Vunzmbwk biz dawz geij aen daeh hwnjdaeuj, vunzcungnienz miz di hozndat, song dah lwgsau boux umj bog daehnaengngwz hwnj haj laeuz daeuj, vunzcungnienz doiq song dah lwgsau naeuz: “Bang song boux siujhagseng cang song dong saw haeuj daeh bae.” Seiq boux vunzseng’eiq caeuq de nienzgeij doxdoengz haenx daeuj ra de, de couh daiq gyoengqde bae baihde giz venj dozveh haenx yawj yienghsik doiq.

Daxmeh Vangz Meijyen dawz soujgih yungh veizsin dwk ngaenz saw hawj vunzmbwk biz, haj roek boux hek humx henz daiz deq hawj ngaenz saw, song dah lwgsau baez bonj baez bonj saw cang haeuj daeh bae, moix daeh cang mbouj rim, song fwngz dawz bakdaeh niuj geij niuj aeu baengzgyauh nem baenz diuz gaenz ndeu, byai gaenz youh ut roengz di gaenjsaed, vihle riuj daeh hwnjdaeuj mbouj lotfwngz. Liuz Fanghfangh sawq riuj hwnjdaeuj, gig naek, daxmeh Vangz Meijyen cam vunzmbwk biz aeu song gonj bit hawj song dah lwgnyez gag sij mingzcoh youq gwnz daehsaw swhgeij.

（Ngeihcib）

Vunzcungnienz yamq hung byaij gvaqdaeuj raen song dah lwgnyez naengh youq gwnznamh henz daehsaw, cam: “Song boux siujbaengzyoux naengh gwnznamh nit lai lo.” Song dah lwgnyez mbouj leixlangh, vunzcungnienz youh daeuq naeuz: “Song boux siujbaengzyoux miz gijmaz sihyau gou bang?”

Vangz Meijyen fwt ngiengx gyaeuj yawj vunzcungnienz：“Mwngz ndaej coengh dou?” De buenq saenq buenq ngeiz cam. Haxbaenh daxmeh de yousim baenzlawz daeh ngeihcib bet daeh saw baema, “dou mbouj miz cienz gwn haeux hix mbouj miz cienz dawz gauhneix saw baema, mwngz ndaej bang dou?”

Daxmeh de doq ndaq de mbouj roxsoq gaen dwk naeuz:“Mbouj ngeix baenzlai, miz nanz swhgeij ngvanh banhfap gaijgez, gaej bae vaeznanz vunz.”

Vangz Meijyen deng naeuz le gyaeuj ngaem yaek daengz namh.

Vunzcungnienz miz di dwgriu youh hojlienz, naeuz: “Ndaej ndaej ndaej, gou cingj sou gwn haeux caiq hai ci soengq sou baema.”

Daxmeh Vangz Meijyen vuengmuengz naeuz: “Lauxbanj mwngz gaej dingq vah lwgnyez, fangzbyaiz neix rox gijmaz daengz de, gangjriu guhcaemz loni.”

（28）

□ Moz Lijginz / 磨礼勤