Sinhvazse Baekging 5 nyied 3 hauh dienh Youq mwh ciet bouxcoz hajseiq daeuj daengz gaxgonq, Cunghgung Cunghyangh cungjsuhgi、Guekgya cujsiz、Cunghyangh Ginhveij cujsiz Siz Ginbingz hoiz saenq hawj daengxcungq duiyenz doihfugsaeh bouxgagnyienh baihsae dajveh coenghson soujbien Sinhgyangh Gwzswhlwzsuhgoh- wjgwzswh Swcicouh Ahduzsiz Si Hahlahcin Yangh Seyihdwz Siujyoz, cukhoh daengx guek gyoengq bouxcoz ngoenzciet angqyangz caemhcaiq gangj ok gij maqmuengh caensim.

Siz Ginbingz youq ndaw saenq naeuz, gyoengqsou hoizwngq dangj iuheuh bae daengz dieg bien’gyaiq baihsae sonsaw ganq vunz, doiq coihaeuj dangdieg gyauyuz saehnieb doxbae、coihaeuj minzcuz doxgiet baenaj、coihaeuj hwng bien fouq minz caeuq onj bien maenh bien mizyungh guenjyungh, bonjfaenh hix ndaej lienh caeuq majhung.

Siz Ginbingz daegbied gangj daengz, doengh gij bi neix, yied daeuj yied lai bouxcoz senjleh daengz baihsae、daengz lajmbanj、daengz gihcwngz gagnyienh fugsaeh, gamsim guh ok goengrengz, langhbaij gij yienghsiengq cingsaenz gaenx guh doxhwnj bouxcoz Cungguek seizdaih moq caeuq gij dangrap guek ak miz gou. Maqmuengh gyoengq bouxcoz dingjmaenh lijsiengj saenqniemh, lai ung gij cingz gya guek, lienh ndaej bonjsaeh akgeng, fatyiengz cingsaenz buekguh, daengz dieg guekcoj caeuq bouxminz ceiq aeuyungh bae guh, ok rengz bouxcoz hawj hwnqguh yendaiva yiengh Cungguek.

Seyihdwz Siujyoz dwg aen siujyoz cunhgiz liz bien’gyaiq 47 goengleix、cujyau dwg hagseng Goh- wjgwzswhcuz gapbaenz ndeu, 2022 nienz 8 nyied baenz aen hagdangz sawqdiemj Gwzcouh aen nduj baihsae dajveh bouxgagnyienh coenghson bau hagdangz. Mboengqneix, duiyenz doihfugsaeh bouxgagnyienh baihsae dajveh coenghson soujbien Seyihdwz Siujyoz raiz saenq hawj Siz cungjsuhgi, bauqlwnh soujbien coenghson guh ndaej baenzlawz yiengh caeuq miz maz ngeixnaemj, gangjnaeuz yaek laemxsim caprag baihsae、fugsaeh bien’gyaiq.