Gveigangj Si Bingznanz Yen Daanh Cin dwg “Aen Yangh Diuhguengj- doeng”, vunzlai dieg de cungj maij yawj Heiqguengjdoeng. Heiqguengjdoeng Daanh daj gij heiq、yinhyoz Guengjdoeng bienq daeuj, daiq miz gij daegsaek Bingznanz Yen, daengz seizneix gaenq miz 150 lai bi lizsij lo.

Gangj daengz Heiqguengjdoeng Daanh couh yaek daj Cingciuz cunggeiz geizlaeng hainduj gangj lo. 19 sigij geizlaeng, daihbuek bouxseng’eiq Guengjdoeng nyig diuzdah coh baihsae daeuj daengz Guengjsae, Heiqguengj- doeng couh riengz dwk cienz daengz Bingznanz Yen Daanh Cin. Cingciuz Gvanghsi samcib it nienz, Guengjdoeng “Handaihbingz”aen ban Heiqguengjdoeng vunzsai daengz Daanh Cin biujyienj 《Seiq Boux Cinsw》《Roek Guek Fung Sieng》daengj heiq. Canghheiq Heiqguengjdoeng Lij Vwnzmau youq Bingznanz Yen sou hagseng son dinfwngz, hawj engq lai vunz rox Heiqguengjdoeng Daanh. 20 sigij cogeiz, Heiqguengjdoeng hwngfat vaiqvit, youq gwnzbiengz miz le lai aen heiqduenz. Vihle yienjheiq engq bienh, 1954 nienz, lai aen heiqduenz Heiqguengjdoeng gapbaenz Aen Duenz Heiqguengjdoeng Daanh. Daj seizde daengz goujcib nienzdaih, Heiqguengjdoeng Daanh haeuj daengz mwh hwngfat youqgaenj de, seizde ok le haujlai cit heiq cienzdoengj caeuq heiq gagbien. Seizneix, Bingznanz Cin、Daanh Cin、Danhcuz Cin、Swhvang Cin laeng Bingznanz Yen lij miz doengh aen donz Heiqguengjdoeng swhgeij, lumjbaenz Gunghcouh Yisuzdonz、Sinhswngh Yisuzdonz daengj.

Heiqguengjdoeng Daanh yienznaeuz daj gij heiq Guengjdoeng bienq daeuj, hoeng, nanz le hix gag miz gij funghgwz daegbied swhgeij. Gij diuh de cawjdaeuz dwg “banghvangz”, ce miz mbangj aen diuh Diuhgunhsanh caeuq sing mehmbwk Diuhyiyangz, ndawde yungzhaeuj siujdiuh fwen deihfueng. Mwh biujyienj cix gangj vahdeihfueng Guengjdoeng. Cawjdaez engq lai dwg lwnh lizsij, lumjbaenz 《Daiyi Moek Va》《Suh Vuj Langh Yiengz》《Gvanh Hangingh》 daengj heiq cienzdoengj, caemhcaiq bien gij heiq yienhdaih, lumjbaenz 《Haenh Fwjhaemh》《Rizyaenq Daanh》daengj heiq, yienh’ok gij fungheiq moq gwnzbiengz. Cungj heiq neix yungh yangzginz、gauhhuz、moegnyawz daengj yozgi cienzdoengj, cix yungh dadizginz、sazgwzswh daengj yozgi guekgya baihsae, gig miz daegsaek.

Gyawj geij bi neix, Bingznanz Yen Cwngfuj douzngaenz bangrex、hwnq dieggiek daengj bang Heiqguengjdoeng Daanh hwngfat. Gij heiq neix ciepcienz daengz seizneix lij yaek baengh buek canghheiq nienzlaux ndeu. Gyoengqde gapbaenz heiqduenz, gag ok ngaenz、ok yozgi, bae daengz hagdangz caeuq lajmbanj doigvangq Heiqguengjdoeng, dazyinx bouxoiq hag heiq. Bouxoiq caemh cengheiq, gyoengqde lai baez riengz canghheiq laux hwnj daiz biujyienj, aeu hengzdoengh ciepcienz vwnzva feihyiz.

Youq yienhdaih, Heiqguengjdoeng Daanh mbouj duenh cauhmoq gij cawjdaez caeuq hingzsik. 2021 nienz, Gunghcouh Yisuzdonz biujyienj le cit heiqyinhyoz 《Rizyaenq Daanh》, hawj vunzlai bekfwngz hemq ndei. Cit heiq neix aeu “aen sibsug gvihraemx Daanh”（cietsiufuengz）guh beigingj, gangj gij gojgaeq cawx、yo、gouq、yungh gvihraemx laeng seiq aen seizgeiz gwnz lizsij, sei gij saeh Veiz Cizcun、Siz Huz daengj yinghyungz, haenh bouxgungcanjdangj caeuq vunzlai you guek you minz、genhciz gwzming、mbouj lau dai、ak okrengz. Cit heiq neix gij daegsaek deihfueng naekna, miz caencingz, doeklaeng aeu ndaej“Heiq Cungguek”aen ciengj heiq ndei 2021 nienz. 《Rizyaenq Daanh》 okmingz lo, engq lai vunz rox le Heiqguengjdoeng Daanh. Bi 2022, Daanh Cin baengh Heiqguengjdoeng、heiqbeixvaiz daengj yisuz gwnzbiengz aeu ndaej aen mingzdaeuz“Aen Yangh Yisuz Vwnzva Gwnzbiengz Cungguek”, vwnzva lijyouz doxyungz miz le yaugoj. Heiqguengjdoeng Daanh biujyienj caeuq cietsiufuengz、seizcin baeyouz daengj hozdung cienzdoengj doxgap, yinx daeuj geij fanh hekyouz. Heiqguengjdoeng Daanh cix bienqbaenz mbaw mingzben vwnzva dieg de.

Heiqguengjdoeng Daanh bak geij bi neix, couh dwg bouh sei lizsij vwnzva doxyungz. De daj gwnzbiengz fat daeuj, canghheiq laux genhciz cienzson, bouxoiq roengzrengz ciepcienz, aeu cauhmoq guh bwnh, lumj citheiq《Rizyaenq Daanh》 yienghneix hamjgyaiq cauhmoq, hawj cungj heiq gaeuqgeq neix youq seizdaih moq hoenghfwdfwd.

（Saw、doz daj Gvangjsih Feihvuzciz Vwnzva Yizcanj Vangj、Nanzningz Si Minzcuz Vwnzva Yisuz Yenzgiuyen aeu）