Sing byajraez hung ndeu gvaq le, ciep roengzdaeuj couh dwg ciengz fwnraq. Seizsaenz ndei daengz lo, bouxdauh yungh faggiemq raez bek gwnz faex, couh yienghneix, ndangdai Siuh Liengz couh deng vunz ndaw fuengzcug soemh fwn hung ram ok ranz, soengq de daengz giz dieg haem haenx bae. Yaep ndeu, gij singdaej caeuq gij singfwn sawqmwh mbin bae baihdoeng, sawqmwh mbin bae baihsae, diendeih cungj siliengz raixcaix……

It

Siuh Liengz dai le, hawj vunz Mbanjbahlag lau raixcaix, dauqdaej Siuh Liengz ngamq 28 bi. Banhaemh, mehyah de Linz Vaz umj bouxlwg ngamq ndaej bet ndwen haenx, cungj mbouj gamj byaij ok rog dou. Linz Vaz haemhhaemh daej, de cungj ienq Siuh Liengz mbouj hab bae guh diuz goengloh ndawmbanj, mbouj wnggai bae camgya yinx sienq hai bauq. Moix baez fangzhwnzloq, de couh lumj yawjraen ngauq rin hung ndeu at youq gwnz ndang de, lwed noh mong caez. Couh youq mwh de fangzhwnzloq, baihrog miz vunz roq dou lo.

“Yahgux, mwngz singjsingj…… Baihrog lumj miz vunz roq dou ne?” Linz Vaz lau dwk bibuengq bae, de ngauz singj yahgux Siuh Hijminj, Siuh Hijminj couh ninz youq bangxhenz de.

Siuh Hijminj daj iq couh caeuq go de doxing doxbaengh, de caet bi seiz daxboh couh dai lo, doeklaeng daxmeh youh gaijhaq bae mbanjwnq. Baezneix, godaih Siuh Liengz dai lo, de cijndaej baengh go’ngeih Siuh Youh lo. Go’ngeih Siuh Youh ninz youq gyangding, seizneix de cingq ninz ndaek, Siuh Hijminj hwnqdaeuj heuh Siuh Youh.

“Hai dou ha, gou dwg Bauj Lu.” Roq dou dwg boux sai ndeu. Siuh Youh hwnjdaeuj hai dou.

“Yu, go Bauj Lu ha!” Siuh Youh nunu lwgda doiq Bauj Lu naeuz. Bauj Lu youq mbanj gwnz, de caeuq Siuh Liengz dwg baengzyoux ceiq ndei, gyoengqde ndaej noix gwn noix daenj, hoeng mbouj ndaej mbouj youq itheij. Gyoengqde daj iq itheij majhung, caez bae dajgoeng, itheij bae ra baengzyoux mehmbwk gangjgoj, gojyij naeuz dwg boux baengzyoux yien fwngz majhung.

Bauj Lu fwngzgvaz riuj noh caeuq laeuj, fwngzswix gang aen liengj ndeu byaij haeuj ndaw ranz bae.

“Daegnuengx, gou daeuj buenx mwngz ninz geij haemh, gaej nanzgvaq lo.” Bauj Lu naeuz: “Aeu gij doxgaiq neix bae guh siuyeh, mwngz hix geij ngoenz mbouj gwn haeux lo.” Siuh Youh couh bae cauxfeiz guh siuyeh. Gyanghwnz laeg lai, youq mwh Siuh Youh raemj fwnz, daeglan baez doeksaet singj gvaqdaeuj, couh daejnga’nga mbouj dingz.

Linz Vaz umj daeglwg okdaeuj, raen dwg Bauj Lu, caeuq Bauj Lu dongx coenz ndeu. Bauj Lu ndwn hwnjdaeuj, youq ndaw laep yawjraen Linz Vaz byom lumj saenj fwnz roz. Daeglan baez raen Bauj Lu, sikhaek mbouj daej lo. De cungj laihnaeuz dwg boh de dauqma, iet fwngz gvaqbae siengj hawj Bauj Lu umj de. Linz Vaz raen neix raemxda conh lo.

Bauj Lu caeuq Siuh Youh gwn gaen laeujdoj ndeu, Bauj Lu gaenq hwnj naj lo. De uet raemxda doiq Siuh Youh naeuz: “Gaej gvaiq geij bi neix daeuj, gou mbouj caeuq daeggo mwngz baedauq, gou miz gij hojguh gou, daeggo mwngz gaenq baenzgya lo, hoeng gou seizneix lij dwg bouxdog……”

Bauj Lu gangj coenz vah neix, Linz Vaz youq ndaw rug dingq ndaej cingcing cujcuj. Ndawsim Linz Vaz mingzbeg, Bauj Lu mbouj caeuq Siuh Liengz baedauq, yienzaen couh dwg gyoengqde song boux doengzseiz haengj Linz Vaz. Hoeng, Linz Vaz dwg haengj Siuh Liengz, doeklaeng de couh haq hawj Siuh Liengz lo.

Gaeq haen le, Bauj Lu caeuq Siuh Youh cij bae ninz. Linz Vaz dingq gij sing gyaen gyoengqde, de baenzhwnz ninz mbouj ndaek.

Ngeih

Daj Siuh Liengz dai le, Bauj Lu haemhhaemh cungj buenx Siuh Youh ninz, itcig ninz le sam aen singhgiz. Gij fungsug dangdieg dwg bouxdai dai ndaej ngeihcib it ngoenz, vunzranz cij mbouj yungh daenj buhhauq, cij mbouj yungh youq gwnz namh ninz.

Aen gyaranz mbouj miz saenj saeu neix, saedceij couh menhmenh loemq haeuj dieg gungz bae lo. Daengz ndwen laeng, Siuh Youh gietdingh bae Bwzswz dajgoeng, gaijgez gij vwndiz gwndaenj yungh cienz ndaw ranz. Siuh Hijminj caemh bae Gvangjdungh dajgoeng lo, ndaw ranz cij lw Linz Vaz song mehlwg.

Bouxgvan ngamqngamq gvaqbae, seizneix boh- au yahgux song boux youh liz ranz bae dajgoeng, Linz Vaz raen aen ranz engq hoengq lo. Ngoenz ndeu, Bauj Lu dawz song duz max bae ndaw rungh bang Linz Vaz sou haeuxyangz, guh daengz mbwn laep caengj ma ranz Linz Vaz. Linz Vaz cawj byaek caeuz hawj Bauj Lu gwn cij dauqbae. Bauj Lu gwn imq le, de diemj saenj ien ndeu liux cinjbi ma ranz, sawqmwh “ba” sing ndeu daj ndaw ranzdajcawj cienz okdaeuj. Linz Vaz doeksaet yat, youq henz daiz vazmuengz got dawz fajfwngz Bauj Lu. Bauj Lu sawqmwh roxnyinh miz lwed ndatfwdfwd lae gvaq daengx ndang, roxnyinh raeujrubrub. Lwgda de dinghdingh cimyawj Linz Vaz, haujlai nanz, Bauj Lu cij doiq Linz Vaz gangj: “Gou bae yawjyawj dwg gijmaz saeh.”

Yienzlaiz dwg miz duz meuz ndaem ndeu benz hwnj gwnz ringj bae caeg byaek gwn, bungq aen vanj doek roengzdaeuj lo. Bauj Lu naeuz:“Mbouj miz gijmaz, gou dauqbae lo.” Bauj Lu ngamq hwnq ndang, Linz Vaz couh lau dwk ndang hwnj manqgaeq. De siengj doiq Bauj Lu hemq sing ndeu, hoeng youh sou dauqma, yienzhaeuh naeuz:“Mwngz bae ba!”

Bauj Lu rox Linz Vaz gig lau, de nyeux gyaeuj naeuz:“Haemhneix gou mbouj dauqbae lo, gou buenx mwngz youq haemh ndeu!”

“Mbouj mbouj, hawj vunz rox gou couh mbouj ndei lo.” Linz Vaz naeuz.

“Gou ninz gwnz namh gyangding ba! Gou mbouj ciemq daengz fuengz mwngz.”

“Yienghneix…… vunz rox baenzlawz guh?”

“Mwngz cuengqsim, mbouj miz vunz rox ha!”

……

Haemhhaenx, Bauj Lu caen youq ranz Linz Vaz ninz lo. Haetromh mbwn caengz rongh, Bauj Lu couh guhcaeg cing max ma ranz de. Linz Vaz ginggvaq gij dwglau caeuq ranz hoengq, cij caencingq roxnyinh miz bouxsai youq ranz caen ndei. Haemhhaenx, Linz Vaz ninz ndaej ndaek raixcaix.

Saedceij yied ngoenz yied gvaq, ranz Linz Vaz bakdou cungj mbouj gven. Mbwn laep le, miz aen ngaeuz ndeu youq bakdou Linz Vaz baez yaepda couh mbouj raen lo. Geij haemh nduj, Bauj Lu lauxlaux saedsaed ninz gwnz namh, doeklaeng, miz haemh ndeu, de laeglemx byaij haeuj aen fuengz Linz Vaz bae, naeuz:“Gou caen souh mbouj ndaej lo, mwngz ndaej hawj gou caeuq mwngz ninz haemh ndeu lwi? Haemhcog gou caiq ninz gwnz namh.”

“Mbouj, mbouj ndaej yienghneix, gou doiq mbouj gvaq Siuh Liengz.” Linz Vaz coi Bauj Lu ok bakdou rug.

“Youq mwh gou ndij Siuh Liengz roxnaj mwngz, gou couh maij mwngz lo, doeklaeng mwngz haq hawj Siuh Liengz, mwngz rox ndaw sim gou miz geijlai in ha? Doiq Siuh Liengz miz geijlai haemz…… Mwngz couh hawj gou buenx mwngz ninz haemh ndeu ba, aen sim gou couh dai lo.” Linz Vaz unqnyieg, aen ndang de ciepsouh le Bauj Lu, gij swhsiengj fuengzsienq de cungj boedbaih lo.

Seizgan gvaq ndaej caen vaiq, Siuh Liengz dai ndaej seiq ndwen lo. Youq ndwen daihseiq liggaeuq ngoenz cibgouj, couh dwg Linz Vaz lwgnyez rim bi ndeu, Siuh Youh youq Bwzswz dajgoeng dauq lo, doengzseiz hix daiq dahsau ndeu dauq. Siuh Youh guh congz byaek ndei ndeu, heuh boh’au、bohlungz、mehsimj daengj daeuj gwn haeuxcaeuz, Bauj Lu hix mbouj linghvaih. Gyangcongz, lungzsam naeuz: “Gij saeh siengsim gvaqbae lo, daj ngoenzneix hwnj, raeuz angqyangz gvaq saedceij. Ranz raeuz ngoenzneix miz song gienh saeh angq: It dwg Siuh Youh daiq dahyoux dauq ranz; ngeih dwg daeglan ngoenzseng rim bi, gou baenzlawz mbouj angq ne?” Sawqmwh byawz gangj coenz he:“Baenz hawj daeglan an coh luba? Bouxlawz hawj de an ne?” Siuh Youh yiengq vunzlai vad fwngz naeuz:“Gou yawj de lij iq couh mbouj miz boh, dwg boux lwgnyez mbouj roxsoq ndeu, couh heuh de ‘Siuh Dungz’ ba!” Gij vunz youq ciengz cungj bekfwngz hwnjdaeuj, cijmiz Bauj Lu mbouj bekfwngz. Vunzlai bekfwngz dingz roengzdaeuj lo, Bauj Lu naeuz:“Gij mingz neix hix ndei, hoeng daengzcog majhung le hix heuh ‘Siuh Dungz’, gyoengqvunz nyinhnaeuz de dwg boux lwgnyez ciengxlwenx mbouj roxsoq ndeu. Gou yawj, wnggai an de heuhguh ‘Siuh Baujgwz’. ”（1）