It

Gwnzhaw vunz lai vunz daih, ci bae vunz dauq, sing gai sing cawx, sing gangj sing riu goenjoo, nauhyied dangqmaz.

Gou caeuq daeggo cingq youq aen roengqduk hung he saetdiuq guhcaemz, seiz mbouj seiz muengh coh gij vunzlai, dou song beixnuengx caengz raen gij nauhyied neix gvaq, roxnyinh gig geizheih.

Daj dou song beixnuengx mbouj caiq gyaep daxmeh gwn cij, rox gwn ndaej di souh ngaiz le, bouxcawj gou couh naemj dawz dou bae gai. Haetneix, mehyah bouxcawj naeuz:“Ciengx baenzlai meuz guhmaz, gwn lai okhaex lai, hoj gueng hoj guenj, gai bae ndaej di cienz hix baenz.”

Dingq mehyah bouxcawj baenzneix naeuz, dou song beixnuengx ndawsim gig mbouj sangj, sim naemj：Vunz sou cungj naeuz gwn meuz gwn meuz, couhdwg beijnaeuz boux vunz he gwn ngaiz gig noix, lumj duzmeuz nei gwn didi couh imq lo. Ranz neix lienz meuz cungj ciengx mbouj hwnj, yaek dawz dou bae gai, danghnaeuz caen dwg yienghneix, dou baedaengz lingh ranz, roxnaeuz lij vaiqvued ndei gvaq dem. Baez naemjdaengz caeuq daxmeh couh yienghneix biekbae, ciengxlwenx mbouj caiq raennaj, aen sim gou hojsouh dangqmaz, song da dumzswd.

Bouxcawj gou heuhguh Daeglinz, gyaranz gungzhoj, de daj iq ngoenznaengz daenj geu buh vaihvedved mbouj miz lwggaet he, byaengq aek youq ndaw mbanj youz bae youz dauq. Geu buh vaih gwnz ndang daj seizcin daenj daengz seizdoeng, youh daj seizdoeng daenj daengz seizcin, mbouj rox daenj geijlai aen seizcin seizdoeng lo, uqnyueknyuek gaenq yawj mbouj ok dabaengz, najaek caeuq song diuz genbuh wenqgywggywg, mbouj rox uet gvaq geij mugsaw caeuq raemxmyaiz.

Daeglinz donq imq donq iek, hoeng de soqlaiz mbouj caeg doxgaiq vunzwnq gvaq. Daeglinz gwndaenj mbouj ndei, diegyouq engq mbouj ndei, aen ranzvax ranz de vaihvedved, ngoenzrengx laeuh rumz, ngoenzfwn laeuh raemx, ndawranz mbouj miz saek yiengh doxgaiq. Gyoengq beixnuengx ndaw mbanj raen de hojlienz, seizhaenx daihgya cungj mbouj fouqmiz, hoeng ranz neix hawj de gwn souh ngaiz, ranz haenx hawj de saek geu buh daenj.

Daengz nienzgeij doegsaw, gyoengq nyezdoih cungj aemq daehsaw bae doegsaw lo, Daeglinz ngoenznaengz lij youq ndaw gyok cet bae cet dauq.

Boux daeuzmbanj comz vunzmbanj gvaqdaeuj, naeuz:“Daeglinz gyaranz hoj, raeuz bouxmbanj couhdwg beixnuengx couhdwg vunzcaen de, boux vunz mbouj roxsaw, couh lumj boux dafangz, yamqyamq nanz byaij, raeuz gak boux gien di cienz, hawj de bae hagdangz doegsaw ba.”

Gyoengqvunz dingq boux daeuzmbanj gangj le, cungj ngaek gyaeuj nyienh’eiq.

Daeglinz doegsaw doeg daengz cuhcungh bizyez, couh caeuq vunz guhdoih bae baihrog dajgoeng. Vah naeuz lwg bouxhoj danggya caeux, Daeglinz youq baihrog nyinhcaen dajgoeng, rox rom cienz, mbouj geijlai nanz couh caeuq dah sau ndeu doxaeu baenzgya lo.

Daeglinz baenzgya le, seng sam boux lwg, gvanbaz mbouj ndaej okbae guhhong, mbouj miz souhaeuj, ndaw ranz youh bienq gungzhoj lo, mizseiz ra gyu youz gwn cungj nanz.

Meh gou ngamq seng dou song beixnuengx, bouxcawj Daeglinz couh ciengx dou mbouj hwnj lo, couh yienghneix seizseiz naemj dawz dou bae haw gai.

Ngeih

Gou cingq naemj bouxcawj gou Daeglinz gij saeh neix, sawqmwh dingqnyi miz vunz byaij gvaqdaeuj, cam naeuz：“Gij meuzlwg neix baenzlawz gai? Duz he geijlai cienz?” Gou ngiengx gyaeuj baez yawj, raen daxheiz byoemdinj seiqcib geij bi he, cam Daeglinz cawx meuz.

“Duz he seiqcib maenz.” Daeglinz han naeuz.

“Noix di, gou aeu duz ndeu.” Daxheiz naeuz.

“Samcib maenz duz ndeu.” Daeglinz muengh coh daxheiz naeuz.

“Gij meuzlwg iqetet, mbouj rox cawx le ciengx baenz mbouj baenz, ngeihcib maenz cawx duz ndeu, ndaej mbouj?” Daxheiz gaeuzhwet roengzdaeuj, doq gangj doq yiengq ndaw roengqduk muengh dou, iet fwngz youq gwnz ndang gou lumh baez he.

“Ai, ngeihcib maenz couh ngeihcib maenz ba, danghnaeuz mbouj dwg gaenj aeu cienz yungh, gou caen sij mbouj ndaej gai gij meuzlwg neix.” Daeglinz danqheiq naeuz.

Daxheiz lwgda muengh coh gou, naeuz:“Ranz gou miz nou lai, cungj naemj daeuj haw cawx duz meuz ndeu bae coemj nou, daeuj geij haw lo, cungj mbouj raen vunz gai meuz, baezneix cungj bungzraen lo, gou aeu duz meuzlwg henj neix.”

“Meuzhenj neix coemj nou ceiq ak lo, de mbat ndeu coemj ndaej song duz noulwg gvaq ne.”Daeglinz naeuz.

Gou dingq Daeglinz baenzneix gangj, miz di hozndat youh roxnyinh miz di ndeiriu, meh gou ngamq son gou coemj nou mbouj geijlai nanz, gou ngamq coemj gvaq geij duz noucim caeuq noulwg ndwi, gou seizlawz mbat ndeu coemj ndaej song duz nou gvaq ne? Caen dwg gangjboq mbouj aeu naj, siengj ngaenz siengj fatbag lo, maz vah cungj gangj ok bak.

Caenhgonq, gou youq ndaw ranz caeuq daeggo gou guhcaemz, sawqmwh dingqnyi ndaw ranz coux haeux miz sing yiengj. Gou yaeng’yaeng byaij gvaqbae, raen duz noucim iqetet ndeu, aen bak soemsetset, cingq yaek ndonj haeuj aen daeh- naengngwz he caeg gwn haeuxgok.

Gou siengj sikhaek coemj dawz duz noucim neix, hoeng baeznduj bungz gij saeh neix, ndawsim lijdwg miz di lau, lau mbouj miz gingniemh luenh coemj, dauq deng duznou haeb, yienghneix couh saetnaj lo.

Gou gwq muengh duz noucim haenx, ndawsim gwq yaemhywx mbouj dingh. Da yawj duz noucim haenx gaenq ndonj haeuj ndaw daehnaengngwz bae lo, cij loh aen caekhaex caeuq diuz rieng youq baihrog, seizneix gou fwt geiq hwnj daxmeh son gou coemj nou seiz naeuz gvaq: “Duznou caeg gwn haeux vunz, haeb buhvaq caeuq doxgaiq vunz, bouxcawj ciengx raeuz, couhdwg coemj duzde mied duzde dairaeg bae. Coemj nou yawj yiengh lumj dwg soeng, danghnaeuz mbouj yungh sim bae coemj, dauq deng duznou haeb, yienghhaenx geijlai saet naj meuz raeuz. Raeuz coemj nou aeu riengj aeu vaiq, lwgda daengz song cik nyaujnaj couh daengz, cigsoh coemj haeuj laj hoz duznou bae, caiq roengz heuj bae haeb, yienghneix duznou couh mbouj ndaej luenh doengh lo, mbouj lau duzde dauq baenq gyaeuj haeb raeuz.”

Naemj daengz gijneix, gou mbouj caiq lawq saekdi, lumj diuz naq liz gung nei cung gvaqbae, aj hai song cik nyaujnaj, baez beng diuz rieng duz noucim okdaeuj, song cik nyaujnaj riengjret gvaek haeuj laj hoz duz noucim bae, aj bak couh haeb. Duz noucim youq ndaw bak gou cak bae cak dauq, sing swenj siliengz, bouxcawj daengx ranz vunz buet daeuj yawj. Gyoengqde raen gou baeznduj haebdawz duz noucim neix, cungj haenh gou baenz iq couh ak coemj nou, daengzcog hung le, coemj nou engq ak, dwg meuzvuengz. Daj baezneix le, gou hix coemj ndaej geij duz noulwg dem.

Gou lij naemj gij saeh neix, Daeglinz gaenq aeu aen daehsaeng hoengz daeuj, cuengq gou haeuj ndaw daeh bae, daxheiz riunyumnyum riuj gou hwnj cidienh bae ranz lo.

Sam

Youq gwnz cidienh daxheiz, gou daj ndaw daehsaeng hoengz muengh yawj baihrog, seizneix aen mbwn laepfubfub, rumz bongjhuhu, yaepyet couh doekfwn lo, ndik fwn lumj lwgbag nei doek roengzdaeuj.

Daxheiz roengz ci daeuj, daj ndaw loengx cidienh dawz buhfwn okdaeuj, hoemq youq gwnz ndang gou, de swhgeij cix mbouj miz maz hoemq ndang, nyaemh gij fwn doek youq gwnz gyaeuj gwnz ndang de.

Daeuj daengz ranz, daxheiz daengx ndang dumzswdswd, gou cix mbouj deng fwn rwed saekdi, aen sim gou fwt roxnyinh raeujrubrub, youh loq miz di mbouj onj.

“Meuzhenj lwg neix baenz iq, mbouj rox ciengx baenz mbouj?” Bouxgvan daxheiz byaij gvaqdaeuj, lumhlumh aen gyaeuj iqet gou naeuz.

“Naihsim yaeng’yaeng ciengx, haengjdingh ciengx baenz.”Daxheiz daj ndaw daehsaeng hoengz cuengq gou okdaeuj han naeuz.

Gou siujsim riri muenghyawj aen ranz daxheiz, aenranz daxheiz youh gvangq youh seuq, densi、sahfaz、binghsiengh yienghyiengh miz, yienghyiengh baij ndaej gig cingjcaez, baet ndaej gig seuqcingh.

Daxheiz umj gou haeuj aen ranz coux haeux bae. Aen ranz neix gig gvangq, baij miz haujlai aen canghaeux, cangdiet cangfaex cungj miz. Daxheiz aeu geij gep benjfaex cuengq youq gokciengz, caiq aeu fan denz iq ndeu bu youq baihgwnz, hawj gou guh diegninz. Gou ninz gwnzde roxnyinh unqnumnum, raeujrubrub, sim naemj: Daeglinz ha Daeglinz, mwngz mbouj ce gou, cungj miz dieg ce gou, ranz bouxcawj moq yawj yiengh yienznaeuz hix mbouj suenq gig fouqmiz, hoeng gyoengqde doiq gou baenzndei, gou aeu nyinhcaen bang gyoengqde coemj nou, hawj duzde dairaeg bae.

Seiq

Gou ngamq daengz aen ranz coux haeux neix, couh mup daengz gij heiq duznou. Raen gwnzdieg gizgiz miz haexnou、nyouhnou, duznou ok gij nyouh haenx nyanqgywkgywk, hawj gou yaek rueg yaek daimbaet bae.

Roxnaeuz gou iq lai, gyoengq nou mbouj cuengq haeuj sim, mizseiz mbangj duz lij damq gyaeuj okdaeuj ndomq, doiq da caeg iqetet haenx baenqlulu yawj seiqhenz, heuh gigi getget, youq ndaw ranz coux haeux aijat byaij bae byaij dauq, doxgyaep guh’angq, mbouj lau vunz saekdi.

Vunz naeuz vaizlwg ngamq doekfag mbouj lau guk, gij nou neix baenz guengz, couh suenq gou caengz miz geijlai rengz coemj, hix aeu gyaep gyoengqde deuz bae. Aen ranz coux haeux daxheiz daeb rim haujlai benjfaex, gyoengq nou caeg gwn haeux imq le, cungj ndonj haeuj ndawde bae ndoj.

Gij benjfaex cij miz di geh gaebgebgeb, gou aeu nyaujnaj soemsetset raehrumrum neix, haenqrengz gvaek haeujbae, gij nou haenx in dwk swenjgetget, hwk dwk dauqcawq sanqdeuz. Nouhung goq gyaeuj mbouj goq rieng buetdeuz lo, noulwg deng gou aeu nyauj gvaek sieng, buet mbouj doengh, gou cung gvaqbae, haeb dawz laj hoz duzde ndaetndaet bae, yienzhaeuh ngiengx gyaeuj youq gyangmbwn fid song sam hop, caiq haenqrengz boemz roengz gwnznamh bae. Yienghneix fanjfoek youh fid youh boemz, duz noulwg mbouj dai hix mbouj baenzyiengh lo.

（1）