“Sam Nyied Sam” dwg aen ciet lai aen minzcuz cungj gvaq ciuhlaux cienz roengzdaeuj ndeu, dwg aen bouhfaenh youqgaenj gapbaenz Cunghvaz conzdungj vwnzva maenhndei ndeu. Gaenh bi daeuj, Guengjsae doidoengh hawj “Sam Nyied Sam” aen ciet laux neix ndaej cienjbienq moq, hwngfat ndei, hawj de youq coicaenh gak minzcuz dox baedauq dox gyaulouz dox yungzhab、 doidoengh ginghci sevei hwngfat、 laebguh aen ranzmbanj cingsaenz Cunghvaz minzcuz caezmiz daengj fuengmienh ok rengz hung, baenz aen yiengh ndei Guengjsae couqmaenh gij eiqsik Cunghvaz Minzcuz ranz vunz ndeu.

Dajcauh Aen Vwnzva Binjbaiz Yiengj Ndeu

“Sam Nyied Sam” lizsij gyaenanz, ra goek de ndaej ra daengz mwh Senhcinz aen ciet Sangsw. “Sam Nyied Sam” aen ciet deu miz aen coh “Guengjsae” neix, yungzhab le doengh gij vwnzva gak minzcuz, daegbied dwg aen cienznaeuz “fwensien” Bouxcuengh Liuz Sanhcej. 1983 nienz, Guengjsae Bouxcuengh Swcigih Yinzminz Cwngfuj gietdingh, dawz moix bi liggaeuq sam nyied sam dingh guh “cietfwen Bouxcuengh”. 1984 nienz 4 nyied, Cietfwen “Guengjsae Sam Nyied Sam” Gaiq Daih’it Guengjsae youq Nanzningz Si Yinzminz Gunghyenz guh, 480 lai boux canghfwen、 5000 lai boux gak gyaiq ginzcung daj Nanzningz、Baksaek daengj dieg daeuj haenx camgya hozdung. Daj neix hwnj, moix bi daengz “Sam Nyied Sam” , Guengjsae gak dieg cungj guh vwnzva hozdung, gak cuz ginzcung hwnjdaiz biujyienj, gangjgoj doxgyau, engq doxgiet lo.

2014 nienz, “Guengjsae Sam Nyied Sam” ginggvaq Guengjsae Bouxcuengh Swcigih Yinzminz Cwngfuj baecinj guh aen ciet fapdingh Guengjsae. Caemh dwg bi haenx, “Guengjsae Sam Nyied Sam” ndaej senj haeuj buek daihseiq gaep guekgya feihvuzciz vwnzva yizcanj daibyaujsing hanghmoeg mingzloeg, gij yingjyangj de youh lai gvangq lo.

2016 nienz, Guengjsae maeuzveh cauhguh aen vwnzva binjbaiz comz minzcuz vwnzva、ginzcung dijyuz、 fungcingz lijyouz、daegsaek siufeiq guh gaemz ndeu haenx. 2017 nienz, “Sam Nyied Sam Bouxcuengh·Aen Ciet Hoengh Gvangjsih” vwnzva binjbaiz cingqsik doiok, baudaengz “youq Guengjsae ngamjndei” “e muengx angqyangz cawx” “Diegcuengh daegsaek noengz” “doxiu youz Guengjsae”“minzcuz dijyuz ak”haj aen bouhfaenh. Vihliux dawz aen vwnzva binjbaiz neix guh ndaej engq ndei, Swcigih Dangjveij、cwngfuj roengzrengz maeuzveh, senhconz bumwnz guh daeuz、 lai aen bumwnz doengzcaez bae guh, gak dieg gak danhvei ciuq saedcaeq bonjdieg, dawz gofoux yisuz、 dinfwngz feihyiz、conzdungj dijyuz、 gaiqgwn daegsaek daengj yungz haeuj ngoenzciet hozdung bae. Ginggvaq lai bi laebguh, 2024 nienz, aen vwnzva binjbaiz neix swnggaep baenz “Sam Nyied Sam Bouxcuengh·Aen Ciet Hoengh Gvangjsih”, hawj vunz raen lwenqda、 miz daegsaek moq youh hoenghhwd moq.

Lai bi gvaqdaeuj, Guengjsae mboujduenh guh hawj “Sam Nyied Sam” neiyungz engq lai eiqsei engq laeg, sawj de daj aen ciet ciuhlaux cienz roengzdaeuj bienqbaenz aen ciet hoengh gak minzcuz caez doxcomz、 caez guh’angq、caez doxgiet、caez hwngfat, baenz aen geiqhauh Cunghvaz vwnzva gak minzcuz caez guh caez yungh ndeu, doiq laebguh aen ranzmbanj cingsaenz Cunghvaz Minzcuz caezmiz、 hawj vunz engq nyinhdoengz Cunghvaz vwnzva ok rengz hung.

Laeb Aen Bingzdaiz Gak Minzcuz Dox Baedauq Dox Gyaulouz Dox Yungzhab

Dawz aen giva lijyouz coi “sam gyau” guh haeuj laeg, coicaenh vwnzva caeuq lijyouz yungzhab. Guengjsae okdaiz 《Aen Fueng’anq Hengzguh “Lijyouz Coicaenh Gak Minzcuz Dox Baedauq Dox Gyaulouz Dox Yungzhab Giva · Guengjsae Cingq Hengzdoengh》《Aen Banhfap Bangbouj Lijhingzse 2024 Nienz “Guengjsae Sam Nyied Sam” Yinx Hek Daeuj Guengjsae》daengj, dawz gij hong couqmaenh gij eiqsik Cunghvaz Minzcuz ranz vunz ndeu caeuq “Sam Nyied Sam Bouxcuengh·Aen Ciet Hoengh Gvangjsih” vwnzva binjbaiz laebguh dox giethab, haeujsim aeu dangdieg funggingj、swhyenz saekhoengz、fungsug daegsaek、vwnzva yizcanj daengj, bae roengzrengz guh gij cawjdaez lijyouz sienqloh caeuq bouxcoz nyezrauh youz hag sienqloh, haenqrengz doi hawj lijyouzyez baenz aen guhfap youqgaenj coicaenh gak minzcuz “sam gyau”, hawj lijyouzyez youq fugsaeh ginghci sevei hwngfat、muenxcuk gak cuz ginzcung ngahmaij bae youz、dem’ak yinzminz cingsaenz ligliengh、 couqmaenh gij eiqsik Cunghvaz Minzcuz ranz vunz ndeu ndaej ok rengz hung.

Guh hawj neiyungz miz lai, hawj daejniemh gamjsouh engq ndei. Bineix 3 nyied 31 hauh, “Sam Nyied Sam Bouxcuengh·Aen Ciet Hoengh Gvangjsih” haimuq yizsiz caeuq “seiq geiq fwen mbanj” hozdung haiguh yizsiz youq Nanzningz gawjbanh, “Fwencuengh couhlumj raemxdah cin” Guengjsae Minzgoh Daihhoih doengzcaez haiguh. Youq hozdung yienhciengz, gyoengq yisuzgyah daj lai aen vwnzyi yendonz gaep guekgya daeuj haenx lienzhab canghfwen bonjdieg Guengjsae, caeuq gij donzdoih “fwen mbanj”daj 19 aen swngj gih daeuj haenx itheij yienj itheij ciengq, baijok gij minzcuz yinhyoz ndei lailai haenx. Mwh guh hozdung, Guekgya Gunghgung Vwnzva Yinz ingbaengh aen gvaengh cienzboq meizdij moq cienmonz laeb aen dieg “fwen mbanj” hozdung ndeu, cujciz gwnzsienq yinhyozvei、cigboq doxdoengh daengj hozdung. Gij hozdung neix coicaenh gak cuz ginzcung youq ndaw ngoenzciet angqyangz de sim’angq caezyouq, gamjsouh gij raeujrub “Cunghvaz Minzcuz ranz vunz ndeu”.

Coi hawj dox yungzhab dox hagsib, hawj lailai nyinhdoengz vwnzva. Mwh “Sam Nyied Sam”, Guengjsae banh minzcuz gofoux canjyienj、feihyiz langhbaij、doxgaiq ndeigwn langhbaij、conzdungj dijyuz doxdax、yozsuz lundanz daengj baenz buek hozdung lai saek lai yiengh, gak cuz ginzcung ndang daenj buh gyaeu minzcuz swhgeij, ciengq go diuq foux，caez gvaq ngoenzciet. “Sam Nyied Sam” yienh’ok Cunghvaz vwnzva yungzhab caez ndei、 lai saek lai yiengh, aen dwngz Bouxcuengh、fwenbizbaz Dungcuz、gimzyienzdog Ginghcuz、fouxgyongluengz Yauzcuz、fouxluzswngh Myauzcuz daengj minzcuz yisuz gig miz daegsaek haenx, man、dom、ngaenz Myauz、gij siuq Dungcuz、deu gyamqsae、sanduk daengj gij doxgaiq fwngz guh gyaeundei haenx, haeuxnaengj haj saek Bouxcuengh、 byasoemj Dungcuz、youzcaz Yauzcuz daengj gij ndeigwn miz daegsaek haenx, dwkdom、 ciengj bauqva、foux faexsaux、vaiz doxdaemj、sam vunz haizgieg、foux lungz foux saeceij daengj conzdungj dijyuz doxdax hozdung, hawj gak minzcuz ginzcung caenndang daejniemh gij ndei vwnzva、 gij ndei minzcuz、gij ndei swnghhoz, youh engq nyinhdoengz Cunghvaz vwnzva caemhcaiq gamjdaengz miznaj.

Haenqrengz Doidoengh Sevei Hwngfat Ndeiraeuh

Hawj “aen ciet ndeu daiqdoengh bak aen hangznieb” ndaej miz yauq lailai. Mwh “Sam Nyied Sam”, gak cungj hozdung ndei dangqmaz, yinx gyoengq hek ndaw guek rog guek daeuj Guengjsae youz, Guengjsae vwnzva lijyouz hawciengz hoenghhwdhwd, lijyouz ciepdaih vunzsoq caeuq lijyouz souhaeuj saedyienh demmaj, baenz gij rengz haenq doidoengh Guengjsae hwngfat ndeiraeuh. Ciuq gyoebsuenq, 2023 nienz、2024 nienz mboengq “Sam Nyied Sam”, Guengjsae ciepdaih hekyouz faenbied dwg 1360.99 fanh vunzbaez、2353.91 fanh vunzbaez, lijyouz souhaeuj dabdaengz 105.8 ik maenz、205.42 ik maenz, ndaej demlai souhaeuj haemq lai. Lijyouzyez hwnghoengh, ndaej daiqdoengh gwn、youq、gyaudoeng、ndangdaenj minzcuz、cauhguh vwnzva canjbinj、daegsaek huqdoj daengj canjnieb hwngfat, doi hawj ngoenzciet cienzdoengj cienjbienq baenz vwnzva lijyouz siufeiq, dawz gij swhyenz hawsingz caeuq lajmbanj、gingjgih caeuq gvaengh gaiqcawx、gwnzsienq lajsienq ronzroix hwnjdaeuj, hawj vunzlai sawj ngaenz guhcaemz guh- angq, hawj gak cuz ginzcung ndaej demsou baenzfouq.

Laebdaeb gyadaih doiq ndaw doiq rog hailangh. Guengjsae miz henz haij henz dah henz bien、 caeuq Davanhgih doxciep、caeuq Saenamz Cungnamz doxciep、caeuq Dunghmungz doxciep “sam henz sam ciep” gij bienhleih neix, youh dwg aen bakcueng hailangh, hix dwg giz cotsim youqgaenj. Daj 2023 nienz hwnj, Cungguek-Dunghmungz(Nanzningz)Feihvuzciz Vwnzva Yizcanj Couh baenz buek Guengjsae “Sam Nyied Sam” vwnzva lijyouz binjbaiz ndawde hangh hozdung ndeu, doenggvaq “vwnzva + lijyouz + gohgi” aen fuengsik neix, laeb hwnj aen bingzdaiz moq vwnzva gyaulouz dox hagsib Cungguek-Dunghmungz. Bineix “Sam Nyied Sam”, Guengjsae gak goujan haeuj gyaiq ok gyaiq vunzsoq cungjsoq mauhgvaq 16.5 fanh vunzbaez, vunz guek rog ciemq daengz 34%, doengzbeij demsang 6%. Nanzningz、Gveilinz daengj seiq aen goujan caeuq 12 si hingzcwng gihyiz saedhengz 240 aen cungdaeuz gvaq gyaiq mienx ciem cwngcwz, caiqgya cienzdoengj ngoenzciet hozdung, hawj song yiengh neix ndaej yinx hek daeuj lai dangqmaz. “Sam Nyied Sam” rengzrwdrwd doi hawj Guengjsae engq ndei yungzhaeuj ndaw guek rog guek song loek caez baenq, gyavaiq dawz swhyenz ndei、 diegdeih ndei、ciengzgingj ndei cienjvaq baenz cingzyauq hailangh suijbingz sang、hwngfat ndeiraeuh.

Cungj daeuj gangj, Guengjsae aeu “Sam Nyied Sam” aen Cunghvaz vwnzva fouzhauh neix guh ingbaengh, laebdaeb coicaenh gak minzcuz lai baedauq、 lai gyaulouz、haeujlaeg yungzhab, doidoengh gak minzcuz doengzcaez doxgiet haenqguh、 doengzcaez mwnhoengh hwngfat, couqmaenh gij eiqsik Cunghvaz Minzcuz ranz vunz ndeu guh ndaej ndeiraeuh, vih doicaenh laebguh Cunghvaz Minzcuz ranz vunz ndeu yienh ok gingniemh Guengjsae.

【Danhvei bouxraiz: Gvangjsih Minzcuz Dayoz Yigoh Gyauyuz Yozyen. Bien faenzcieng neix dwg duenh cwngzgoj aen goqdaez 2021 nienz Gvangjsih gauhyau daihhagseng swhsiengj cwngci gyauyuz lijlun caeuq sizcen yenzgiu “minzcuz conzdungj ngoenzciet vwnzva yungzhaeuj daihhagseng swhsiengj cwngci gyauyuz yenzgiu——aeu Guengjsae “Sam Nyied Sam Bouxcuengh” guh laeh (hanghmoeg bienhauh 2021LSZ023). 】