Cin daengz bak va hai,

Raeuz dap daiz ciengq go,

Doengzdoih hengz saeh moq,

Angqfofo gvaq ngoenz.

Guhlaeuj laeg nyag lai,

Vaih ngaenz youh vaih haeux,

Mbouj ngah hengz saeh gaeuq,

Doxnaeuz gwn laeuj van.

Doengzdoih byaij roen moq,

Doxnaeuz hengz saeh ndei,

Guhlaeuj mbouj doxbeij,

Mbouj meiz(miz) bouxlawz lwnh.

Guhlaeuj dwg saeh’angq,

Gaej gangj aeu cienzcaiz,

Song ranz cungj simhai,

Daihlaeng cij vuenyungz.

Ngoenz angq cij guhlaeuj,

Doxnaeuz gaej guh yak,

Fung ngaenz bak song bak,

Raeuz gag rox cix baenz.

Guhdoih hengz saeh moq,

Goq aen gya raeuz ndei,

Begsaeh mbouj doxbeij,

Dauzheiq lai fouzyungh.

Boux dai mbouj ndaej dauq,

Lauq ngaenzcienz guh maz,

Mwh leix ngoenzngoenz ra,

Cij miz naj doiq vunz.

Ciuhvunz mbouj suenq raez,

Doxgyaez cij dwg bauj,

Miz gwn gingq bouxlaux,

Simhauq bouxboux haenh.

Dangjyenz daeuj daiqdaeuz,

Doxnaeuz vih beksingq,

Danhfanz ndang raeuz cingq,

Yienghyiengh cingh lumj raemx.

Ganbu daeuj daiqdaeuz,

Saeh gaeuq mbouj caiq hengz,

Daihgya guh ndaej deng,

Gwndaenj engq ndei lai.