Daxheiz raen gou baenz iq gyaep nou coemj nou baenz ak, engq gyaezgyoh gou, mizseiz ndaw ranz mbouj miz geijlai noh mou, de cungj sij mbouj ndaej gwn, dou duzmeuz mbouj gwn nohbiz, de aeu cax heh gij nohcing okdaeuj, naihsim aeu cax cab soiq, gyaux ngaiz hawj gou gwn.

Gwn ndei ninz raeuj, youh miz vunz gyaezgyoh, gou ciemhciemh majhung lo, ndang cangq miz rengz, mboujdanh coemj ndaej noulwg, nouhung hix coemj ndaej lo.

Haemh ndeu mbwn fuemx, gou youq baihrog guhcaemz dauq ranz, haeuj ranz couh rox daengz gij heiq duznou, gou rox laj gvih miz nou ndoj gizhaenx. Gou riengjret bongh gvaqbae, raen duz nou hung ndeu song da hujdengdeng muengh coh gou. Gou cung gvaqbae, iet nyaujnaj coemj dawz duz nouhung, aj bak haebdawz lajhoz duzde, duzde in dwk swenj dai swenj lix, haenqrengz siengj cak deuz, loengh dwk aen bak iqet gou cungj yaek dingj mbouj ndaej lo. Duz nouhung neix mbouj rox geij nanz mbouj ndaej gwn doxgaiq lo, aen dungx mboepmbepmbep, hoeng de lij gig mizrengz, gou aeu naemj geiqmaeuz coemj de cijndaej.

Naemj daengz neix, gou aj bak cung coh duz nouhung neix bae, doiqlaeng geij yamq, yienzhaeuh youh caiq cung gvaqbae haebdawz duzde, yienghneix baebae dauqdauq, mbouj yaepciuq, duznou couh deng gou haeb sieng lo, hoeng de lij siengj raih bae. Duznou duzhaih neix, bouxcawj haemz, gou caemh haemz, gou gamzdawz duz nouhung neix, buet ok gyanghongh, loengh duzde guhcaemz. Gou hawj duznou raih bae, baenq gyaeuj gvaq mbiengj wnq bae, gyajcang yawj mbouj raen nei. Caj duznou raih bae gyae di le, gou youh ganj baenaj aeu song cik nyaujnaj gvaek doxdauq. Loengh duzde yaek dai le, gou couh haebdawz aen gyaeuj de, nyaij soiq ndwnj roengz dungx bae.

Haj

Daxheiz raen gou noulwg nouhung cungj coemj ndaej, angq raixcaix, vunz baez daeuj ranz guhcaemz gangjgoj, de couh angqfwngfwng naeuz：“Baezneix cungj suenq ciengx meuz baenz lo, gaej yawj meuzlwg ranz gou iq, de gyaep nou coemj nou gig ak bw.”

Gyoengq vunzmbanj ok rog dajgoeng, reihnaz cungj vut fwz, daxheiz gvanbaz couh aeu gij reih hoengq daeuj ndaem haeux ndaem lwgduh. Ndaw ranz miz haeux lai, duh hix lai, nou cungj ndonj haeuj ranz daxheiz daeuj caeg gwn. Loengh dwk daxheiz haemh cungj ninz mbouj ndaek, mizseiz hix mbouj ndaej mbouj hwnqdaeuj gyaep nou.

Daxheiz aeu hwnq romh guhhong, haemh ninz mbouj gaeuq gyaeuj ngunh da raiz. Yienghneix cixbah, duznou gwn imq gwn doed dauqcawq oknyouh okhaex, loengh dwk ndaw ranz gizgiz haeufwgfwg, moix haet daxheiz cungj aeu sai aen lai cungdaeuz baet haexnou, swiq nyouhnou, cijndaej bae cawj gwn guh hong wnq.

Daxheiz gaenq bae haw cawx duzmeuz ndeu daeuj coemj nou. Mbouj rox vihmaz, duz meuz haenx mbouj dwg lau vunz doeng buet sae ndoj, couh dwg mbouj gwn doxgaiq, gvaq geij ngoenz couh dai bae lo.

Daeglwg daxheiz youq rog dajgoeng, daengz ndwencieng dauq ranz, de moix haemh hix deng gyoengq nou nyauxluenh dwk baenzhwnz ninz mbouj ndaek, de doiq daxheiz naeuz:“Meh, gou bae haw cawx meuz daeuj ciengx, baezneix mbouj saenq ciengx mbouj baenz.”

Daeglwg daxheiz cawx ndaej song duz meuzlwg dauqma, riu naeuz:“Baezneix cawx ndaej song duz meuzlwg, duz neix ciengx mbouj baenz, duz de ciengx baenz.”

Vunz suenq mboujyawx mbwn suenq, gvaq seiq haj ngoenz, song duz meuzlwg hix dai bae lo.

Laebdaeb ciengx sam seiq duz meuz cungj dai bae, sai cienz mbouj gangj, vunz cungj riu naeuz:“Cawx baenz gyoengq meuz daeuj ciengx, cungj mbouj baenz saek duz, miz goj gangj lo.” Daxheiz dingq le, miz di doeknaiq.

Gou daeuj daengz le, ciemh ngoenz ciemh hung, ndang cangq miz rengz, hix gig caenhrengz gyaep nou coemj nou, daxheiz daengx ranz dangq gou lumj boux vunzranz nei, miz maz doxgaiq ndei gwn cungj hawj gou gwn.

Daxheiz daengx ranz doiq gou baenz ndei, mizseiz, gou nyaenx mbouj ndaej naemj hwnj Daeglinz, mbouj rox de seizneix saedceij gvaq ndaej baenzlawz yiengh?

Roek

Ndwenngoenz lumj daeuq bongh, ngoenz ndeu, miz vunz roengz mbanj daeuj, doiq daxheiz song gvanbaz naeuz:“Ranz sou bineix ndaej cwngfuj banggungz, gaxgonq ndaw mbanj beixnuengx vut gij reihfwz haenx, sou goj ndaej dawz daeuj ndaem mak, seizneix baihgwnz ndaej buek miuz makgam hawj sou ndaem, lijmiz bouxdinfwngz roengz mbanj haeuj ranz daeuj son sou baenzlawz ndaem, baenzlawz ganq, daengz mwh mak ndaej sou le, cwngfuj lij bang sou mak, mbouj yousim mbouj miz dieg gai.”

Cwngfuj guhcawj, hawj diuz loh rongh byaij, hawj diuz loh canhcienz byaij, daxheiz song gvanbaz angqfwngfwng, nyaengqnyaennyaen cingj vunz gvak reih vat gumz ndaem makgam.

Daxheiz doiq bouxgvan naeuz:“Ndaem mak sat lo, gyoengq beixnuengx guhhong sinhoj，ngoenzneix gou bae haw lai cawx di doxgaiq dakdaih gyoengqde.”

Daxheiz naengh cidienh daeuj daengz gwnzhaw, bae hangznoh cawx geij gaen ndokmou, cawx geij gaen nohcwz, youh cawx ndaej song duz byavanx hung. Daxheiz riuj doxgaiq cingq yaek hwnj cidienh, raen mbouj gyae gizhaenx miz vunz gai gaeq, gyoengqvunz cungj comz gvaqbae ndaetfwdfwd, lauxbanj gaeb gaeq caengh gaeq nyaengqnyaennyaen.

“Lauxbanj, gij gaeq neix gaen geijlai ngaenz？”Daxheiz caenx haeuj ndaw vunzlai bae, cam boux lauxbanj gai gaeq haenx.

“Gaen cibsam maenz, mwngz aeu duz lawz, gou gaeb hawj mwngz.” Lauxbanj nyaengq caengh gaeq hawj vunz, gyaeuj hix mbouj ngiengx dwk han.

Daxheiz muengh boux lauxbanj gai gaeq neix, fwt roxnyinh youq gyawz raen gvaq, youh seizndeu geiq mbouj hwnj, de moenghmangh lo, dinghdingh ndwn youq gizhaenx gwq muengh gwq naemj.

Boux lauxbanj gai gaeq neix, cingq dwg bouxcawj gaxgonq gou Daeglinz.

“Ya, dwg mwngz ha, daxheiz, gou ra mwngz haujlai nanz lo, geij bi gonq mwngz daeuj neix caeuq gou cawx duz meuzhenj iq ndeu gvaq ne.”Daeglinz dingz gij hong gwnzfwngz, riunyumnyum byaij coh daxheiz.

“Duz meuzhenj iq gou seizneix baenzlawz yiengh lo? Daj gai hawj mwngz le, gvaqlaeng gou gig ienqhoij, gig siengj ra mwngz dawz de dauqma. Seizneix saedceij ngoenz beij ngoenz gvaq ndaej ndei, gou engq niemh de, gig siengj raen de, geijlai maqmuengh de dauq ranz henhoh aen gyaranz gou, henhoh gij gaeq gou ciengx haenx.”Daeglinz naeuz.

Caengz caj daxheiz dapvah, Daeglinz gaenq laebdaeb gangj baenz foengq vah daeuj. Seizneix daxheiz cij singj gvaqdaeuj, boux lauxbanj gai gaeq neix, couhdwg bouxcawj gai meuz hawj de haenx.

“Daegnuengx, mwngz cuengqsim, duz meuzhenj youq ranz gou gvaq ndaej gig ndei, de gaenx coemj nou, coemj nou hix daegbied ak, seizneix ranz ndaw ranz rog cungj mbouj miz nou lo, lienz ndaw mbanj gij nou cungj deng de coemj yaek raeg liux, vunzmbanj cungj naeuz, danghnaeuz ndaw mbanj miz song duz meuz yienghneix, duznou cungj dairaeg lo.” Daxheiz riu dwk doiq Daeglinz naeuz.

“Vah naeuz gyawj bya gwn bya, gyawj raemx gwn raemx, geij bi neix, gou youq ndaw bya dap bungz ciengx gaeq, souhaeuj caemh mbouj noix, hoeng ceiq hawj gou gyaeuj in couhdwg, haujlai noubya ndonj daeuj caeg gaeq gwn cixbah, lij haeb dai haeb sieng haujlai duzgaeq, gij meuz gaxgonq ciengx haenx mbouj gaenx coemj nou geijlai, mbangj duz mbouj coemj nou couh suenq, lij caeuq duznou doxdaeuq guh’angq dem, gou raen le hozndat yaek dai. Seizneix gou nyienh ok gyaqcienz sang hawj mwngz, cawx duz meuzhenj iq dauq ranz coemj nou, henhoh duzgaeq.”

Daxheiz dingq Daeglinz gangj le, riuhehe mbouj guhsing.

Daeglinz gip lo, de byaij gaenh daxheiz, yaeng’yaeng naeuz:“Daxheiz, gaxgonq gou gai meuz henj iq hawj mwngz ngamq ngeihcib maenz ngaenz, seizneix gou nyienh hawj mwngz song bak maenz ngaenz, roxnaeuz caiq lai di cienz cungj ndaej, mwngz couh doiq duz de dauq hawj gou ba.”

Daxheiz dingq le, lijdwg riuhehe mbouj guhsing.

Daeglinz engq gip lo, de gaemhdawz song fwngz daxheiz ndaetndaet bae, sing hung naeuz：“Daxheiz，gou hawj mwngz cien maenz, roxnaeuz song cien maenz cungj ndaej, cijaeu mwngz dapwngq doiq duz meuzhenj hawj gou!”

“Daegnuengx, seizneix mwngz saedceij ndei gvaq, gou caensim hoh mwngz, gawqyienz mwngz baenzneix niemh duz meuzhenj, gou couh doiq hawj mwngz ba.”Daxheiz naeuz.

Caet

Ngoenzhaenx, Daeglinz daeuj daengz ranz daxheiz, gou baez muengh couh nyinh ok de lo. Geij bi mbouj raen, gou mbouj caiq ienq Daeglinz gaxgonq ngah cienz gai gou, gou cung haeuj ndaw rungj de bae, aeu aen gyaeuj iqetet gou ngad gavaq de, Daeglinz hix aeu fwngz lumhlumh aen ndang gou, ndaetndaet dwk got gou haeuj ndawrungj bae, sing unq naeuz:“Henj, ngoenzneix gou coux mwngz dauq ranz raeuz.”

Daeglinz yaek dawz gou dauqbae lo, de dawz dab ngaenz ndeu okdaeuj ndenq hawj daxheiz, naeuz: “Neix dwg song cien maenz ngaenz, docih mwngz ciengx hung duz meuzhenj, docih mwngz doiq duz meuzhenj hawj gou.”

Daxheiz naeuz: “Dwg meuzhenj hawj raeuz roxnaj, roxnaj couhdwg yienzfaenh, miz yienzfaenh couhdwg beixnuengx, beixnuengx ranz ndeu couh mbouj gangj song yiengh vah, meuzhenj couh soengq hawj mwngz ba, mbouj aeu ngaenz lo.”

“Seizneix miz cwngfuj bang gou, gou youq ndaw rungh ciengx gaeq hix ndaej ngaenz, mwngz couh aeu di ngaenz ba.”

“Mbouj aeu lo, ngoenzlaeng raeuz lij baedauq lai, muengh mwngz ndeindei ciengx duzmeuz.”

Song bouxcawj gou youq rog ranz doi bae doi dauq, gou roxnyinh simhai lai lo. Guekgya cwngcwz ndei, hawj gyoengqde song ranz bouxboux fatcaiz, angq dwg gou caenda caenndang raen gij bienqvaq ndei gyoengqde, gou mbouj rox gangj gijmaz, maqmuengh songde saedceij yied gvaq yied ndei.

（2 sat）