Vunzcungnienz naeuz: “Mbouj youqgaenj mbouj youqgaenj, song dah lwgnyez baenzneix nyinhcaen yunghsim doegsaw, gou soengq sou baema hix suenq dwg gou ok di rengz bangcoh ma!”

Gangj sat, de couh dwk denva heuh song dah lwgsau daeuj riuj daehsaw roengz henz loh bae cang haeuj gyaq ci ndeu bae.

Ci neix dwg cungj ci maqhuz hung ndeu, saek ndaem cab di lamz, moqsaksak, Liuz Fanghfangh caeuq Vangz Meijyen song fwngz lumh bae lumh dauq, vunzcungnienz riu naeuz: “Aen ci neix ndei mbouj?” Liuz Fanghfangh naeuz: “Ndei lai lo, aeu geij fanh maenz cij cawx ndaej?” Vunzcungnienz riugoekgoek, Vangz Meijyen hozhaenz naeuz: “Miz ci fuengbienh lai lo, gyaez bae gizlawz couh bae gizlawz.” Vunzcungnienz naeuz: “Baezlaeng sou hix cawx cungj ci neix, hai daengz daengx guek gak dieg bae guhcaemz.” Vangz Meijyen naeuz: “Dou ndaej cawx cungj ci baenzneix ndei ha? Dang lauxbanj cij cawx ndaej.” Liuz Fanghfangh naeuz: “Gou raen aen ci mwngz ceiq ndei lo, gou yawj mbouj miz aen ci lawz beij aen ci mwngz ndei.” Vunzcungnienz riu naeuz:“Mwngz hauhneix gangj, gou rimhoz dangqmaz, hwnj ci lo.”

Vunzcungnienz hawj daxmeh Vangz Meijyen naengh baihlaeng de, daj gingqfanjciuq yawjraen song dah lwgnyez lumj song duz roeg nei muenghyawj rog cueng. De cam: “Song boux siujbaengzyoux dwg baez daih’it daeuj Nanzningz?” Liuz Fanghfangh naeuz: “Dwg ha, Nanzningz gizgiz cungj ndeiyawj.” Vunzcungnienz naeuz: “Ndeiyawj gou couh hai ci menh di.” Vangz Meijyen coi naeuz: “Mwngz menh daengz seizlawz bae, dou dungx iek yaek dai lo.” Vunzcungnienz nyaenx mbouj ndaej “ho ho ho” sing hung riu hwnjdaeuj, yawjraen baihnaj “Hom Gag Daeuj Bouqhaeux Hung” couh hai ci haeujbae, daengx ci youq gvangjcangz.

“Roengz ci gwn haeux ya.” Vunzcungnienz heuh. Vangz Meijyen dou ci hai mbouj ok, vunzcungnienz riu naeuz: “Mbouj gaenj, naenx giz gaet haenx, gaem lahsouj rag coh mwngz.”

（29）