“Sai hung yaek aeuyah, sau hung yaek baehaq”, vunzlai gwnzbiengz cungj maij damz coenz vah gaeuqgeq neix. Youq Bwzswz Si Denzdungh Yen, gyoengqvunz Yauzcuz cienzciep gij sibsug doxaeu cienzdoengj de, moix aen yizsiz cungj hamz miz cingzngeih, raiz ok diuz fwen minzsug minzcuz sengdoengh ndeu.

Eu Fwen Guh Yinx, Camcaen Dinghmingh

Haeuxgok henjrwgrwg, dong rim aen canghaeux. Cousou sat ndaejhoengq le, gyoengq bouxcoz Yauzcuz couh maij bae gak mbanj guhcaemz, aeu fwen guh moiz. Singfwen rwenzraeuh, lumj bouxyoux gangjvap, sei gij cingz swhgeij, caemh dwg sim caeuq sim doxbungq. Song boux de guhyoux song sam bi, eu fwen、gangjgoj、damzsim, roxyiuj bouxyoux dwg vunz gyawz. Deq sim’eiq doxdoeng, bouxsai couh soengq aengoenh、aensoij、buhvaq daengj laex dinghcingz, mbangj lij soengq ngaenz dem. Danghnaeuz dahsau sou doxgaiq angqvauvau, bouxsai couh cienmonz ra ngoenzndei, cingj bohgoux guh moiz, daiq doiq gaeq、nohmou、haeuxsan、ien、laeuj、dangzbingj caeuq baengz ndei daengj bae ranz dahsau camcaen. Ranz dahsau hix nda sam haj daiz byaeklaeuj ndei, banlaux song ranz cix gwn cix yaeng gij saeh songde. Song ranz yienznaeuz swnhleih dinghcaen lo, dahsau lij aeu youq ndaw ranz youq. Baez laeuj camcaen neix, banlaux song ranz mbat daih’it cingqsik raennaj, caemhcaiq gaujniemh gij binjgwz bouxsai.

Ciet Ndei Soengq Laex, Cingzngeih Raezrat

Dinghmingh le, song boux coz couh dingq vah bouxlaux, youq ranz bang bohmeh guhhong, mbouj caiq caezbienh okbae eu fwen. Bouxsai moix ndwen daengz ranz dahsau banghong mbat roxnaeuz song mbat, biujdaz swhgeij caensim siengj guh lwggwiz. Yiengh le bohmeh dahsau caemh swngzgei yawjyawj daegmbauq neix guhhong guhsaeh guhvunz baenzlawz yiengh. Riengz seizcin daeuj daengz, cieng coit daengz co’ngux, bouxsai caemhcaiq soengq laex hawj ranz dahsau. Doxgaiq sam rap hung, naekdumdum, couhdwg gij sim’eiq bouxsai: Rap daih’it dwg 31 gaen nohmou rangh gamou rangh ndokmou caeuq 50 gaen laeujget, rap daihngeih 21 gaen nohmou（doengh duz mou mbouj doengz）、50 gaen haeuxsan、2 diuz ien、5 gaen faenjsaeq、5 gaen dangz caeuq 5 gaen laeuj; rap daihsam hix dwg 30 gaen haeuxnaengj hoengz gaenq naengj cug (eiq naeuz gitleih), 2 duz gaeqiem, rengh bauq 1000 aen ndeu, caiq fung 200 maenz ngaenz fungbau roengz rap, hawj bohmeh dahsau gak boux 50 maenz ngaenz、bohgoux 36 maenz ngaenz fungbau. Senj bouxcoz rap laex hix gyangjgiu raixcaix, aeu boux 18、19 bi mbouj dwg lwggyax caengz baenzgya haenx, gizyawz vunz gaen daeuj haenx hix aeu dwg beixnuengx in bouxsai, gizgiz cungj yienh’ok gij sibsug Yauzcuz gig gyangjgiu.

Batcih Guh Cingq, Aenyienz Diendingh

Bi daihngeih cousou gvaq le, bohmeh bouxsai dauq genj ngoenzndei, bwh ndei doiq swx ndeu, mbiengj ndeu cang haeuxgok henjrwg, mbiengj ndeu cang haeuxsan hausak, haeuxsan aeu bae cawj, swx haeuxgok cix faen song swx iq hawj dauq dawz ma, ndaw swx fung 7.2 maenz hawj bohgoux dahsau, caiq daiq doiq gaeq dem. Hawj daegmbauq 15、16 bi hung haenx rap doxgaiq bae ranz dahsau aeu batcih. Daengz ranz dahsau, gaj duz gaeq ndeu caeq bouxsien, louz duz gaeq ndeu hawj baih bouxsai dawz dauq. Bohmeh dahsau linghvaih gaemh duz gaeq he hawj baih bouxsai, eiqsei couhdwg song duz gaeq neix “dawz batcih dahsau ma ranz”. Mwh gwnhaeux, banlaux song ranz gingqlaeuj mbouj dingz, laebdaeb yaeng gij saeh songde. Gwn ndaej maqhuz le, bohmeh bouxsai couh dwennaeuz aeu batcih, bohgoux dahsau hix dawz gij batcih vaihseng sij hwnj mbaw ceijhoengz bae, song fwngz ndenq ceijhoengz hawj baih bouxsai, deq de sou le 7.2 maenz ngaenz fungbau, aen yizsiz aeu batcih coh suenq guhbaenz.

Saeqsim Couzbi, Sim’angq Baenzgya

Baih bouxsai aeu ndaej gij batcih dahsau, couh genj ngoenzndei yaek banh hoengzsaeh. Ngoenzndei dingh le, daxboh bouxsai caensaen bae ranz dahsau bauqheij. Banlaux dahsau hix daezok guhlaeuj yaek bwh gijmaz huq、yungh geijlai ngaenz、aeu geijlai duz mounoh daengj. Baih bouxsai doengzeiq le, doq ma ranz ciu vunzlai ndaw fuengz, doxyaeng baenzlawz guhlaeuj.

Couxyah Haqsau, Vuenyungz Gvaq Ngoenz

Mwh couxyah, gyangjgiu laex. Guhlaeuj ngoenzgonq, ndaw ranz baih bouxsai nauhyied dangqmaz. Gyoengqde daj ndaw mbanj ndaw fuengz cingj canghdajcawj daeuj gaj mou gaj yiengz bwh guhlaeuj. Ngoenzlaeuj, aen doih couxyah （itbuen dwg dansoq bae, suengsoq ma）couh yaek okdou lo, ndawde miz bouxdauh、goengmoiz、yahmoiz、yahsoengq、lwgnyez caeuq cangh boq loxlez daengj. Gyoengqde gaemh duzmou cang loengz, aeu loz cang haeuxsan, aeu doengj coux laeujhaeux. Deq doxgaiq cang caez, song boux cangh boq loxlez couh angqangq yangzyangz boq loxlez daiqdaeuz bae ciep bawxmoq lo. Daengz ranz bawxmoq, song boux cangh boq loxlez haeuj dou gonq, gij vunz ram mou、dawzrap youq rog deq gwn “laeuj couxyah”. Caenh raen baih dahsau youq bakdou giz haeujok nda daiz, baihgwnz cuengq baenz vanj naed haeuxyangz (gwnzde cap sam diuz yieng)、nyez gobug caeuq sam mbaw ceijcienz. Bohgoux bouxsai、dahsau guhdaeuz guh yizsiz “laeuj couxyah”. Gwnz yizsiz, bohgoux songde gangj gij vah mizndok, mwngz coenz gou coenz, caemhcaiq beij gwnlaeuj, deq baih bouxsai dingj mbouj ndaej lo, gyau “ngaenz haisuj” hawj bohgoux dahsau, couh suenq gvaqgvan. Yiengh le sousib daizdaengq, gyoengqde cuengq bauq liux coh rap doxgaiq haeuj ranz.

Mwh okhaq, sim mbouj sij. Ngoenz guhlaeuj, ranz dahsau hek lailai, daihgya cungj daeuj gwnlaeuj, hoh dahsau okhaq. Itbuen mbouj daengz banringz, bawxmoq couh yaek riengz yahmoiz、yahsoengq okdou lo. Baih dahsau bohmeh、ausimj、beixnuengx biuj doxcaez youq daihding, nda daiz gwnhaeux. Daihgya mwngz gangj gou riu, cuknyienh dahsau haq okbae le ndwenngoenz diemzvan、ngoenz ndei gvaq ngoenz. Gwn sat, gyoengq cejbiuj、dahnuengxbiuj bae bang dahsau dajcang, boux ndeu roigyaeuj、boux ndeu daenj buh、boux ndeu geuj gunz, boux ndeu daenj mad, boux ndeu hix daenj haiz, bouxboux caemhcaiq ndaej sou aen fungbau gitleih ndeu. Seizde, boh’au、beixnuengx hix buen gyaqcang ok rog dou bae. Mbangj bohmeh daengj banlaux lij soengq vaiz、yiengz daengj buenxhaq. Cangh boq loxlez boq aen diuh “seiz okhaq daengz lo, bawxmoq aeu dajcang, daenj hwnj buh moq gyaeu, duet roengz buh gaeuq daeuj”, dahsau couh yaek hwnj yieng cojgoeng, cap yieng youq lohnga caeuq lajroq, ngeix daengz vunzcaen swhgeij, siengj daengz neix dwg baez doeklaeng de guh vunz ndaw fuengz hwnj yieng hawj cojgoeng, baezlaeng couh bienqbaenz vunz ranzgvan lo, raemxda rihnangnang. Bouxdauh hawj seiq boux yahmoiz、yahsoengq (song bouxlaux、song dahsau) gak boux fat aen liengj ndeu, riengz dwk bohgoux bawxmoq couh hawj vaihseng gangliengj. Gyoengqde homxhob bawxmoq bae ranz lwggwiz moq. Gij baengzyoux bawxmoq caemh bang rap doxgaiq bae soengq.

Mwh gwnlaeuj, hoh vuenyungz. Daengz bakdou ranz lwggwiz moq, yiet yaep ndeu, bawxmoq couh riengz lauxyah haeuj ranz, aen doih couxyah hix ram gyaqcang riengz dwk haeuj dou. Haeuj daiz, song boux moq gingqlaeuj caencik, cug boux gaisau. Gyoengqvunz couxyah caemh naengh haeuj daiz, daihgya doxcomz giz ndeu, yaengx cenj hoh doiq bouxmoq neix baenzgya, angqangq riuriu, ciengz yizsiz Yauzcuz doxaeu cienzdoengj neix couh guh sat lo.(bouxsij hawj doz)