Vih gikfat rengzhoengh hwngfat minzyingz ginghci, daezswng giyez yendaiva ceihleix suijbingz, doidoengh minzyingz ginghci hwngfat ndei， 5 nyied 8 hauh, Denzdungh Yen hai aen hoih beizyin guenjleix minzyingz giyez bi 2025, daengx yienh 108 aen minzyingz giyez daibyauj camgya hai hoih.

Gwnz hoih, boux conhgyah hopndaet hwnqguh byauhcunjva giyez guenjleix dijhi、 fuengzre caizvu fungyiemj daengj haedsim yidiz, buqcek denjhingz anqlaeh, aeu gij vah yungzheih rox gangj gij dauhleix laeg okdaeuj, son gij banhfap guenjleix miz leix caeuq baenz yungh haenx hawj giyez. Guekgya Ginhyungz Genhduz Guenjleix Cungjgiz Denzdungh Genhgvanj Cihgiz hopheux gaijndei gihci yungzswh giyez iq, fuengzre ginhyungz hozdung mbouj habfap daengj neiyungz lwnhgangj cwngcwz, bang giyez cukmaenh ginhyungz ancienz fuengzsienq. Denzdungh Nungzcunh Sanghyez Yinzhangz gejdoeg dingciva ginhyungz cwngcwz caeuq doigawj canjbinj, vih giyez yungzswh aeuyungh cingcinj “dawz meg hai fueng”, coenghrengz buqgej dieg gaeb hwngfat.

Baez beizyin neix aeu aen vunqsik sam yiengh gap baenz aen “cwngcwz + saedguh + fuzvu”, laeb aen bingzdaiz hagsib gyauliuz caeuq swhyenz doiqciep hawj minzyingz giyez. Daj guenjleix yauqnaengz daezswng daengz coenghrengz ginhyungz fuzvu, daj fuengzre fungyiemj yawhgingj daengz gaemdawz seizgei hwngfat, gij banhfap coenghrengz cienzmienh haenx yaek haenqrengz doidoengh Denzdungh minzyingz ginghci coh aen fuengyiengq caetliengh engq ndei、 engq miz gij rengz doxdax byaij baenaj. (Yauz Dunhboh/姚敦波)