Gou geizheih daxboh lij caengz cam gou gij daez rox sij deng mbouj deng, gij daez mbouj rox lai mbouj lai dem, dauq gangj gonq ndaekcoenz neix. Laxlawz daxboh dingq lauxsae hagdangz gangj gij daez gauhgauj bineix naek lai le, lau gou gauj mbouj ndei, roxnyinh doiq mbouj gvaq, simnyap lai, cij baez raennaj cix nai daeggou gonq. Bohmeh cungj haeuj lwg you lwg, seizneix gou hix baenz boh, engqgya roxnyinh daengz, dang boh guh meh ceiq lau lwg bonjfaenh aenvih guh mbouj baenz cix mbouj gamj guh dem, mbouj saenq ndaej guh baenz dem. Dou mbouj gouz lwg dou miz cienz miz gienz, dan muengh gyoengqde bingzan vuenyungz. Coenzvah daxboh gangj youq mwh gou gauhgauj sat neix, hamh ndaw uk gou baenzciuh. Gou rox daxboh baenzneix dwg aeu hen gou hungmaj、coi gou okrengz hix muengh gou ndaej ndei, hawj gou ciuhvunz buekrengz guh cix baenz mboujyungh lau saekyiengh.

7 nyied daej daengz ngoenz okfaen gauhgauj, gou daj ranzmbanj bae hagdangz yawj cingzcik. Mbawdan cingzcik deng daet baenz diuz baenz diuz, doengzhag ndawban boux he miz diuz he, cuengq youq ndaw funghbanhgoeng. Gou fonj bae fonj dauq cij ra raen diuz bonjfaenh, daengxheij gauj ndaej hajbak faen. Mwhhaenx boux banhcujyin lauxsae gou Dangz Yivaz hix youq ndaw funghbanhgoeng, de riunyumnyum caeuq gou naeuz:“Baema heuh daxboh bwh ndei cienz hwnjhag ba, mwngz haengjdingh gauj hwnj lo.”Binwngq gauhgauj diuzsienq cungdenj yenyau ciuaeu dwg seiq bak goujcib it faen, gij faen gou gauj ndaej（mbouj suenq ngeihcib faen ciuqgoq minzcuz vunznoix）gaenq mauhgvaq diuzsienq cungdenj lo, youq ndaw gaujseng lijgoh daengx yienh baiz daihcib, bietdingh ndaej hwnj daihhag doegsaw lo. Daxboh caeuq gou doxyaeng aeu bauq aen daihhag lawz, youq ndaw gvaengxngaeu ceiqnyienh nungzlinzsuij yenyau, gou ngaeugenj fugcoengz anbaiz. Doeklaeng ndaej Vazcungh Nungzyez Dayoz ciuaeu. Mbawsaw naeuznyi ciuaeu daengz fwngz le, goengboh haengjheiq dangqmaz, lij baij geij daiz laeuj heuh beixnuengx daeuj gwn, gwn liux riu liux，lumjnaeuz de couh sim’onj lai lo.

Ngeih

Gou mbat daihdaeuz bae gizgyae dwg bae doeg daihhag. Daj ranzmbanj Duh’anh daengz Vujhan miz cien lai goengleix, daxboh mbouj cuengqsim, aeu soengq gou bae cijndaej. Dou naengh dabah daengz Nanzningz gonq, liuxle daj Nanzningz naengh hojceh bae Vujhan. Aenvih mbouj miz cienz geijlai, dou genj naengh aen hojceh heu haemq cienh, hoeng cix haemq menh, daj Nanzningz daengz Vujhan aeu naengh ngeihcib seiq diemjcung doxbae, mizseiz lij aeu naengh samcib diemjcung cijdaengz. Bungzdaengz aen aen daihhag cungj haihag, gij daihhag gwnz Gingh Gvangj Dietloh hix lailai, biuqhojceh hoj ciengj dangqmaz, baihnaj cuenggaibiuq seizseiz cungj baizdoih raezrangrang, miz mbangj boux baiz daengz lo hoeng biuq gaenq gai liux, vunz cungj gaenjbanj lai. Gij biuqnaengh gou caeuq daxboh mbouj ndaej doxnem, gek baenz geij hoh ci. Gwnz ci vunz caenxyubyub, cungjdwg daihhagseng caeuq vunzmbanj bae dajgoeng lai. Gwnz ci giznaengh sam boux caenx naengh ndaej seiq haj boux, aennaengh song boux aeu caenx naengh sam boux. Luengqbyaij gwnz ci gizgiz miz vunz ndwn, lijmiz saek geij boux ndonj haeuj laj aennaengh bae ninz. Mbwn hwngq dangqmaz, cix mboujmiz beiznae, dan miz beizdienh iq youq gwnz dingjci baenqlele, gij rumz ci daeuj hix ndatfoedfoed, yungh gyaeujhoq ngvanh cungj rox ndaw ci miz geij gyanq lo.

Daeggou naengh hojceh mbat daihdaeuz, moengxsaengsaeng. Ndaw ci vunz baenzlai lai, gou lauyupyup, mbouj roxnaj saek boux mbouj sug saek yiengh dungxmbouq dungxcieg, naengh youq gizhaenx mbouj gamj doengh, umjdawz aendaeh coux buh gaenjdwddwd, mbouj gamj cuengq hwnj gwnz gaq bae, lau vunz roengz ci swnhfwngz lab bae. Ndaw ci oemoem hwngqhwngq, gou simfanz dangqmaz, roxnyinh lumj naengh ndaej baenz bi baenz nienz nei, yawj dwk da yaek doek cungj caengz bae daengz. Mbouj rox naengh ndaej geijlai nanz lo, sawqmwh dingqnyi goengboh hemq coh daeggou, yawj gvaqbae, de gaenq caenx daeuj daengz hoh ci neix lo. Mwhhaenx, gou sim- angq raixcaix, raen daxboh byaij daeuj gou couh ndaej miz vunz ingbaengh mbouj lau lo, doenghboux henzhamq hix ndaej rox gou mbouj gag bouxdog, sawqmwh mbeihung haujlai. Daxboh raen gou umjdawz daehbuh, siengj bang gou cuengq hwnj gwnz gaq bae, hoeng gou baenzbaenz aeu gag gaem. Seizneix naemj dauq, gij vunz henzhamq raen gou baenzneix aiq rox ndeiriu lai, hozoiq cix mbeiiq lumj laeq lwgnyez nei. Daxboh youq henz gou naengh saek yaep, couh dauqbae hohci vihnaengh de lo. Daxboh baez yamq baez yamq caenx bae, yamqyamq hoj byaij lai, hoeng raen gou naengh ndaej youq, de cix sim’onj lo. Yawj raeblaeng daxboh, ndaw sim gou lumj deng vunz baek ne.

Ci cungjsuenq hai bae daengz Camh Vujcangh. Bohlwg dou youq aen lijgvanj iq hamq camhci youq haemh he, ngoenz daihngeih cij naengh aenci hagdangz daeuj camhci ciepsoengq hagseng bae ndawhag. Daengz ndawhag, daxboh cawx ndei gak gaiq ngoenznaengz aeuyungh hawj gou, gaiqgaiq guhcaez liuxliux, de cij baema ranz. Doeklaeng de sijsaenq daeuj lwnh daeggou nyi, de ok hagdangz le sien bae camhhojceh caeuq canghbuenqbiuq gangjgyaq cawx ndei gij biuq dauqbae Nanzningz le, cij bae youzyawj Giuzhung Dahcangzgyangh、Gunghyenz Louzvangzho dem, gou caen hojsik lai caengz ndaej buenx de bae youzyawj gingjgyaeu Vujhan. Fung saenq neix gou lij yo ndei daengz seizneix, yawj gij sawcih ndaw saenq lumjnaeuz ndaej raen gij ngaeuz daxboh youq gwnz gai Vujhan youzlangh ne, raemxda doekbyoegbyoeg.

Mboengq seiq bi doeg daihhag haenx, daxboh deihdeih sij saenq hawj gou, cam gou hagsib saedceij baenzlawz yiengh la, coi gou buekrengz lai hag、hawjrengz lienhndang、gaemrox bonjsaeh. （2）

我奇怪父亲没问我发挥得怎样，考得好不好，见面就来这么一句。原来，父亲从学校的老师那里了解到今年高考题目很难，怕我考不好，心里有负担，意志消沉，所以刚见面就先予我安慰。可怜天下父母心，现在我已为人父，更深切地感受到，为父母者最担心儿女因为挫折而放弃信心，放弃生活之希望，不求儿女大富大贵，但求儿女平安幸福。父亲在我高考后对我说的这句话，我终生难忘。我知道，那是父亲对我成长的呵护、鼓励和期盼，让我丢掉沉重的铠甲征战于人生的沙场。

7月底是放榜的日子，我从老家去学校看高考成绩。成绩单被裁剪成一条条的，全班同学每人一条，放在一间办公室里。好不容易找到自己的成绩单，总分五百分。当时我的班主任唐毓华老师就在办公室，他笑眯眯地对我说：“回去叫你爸爸准备学费吧，你肯定考上了。”那年高考重点院校录取线是四百九十一分，我硬分（没加上少数民族照顾分二十分）超过了重点线，在全县理科考生中排第十名，考上大学应该没问题。父亲和我商量着填报志愿，在志愿的农林水院校一栏我勾选了服从安排。后来我被华中农业大学录取。收到录取通知书后，父亲很高兴，还请了几桌亲戚吃饭，热闹一番，仿佛他心中一块石头落地了。

二

上大学是我第一次出远门。从老家都安到武汉有一千多公里，父亲不放心，亲自送我去学校。我们先坐大巴到南宁，然后从南宁坐火车到武汉。因经济不是很宽裕，我们乘坐的是绿皮火车，票价比较低，但开得慢，从南宁至武汉一般要二十四个小时以上，有时甚至达到三十个小时。时逢各大学都在开学，京广线上的大学又特别多，火车票很难买，售票窗前总是排着长长的队伍，有的排到了却没了票，让人心急。我和父亲买的票没连在一起，隔着好几节车厢。车上的人好挤啊，多为大学生和农民工。车上三个人的座位坐了四到五人，两个人的座位坐了三人。车厢过道上也站满了人，还有少数人钻到座位底下躺着。天气很热，没有空调，只有车厢顶部小电风扇在转动，送来的风也是热的，整个车厢的味道可想而知。

我第一次乘坐火车，是没见过世面的乡下小子。车厢里那么多人，我心里有些害怕，是一种对陌生世界的恐惧，坐在位子上不敢动，怀里抱着个装衣服的袋子不松手，不敢放到行李架上，害怕别人下车时把袋子顺走。车厢里的环境很闷热，我心里很烦躁，感觉度日如年，老在想什么时候才到达目的地啊。也不知过了多久，忽然听见父亲叫我的名字，抬眼一看，父亲已经挤到我这节车厢。刹那间，我的心情变得好了起来，父亲的到来给无助的我一种依靠，让旁人知道我不是孤单一人，心中也生出了勇气。父亲见我怀里抱着行李袋，想帮我放到行李架上，但我还是坚持自己拿。现在想来，当时周边的人看着我一定觉得很好笑，也可知当年的我是多么幼稚与怯懦。父亲陪我待了一会儿，就返回他的车厢了。父亲穿梭在拥挤的车厢里，一定也很难受，但看到我平安，他也就放心了。看着父亲离去的背影，我心里有一种酸酸的感觉。

车子终于到达武昌站。我和父亲在火车站旁的一家小旅馆住了一宿，第二天才乘坐学校到车站接送学生的车子去学校。在学校里，父亲给我买了生活用品，把一切准备得好好的，他才返程。后来父亲来信告诉我，他出学校后先到火车站与票贩子讨价还价买了第二天下午回南宁的火车票，然后游览了长江大桥、黄鹤楼公园等，我为没能陪同父亲游览武汉名胜而感到遗憾。至今我还保存着父亲的这封信，读来仿佛又看到父亲孤单行走在武汉街头的身影，不禁潸然泪下。

读大学的四年里，父亲经常给我写信，了解我学习生活的情况，鼓励我刻苦学习、积极锻炼、学好本领。