Bineix ndwencieng co’ngeih, dou daengx ranz seiq boux, ranz dahnuengx bohlwg itheij hix seiq boux caez dauqma ranzdaiq, daegnuengx caeuq nuengxbawx hix daj Guengjdoeng dauqma lo. Gwn haeuxcaeuz seiz daengx ranz vunz humx youq itheij angq raixcaix, gwnz congz gijgwn baij miz nohmou、noh- gaeq、nohbya、nohcwz、gungq、sae…… Daxmeh naeuz maij gwn gijmaz cawj gijmaz, seizneix mbouj siuj gijmaz mbouj miz.

Yawj gij byaek noh gwnz congz, dou youh caez dauqngeix gij saeh “ciq haeux”. Doiq boux okseng youq 80、 90、 00 nienzdaih daeuj gangj gyoengqde wnggai dwg baenzlawz hix siengj mbouj daengz aen cih “ciq haeux” neix. Hoeng doiq boux lumj gou okseng youq 70 nienzdaih neix daeuj gangj, ciq haeux caeuq cuengq vaiz、aeu fwnz、rap raemx、saeg buh ityiengh, ciengzseiz aeu guh.

Mbanj dou dieg bingzladlad, cawzliux giz dieg gumz guh daemz ciengx bya, henz ranz guh suen ndaem byaek, giz raemx lae daengz haenx cungj aeu daeuj guh naz ndaem haeux. Yienznaeuz ndaem baenzlai haeux, danhseih bi daengz byai, boux guhnaz cungj yousim haeux gaeuq mbouj gaeuq daengx ranz vunz gwn. Bi fwn raemx cuk seiz ndaej fungsou ngamq gaeuq gwn, danghnaeuz fwn noix rumz haenq couh siuj sou ndaej haeux lo.

Ranz gou miz haj boux vunz haj aen bak, seizhaenx dou sam boux lwg caemh lij iq mbouj roxsoq, daxboh daxmeh song boux ndaem seiq haj moux nazraemx, moix bi ndaem haeuxcaeux、 miuzlaeng song geiq haeux. Danghnaeuz bineix seizcou gyau haeuxliengz le, gij lw haenx daengz bi daihngeih seizcin caeuq seizhah doxlawh seiz, gyoengqvunz ndaw cang haeux couh seuqsatsat lo, ranz gou hix ityiengh, couh daengz seiz gwn donq ra donq lo.

Daengz seizneix daxmeh couh mbouj rox baenzlawz guh lo. Daengz seizhaenx daxmeh daj ndaw gang haeux gvet ndaej saek cung haeux ndeu okdaeuj, cuengq roengz ndaw raemx bae swiq, lij yawjraen duz nonhaeux fouz youq baihgwnz. Doeklaeng daxboh cijndei bae ranz daxbuz ciq haeux. Ranz daxbuz vunz lai reihnaz caemh lai, daxboh miz caet boux beixnuengx, ndaw ranz lij dwg daxbuz geq daeuj danggya guenj ranz. Moix baez guh ndei haeuxngaiz, yaek aeu geq boux daeuj faen geij faenh, gwn liux couh mbouj miz lo, gvaq gij saedceij yienghneix caen dwg naenj naed haeux lae baenz lwed bae. Ciengzciengz bae ciq daxbuz aeu haeux, de hix mbouj haengj lo.

Bohmeh youh hawj gou bae ranznden caeuq mehsimj ciq haeux, yienznaeuz caeuq gyoengqde gangj ndei gvaq, hoeng gou lij dwg miz di najmong. Baezneix dwg bae ranzlaj caeuq mehbaj ciq haeux. De yawjraen gou dawz aen gyaenghaeux byaij daengz bakdou, couh cuengq hong ndaw fwngz roengzdaeuj, byaij haeuj ndaw ranz dajcawj, hai aen ringj henz ciengz dawz aen hamh cang haeuxgwn okdaeuj, caiq hai fa hamh gungj hwet iet fwngz roengzbae, aeu gaihaeux daek haeux. Gai ndeu miz buenq gaen yienghneix. Gou gaen youq baihlaeng mehbaj, song fwngz gaem ndaet aen gyaenghaeux, naj hoengzlwdlwd, mbouj gamj oksing, lumj guh saeh loek nei. “Gai ndeu…… song gai……” Mehbaj doq geq doq aeu gaihaeux daek haeux dauj haeuj ndaw gyaeng doiqnaj gou daeuj. Moix baez dauj haeux, lij yiengj “co” sing ndeu. “Seiq gai…… haj gai……” Ndaw gyaenghaeux doi miz baenz dingz haeux, gou hix dingj mbouj ndaej lo, lijdwg yunghrengz dingj youq. Moix baez yienghneix gou couh siujsim riri byaij ma ranz, ndaw sim angqvauvau siengj dwk haemhneix youh ndaej gwn ngaizam, danghnaeuz gwn lw, haetlaeng dou couh ndaej dawz ngaiz lw bae hagdangz dang ngaizhaet lo.

Yienghneix siengj dwk, sawqmwh lajdin baez daemjndoet, aen gyaenghaeux baez ngeng, lij ndei, cij miz di haeux saj ok rog doek youq gwnznamh. Gou cix vueng dangqmaz, yaek daej mbouj gamj daej nyaenx dwk raemxda, ndawsim youh hojsik youh lau, caegcaeg dawz ma ranz gyau hawj daxmeh.

Ciq haeux gienh saeh neix ciengzciengz geujheux youq ndaw geiqsingq gou, gou hix daj boux lwgnyez bienqbaenz boux meh、boux lauxsae ndeu. Youq duenh seizgan ngeihcib lai bi sonsaw neix, hix aenvih hagseng mbouj insik haeuxhau hozndat dangqmaz, ciengzciengz caeuq gyoengqde gangj gienh saeh ciq haeux gou caen ndang ginglig neix.

Gyoengqdou caez dinghdingh dingq daxmeh lwnh gij saeh gaxgonq, gij doxgaiq gwnz congz gwn caemh lw gig lai, lwgnyez ranz dou hix mbouj lumj dou gaxgonq baenz ngah gwn. Seizneix saedceij ngoenz beij ngoenz ndei, lwgnyez bae hag caemh miz guekgya daezhawj yingzyangjcanh mbouj aeu cienz. Hoeng gienh saeh ciq haeux neix gou lijdwg lumz mbouj bae.