Gij goj vunzbiengz ndaem haeux, gangj mbouj sat, lwnh mbouj liux. Doenghbaez, guek raeuz biengzdieg hunggvangq, gak dieg mbwnheiq gak miz mbouj doengz, ndigah bouxgonq baihbaek lai ndaem haeuxfiengj, baihnamz cix lai ndaem haeuxnaz. Seiq haj cien bi gonq, bouxgonq Ouhloz Guengjsae fatyienh haeuxcwx, caiq aeu ma ndaem, ndigah gij vwnzva ndaem haeux Guengjsae gig naekna. Gij goj ndaem haeuxnaz youq gwnzbiengz Guengjsae cienz mbouj dingz, haeuxsan ciengx hung le lwgminz dieg neix. Youq Nanzningz Si Vujmingz Gih, faengxraemxndaengq couh daiqbiuj cungj vwnzva ndaemhaeux——Fiengz daj gohaeux daeuj, guh faengx cix mbouj ndaej noix.

Faengxraemxndaengq youh heuh faengxliengz、faengxraemxgimz, vunzlai Guengjsae、Guengjdoeng、Fuzgen mwh gvaq cieng caeuq ngux nyied co’ngux maij guh neix daeuj gwn, siengcwngh vunzranz cungj youq giz ndeu caeuq gohuq ndaej sou lai. Guh faengxraemxndaengq ceiq youqgaenj couhdwg “raemxndaengq”——Coemh ganjfiengz、ganjlwgraz daengj doenghgo baenz daeuh ma guh raemxndaengq. Ndaw daeuh miz dansonhgyaj daengj doxgaiq, hawj faengxraemxndaengq engq feih engq unq engq cid, cix ce ndaej nanz, mbouj yungzheih haeusaeu. Cousou gvaq le, gij fiengz dong youq ndaw naz, baijrairai. Vunzlai gaeuzhwet baez diuz genj fiengz, lau gij boengz nem youq baihgwnz, youh bok mbaw deuz, caenh ce gij ganj baihndaw. Ndaej le ra gaiq dieghoengq coemh fiengz, coemh ndei, cang gij daeuh hwnjdaeuj yo ndei. Deq cieng roxnaeuz ngux nyied co’ngux daeuj daengz, dauq aeu daeuh okdaeuj loengh faengx. Daeuh gya raemxsaw, gyaux yinz le cuengq gvaq haemh, gyanghaet raenz caengz raemxsaw baihgwnz okdaeuj, neix couhdwg raemxndaengq. Aeu gij raemx neix cimq haeuxcid, cimq sam seiq diemjcung, haeuxcid bienq henj couh ndaej vax hwnj suek faengx lo. Gij raemxndaengq hamz lai cit lai cungj yingjyangj feihdauh haeuxfaengx. Danghnaeuz hamz lai, haeuxfaengx couh saepsangsang, danghnaeuz mbouj gaeuq noengz, gij saek haeuxfaengx hix mbouj henj, gwn daeuj mbouj miz feihdauh. Faengxraemxndaengq itbuen dwg faengxmaen, mbouj miz sim. Cienzdoengj dwg suek baenz diuz raezrat roxnaeuz suek sam gak guh baenz faengxgaeuyiengz, mbawrong suek faengx dwg aeu mbaw faexcuk、rongfaengx gaeuyiengz. Faengx suek sat, dwk roengz gu bae, gya raemx dumx gvaq dingj cimq yaep ndeu couh dwkfeiz, dumq seiq haj diemjcung, seiz mbouj seiz aeu fonj gij faengx. Ndaw gu raemx goenjbibi, heiqfwi cwng hwnj mbwn, seiqhenz cungj nyouq raen heiq faengx homfwd, hawj vunz myaiz rih liux. Deq haeuxfaengx cawj cug, bok mbawrong okdaeuj, caenh raen aen faengx henjnumnum, yawj daeuj lawxlublub, haeb gaemz ndeu, unqnup、niunut, cuengq caep menh gwn, cix engq sangjbak lo. Mbangj boux rox loengh gwn de, lij daemj begdangz、dangzrwi roxnaeuz dangznding liu, diemzsubsub, feih raixcaix.

Bouxgeq ciengzseiz damz coenz vah ndeu: Gwn faengxraemxndaengq mbouj yungzheih hwngqhuh. Ndigah haujlai vunz cungj maij gwn cungj faengx neix. Aenvih gij faengx neix feih cit cix ce ndaej nanz, seizhong bouxguhnaz cungj maij daiq bae guhhong dang ganliengz dingj iek. 2020 nienz, gij dinfwngz faengxraemxndaengq Vujmingz ndaej senj haeuj buek daihbet swcigih gaep feihyiz mingzloeg. Cungj faengx neix caeuq faengx hung Hwngzcouh、faengx hung Lingzsanh、faengxhaeuxndaem Lungzlinz daengj doxcaez veh baenz mbaw doz haeuxfaengx Guengjsae lai yiengh ndeu, bienqbaenz aen biu vwnzva biengzdieg youqgaenj.

Gyawj geij bi neix, youq aen haw gaiqgwn feihyiz sam nyied sam laeng Vujmingz, faengxraemxndaengq caeuq haeuxnaengj haj saek、faenjcaq daengj gaiqgwn itheij baij hwnj daiz, hawj hekyouz cimz feih. Yienznaeuz cungj faengx neix miz di mingz lo, hoeng gij dinfwngz cienzciep lij miz di hoj he. Daih- it, bouxoiq raen mazfanz lai, mbouj yinx guh cungj gwn neix; daihngeih, gunghcangj aeu gihgi guh haemq heih, vunz cungj cawx aeu gik gag guh lo. Yiengh le, boux cienzciep feihyiz dieg de couh sawq hwnq aencangj、hai ban son mehmbwk, bienq cungj dinfwngz youq ranz gag guh baenz gveihmoz hung swnghcanj, gai cungj faengxcug ndeu boiq dangzrwi ciengqmak daengj, cauhmoq ok gij faengxraemxndaengq aeu noh、duhsa guh sim haenx, caiq hai aen diengzhong hawj hekyouz daeuj sawq guh faengx, yinx bouxoiq haeujsim haengjgyaez. Faengxraemxndaengq cix baij haeuj ndaw bouqdiemq, gai daengz guek raeuz gak dieg.

Gwn faengx, dwg aen sibsug daih cienz daih, dwg vunzlai cienzciep gij vwnzva cienzdoengj. Daj fiengz ndaw naz daengz gijgwn, faengxraemxndaengq Vujmingz dwg gaiqfeih vunzlai aeu daeuh caeuq haeuxcid guh baenz ndeu. Doiq haujlai vunz dieg de ma gangj, cungj faengx neix couhdwg cungj feihdauh ranzmbanj, daiq miz gij gyaez bohmeh、daxgoeng daxbuz daengj. Bouxyouqrog mboujlwnh bae daengz gyawz, cungj nanzlumz gij feihdauh neix. Diuz roen ma ranz aiq gyae lai, yaek byaij cien leix; diuz roen ma ranz caemh gaenhgetget, gwn gaemz haeuxfaengx ranzmbanj lumjbaenz ma daengz giz dieg sengmaj.

(Saw doz daj Gvangjsih Yizbau、Gvangjsih Yinz、Aen Cungsim Yungzmeizdij Vujmingz Gih aeu)