It：Dauq Ranz

Daxboh youh dwk denva daeuj lo.

Denva dwg mehyah gou ciep. Daxboh youq ndaw denva naeuz, bet nyied cibngux yaek daengz lo, muengh gou caeuq mehyah dauqma ranzmbanj caeuq de gvaq ciet. Daxboh lij youq ndaw denva naeuz bae naeuz dauq, bineix duzbit ndaw ranz maj ndaej gig biz, neix dwg aenvih geij raq fwn laeng seizcou haenx, hawj raemx Dahgvangh mbouj mboekhawq, hawj gyoengq bit ciengx youq henz dah haenx ndaej lai gwn di mez, yienghneix duzbit cix maj ndaej ndei. Daxboh lij naeuz, boux beixnuengx youq Byamiuz haenx gaeb ndaej duz haet ndeu soengq daeuj hawj de, seizneix ciengx youq ndaw roengq, caj dou dauqma guhdoih gwn.

Daxboh gangj geij yiengh saeh neix dwg muengh dou gaejbah nyaengq lai gonq, dauq ranz caeuq de doxcomz. Daxmeh gvaqseiq liux, ndaw ranz lw daxboh boux vunz dog. Dou goj yaek ciep de haeuj ndaw singz daeuj, hoeng de yiem youq mbwq lai, aenvih mbouj miz vunz caeuq de gangjgoj guhcaemz, mbouj geij ngoenz cix heuh ma lajmbanj lo. De naeuz, ndaw sim de cuengq mbouj roengz geij moux reihnaz ndaw ranz haenx, engq cuengq mbouj roengz daxmeh haem youq ndoeng go’ndoek ranz baihlaeng haenx. Daxboh guh gvenq hongreih hongnaz gvaq, mbouj gyaez youqndwi. Daxboh bineix ndaej roekcib bi yaq, de guhhong lij ak lij gyaek dem, gij reihnaz ndaw ranz de cungj ndaem doenghgo, cienzbouh guh liux mbouj lw saek gaiq. Dou naeuz de de caemh mbouj dingq, de han naeuz de rox raeuz gwn imq sawj doh, hoeng bouxguhnaz lawz cix miz gij dauhleix mbouj guhhong ne? De youq ndaw denva daengq son gou naeuz: “Bouxguhnaz seizlawz ndaej yietnaiq? Daengz ngoenzdai moek haeuj ndaw namh bae caengj ndaej.” Gij neix dwg gij caenleix de nyinhdingh haenx.

Mwh gou caeuq mehyah dauq daengz ranz, daxboh gaenq gaj bit ndei gvaq. De naeuz, duzhaet baez gaj ndei cix cauj caengj ndei gwn, dou song bouxsai cix dawz duzhaet daeuj gaj.

Haemhde, gwn gvaq caeuz le, dou buen aencongz haeuj gyanghongh bae yawj ronghndwen. Dou baek diuz yieng ndeu coh baih aenmoh daxmeh, baij ndei di bingjcibhaj、lwgmak caeuq diengz, caemhcaiq raix di laeuj caz dem. Guh liux gij neix, dou cungj hoznet raixcaix, aenvih dou roxndeq daxmeh banneix gaenq caeuq gyoengqdou caemh ndwn youq gizneix yawj ronghndwen.

Dauqngeix daxmeh, dwg daxboh dwen gonq. Daxboh gangj le haujlai saeh ciuhvunz daxmeh. Dingq le, gou cim coh ronghndwen, cim bae aen ronghndwen lumjbaenz aen giuz laux mong，ndawde miz raemx fubfed.

Haet daihngeih dou cix dauq ndaw singz. Youq ndaw ranz byaij bae byaij dauq mbouj raen daxboh, mwh ngamq naemj okdou bae ra daxboh, de cix nyoengx dou byaij haeujdaeuj, gwnz din dwg namhboengz gyanh, byoemgyaeuj mbangbyagbyag doxgeux de dumz caez, najbyak cix lai lwenq di. De ce gyoi roengzdaeuj, daj ndaw- de dawz ok geij bog duh, dwg duh de gag ndaem, mbouj dwk vafeiz caeuq ywnon nauq, hawj dou dawz bae cimzcimz, de boux vunz ndeu gwn mbouj liux.

Cuengq ndei duh, de youh daj ndaw rug dawz aen daehnizlungz ndeu okdaeuj, dwk gij doxgaiq ndaw daeh haeuj sienglaeng aenci bae, aensieng yaek coux mbouj ndaej caengj daengx roengzdaeuj.

De naeuz, doenghgij doxgaiq cungj dwg huq ndei ndaw ndoeng, miz raet caeuq ywbouj, dawz bae rung raemxdang gwn gig ndei. Yawj ndaej ok gij doxgaiq neix cungj dwg de daegdaengq bwh ndei. Dauq daengz ndaw singz, mwh dou beuj doxgaiq ndaw ci, raen aen daeh ndaem ndeu, mehyah geizheih dwk hai yawj, ndawde dwg song cien maenz ngaenz, dwg gou haemhlwenz aeu hawj daxboh, de mbouj noix saek faen youh soengq doxdauq.

Ngeih：Cousou

Bet nyied cibngux gvaq caengz nanz, daxboh youh dwk denva daeuj.

De naeuz haeux ndaw ranz sou liux gvaq, bineix mbouj deng nonhaih, haeux baenz dahraix, coenzhauq angqyoekyoek de lumjnaeuz yaek daj ndaw denva saet okdaeuj diuq foux angq hawj vunzlai nei.

Daxboh naeuz, de yaek soengq di haeuxniu ndaw ranz daeuj hawj gou, gou raen mbouj yungh, cix doi naeuz mbouj aeu. Hoeng de lij yaek soengq daeuj dem, gou cix hozndat lo. Mehyah cix doq ciengj denva gvaq bae, riunyumnyum caeuq daxboh doxgangj.

Cuengq denva liux, mehyah hongz gou naeuz, daxboh ndiep raeuz caengj soengq haeuxniu daeuj, mwngz gaej hawj de doeknaiq, mwngz lij hozndat dem, mbouj baenz bw.（1）