Vih lai guh ndei baujhoh caeuq sinsizva guenjleix doxgaiq ciuhgeq sawgeq dieg cunghgyau hozdung, doidoengh cienzciep caeuq hwngfat conzdungj vwnzva yizcanj, 5 nyied 15 hauh, Swcigih Minzcunghveij cujdiuyenz daengz Fuconh Yauzcuz Swciyen guh cienhangh diuyenz.

Cujdiuyenz cunz le Fuconh Cwngzbwz Cin Ginhsanhcanzsw、 Sojsuijsw, Fuyangz Cin Hungzyangzsw daengj dieg cunghgyau hozdung, diuyenz cingzgvang cingjleix、baujhoh caeuq sinsizva swhyenz guenjleix wngqyungh gij beigaek、cungdingj、cunghgyau sawging、 yihyoz saw ginghdenj daengj doxgaiq ciuhgeq sawgeq louz roengzdaeuj haenx.

Cujdiuyenz ceijok, baez diuyenz neix doidoengh cunghgyau vwnzva yizcanj baujhoh caeuq seizdaih doxciep, doenggvaq suswva soujduenh hidungj yo doxgaiq ciuhgeq sawgeq dijbauj, mboujdan ndaej saedyienh vwnzva yizcanj ciengxlwenx louz roengzdaeuj, engq ndaej coicaenh swhyenz caemhyungh, vih yozsuz yenzgiu、 vwnzva cienzciep daezhawj cengjdaemx. Doengzseiz giengzdiuh, gak mizgven bouhmonz aeu lai fuengmienh lienzdoengh, giethab dangdieg saedsaeh, dingh fueng’anq sinsizva guenjleix gohyoz, coenghrengz laebhwnj gihci guhhong daengx lienhdiuz “suswva + baujhoh + wngqyungh”.

Gaenlaeng, Fuconh yaek aeu baez diuyenz neix guh seizgei, lai laeb ndei gihci guenjleix dieg cunghgyau hozdung, gyalaeg hwnqguh sinsizva baujhoh doxgaiq ciuhgeq sawgeq, hawj coicaenh minzcuz doxgiet、 cunghgyau huzndei、 vwnzva mwnhoengh engq miz rengzhoengh moq, sij bien moq hong minzcuz cunghgyau seizdaih moq.

(Vangz Cunghgen/黄宗健)