Mboengqneix, geiz daihngeih gak cuz vunzlai couqmaenh gij eiqsik Cunghvaz Minzcuz ranz vunz ndeu doxgyau saedguh hozdung youq Nanzningz banh, hozdung dwg Swcigih Minzcunghveij cawjbanh, Gvangjsih gak aen si laeb gih、yienh（si、gih） 50 lai boux bouxguhhong lajmbanj camgya.

Hozdung miz hwnjdangz gangj caeuq daengz dieg yawjngonz gaujcaz song loh. Hopheux hwnqguh aen gih guhyiengh “couqmaenh”、hong cauhlaeb minzcuz doxgiet baenaj doengh gij neiyungz neix laeb dangzgoq cienmonz, lauxhangz hwnj- dangz gangj hong cauhlaeb minzcuz doxgiet baenaj mizgven cwngcwz caeuq gij vwndiz youqgaenj hoj rox, caeuq gyoengq bouxguhhong lajmbanj doxgyau、doxlwnh caeuq doxyaeng.

Mwh bae yawjngonz gaujcaz, gyoengq bouxguhhong lajmbanj bae daengz dieggiek guhyiengh makdumh Gvangjsih Cenhyi Nungzyez Youjhan Gunghswh, hag ndaem makdumh、canjyez yozsuz gohyenz doxyungz caeuq biucinjvaq、hawciengzvaq guenjguh doengj gij dinfwngz neix; bae daengz Nanzningz Si Sihyanghdangz Gih Sizbu Gaihdau Cunghliengz Cunh、Ganjlanjbauj Lozyenz, aen cotsim majdau Dahyinh Bingzluz、dieg anqceiq caetleix Lingzsanh Yen Ginhcouh Si doengj gij dieg neix, hag’aeu gaiq gingniemh mizyungh ceihleix lajmbanj、cauhlaeb minzcuz doxgiet baenaj caeuq doihaeuj saenqhwng lajmbanj.

Gyoengq bouxguhhong lajmbanj cungj naeuz, yaek aeu gij hag ndaej bae guh ndei hong lajmbanj, ciuq saed dingh geiq damqra diuzroen hwngfat hab bonjdieg saedsaeh, caen hawj vunzlai lai roxnyinh ndaejdaengz caeuq roxnyinh vuenyungz.

Ciuq cam rox, Swcigih Minzcunghveij yaek laebdaeb gyalai vunz caeuqfaenh gak cuz vunzlai “couqmaenh” doxgyau saedguh hozdung, doinyoengx guhbaenz “ganq boux ndeu, daiq gyoengq ndeu、naznangq rangh ndeu”, sonyinx gak cuz vunzlai lai caeuqfaenh hwnqguh aen gih guhyiengh “couqmaenh”.(Vangz Yigiz Vangz Yijyinh)