiz baijok, yungh aen vunqsik “cwngfuj dazyinx、 ginzcung cawjbanh、 hekyouz camgya”, doenggvaq yungzhab “lijyouz + guh ciet”, lienzdaemh guh bet gaiq ciet lijyouz vwnzva Vahsengj, yienh’ok deihfueng vwnzva daegsaek, coicaenh vwnzva lijyouz gyauhliuz doxgap, doidoengh vwnzva lijyouz youh ndei youh vaiq hwngfat.

（Banh Cing/潘静）