Cunghgung Cunghyangh cungj- suhgi、guekgya cujsiz、Cunghyangh Ginhveij cujsiz Siz Ginbingz mboengqneix doiq hong bienguh aen gviveh “cibhaj haj” guh cijsi youqgaenj daegbied naeuz, gohyoz dinghguh caeuq laebdaeb hengzguh haj bi gviveh, dwg diuz gingniemh youqgaenj dangj raeuz guenj guek dawz gienz, hix dwg gijndei cwngci youqgaenj sevei cujyi miz gij daegsaek Cungguek. Bienguh caeuq hengzguh aen gviveh “cibhaj haj”, caeuq doekguh baijbouh aen canloz Ngeihcib Daih Dangj liuxliux、doihaeuj yendaiva yiengh Cungguek miz yungh lailai. Aeu dingh gohyoz gezcwz、minzcuj gezcwz、ciuqfap gezcwz, aeu caengzdingj dajveh caeuq cam bouxminz aeu geiq doxgyonj hwnjdaeuj, gyaak diuyenz lwnhcingq, lai comz doxrox, lai dingq bouxminz ginzcung caeuq ndawbiengz gak baih yaek naeuz maz、miz maz naeuz, lailai sou aeu gingniemh singjsien ganbu ginzcung mwh saedguh cauhguh de, yawjnaek moegbiu yinvu caeuq cwngcwz banhfap caezcienz dox boiqhab, ndeinduemq guh baenz hong bienguh gviveh.

Guek raeuz yaek youq bi 2026 hainduj hengzguh aen gviveh “cibhaj haj”, seizneix Dangjcunghyangh cingq cujciz dajgauj gij genyi aen gviveh “cibhaj haj”. Ciuq gij cingsaenz cijsi youqgaenj Siz Ginbingz caeuq hong dajgauj genyi gviveh anbaiz, mizgven bouhmonz mboengqneix yaek doenggvaq lai roenloh cam’aeu gij yigen genyi ganbu ginzcung、lauxcangh yozcej daengj doiq bienguh aen gviveh “cibhaj haj” haenx.

（daj Sinhvazse aeu daeuj hoiz）