Gingqdaeuz It: Haenzdah Donhgwnz

Seizhah, ndithaemh ingj henz dah baenz saekgim, gwnz raemx migmyanz lwenqda, diuz roen haenzdah, vunz yied daeuj yied lai, gizneix、cawzneix dwg dieg ceiq ndei、cawz ceiq ndei gyoengqvunz youzbyaij、 lienhndang、 guh’angq haenx.

“Duz maningq ndeu doek dah!” Miz vunz hemq.

Daihgya swnh sing hemq yawj bae. Gyangdah liz haenzdah aiq miz cibhaj mij haenx, caen miz duz ma ndeu youq de yiengq haenzdah youz daeuj, seiq ga haenqrengz vad raemx, gaenq coh haenzdah youz ndaej haj roek mij lo, aiq dwg baeg lai, de daengx yaep ndeu, baez daengx couh ngaiz raemx dah dongj bae gyangdah giz engq gyae, de youh haenqrengz youz baez moq, yienghneix geij baez baedauq, caem fouz geij baez, lau de nanz ndaej gag gouq lo.

“Okrengz, maningq!”

“Gwnz haenz miz ndok gwn, okrengz youz!”

“Okrengz baez dem, mbatneix haengjdingh daengz haenz!

Gyoengqvunz cungj vih maningq simgaenj, foenxfoenx comz gvaqdaeuj coh de hemq vah, hawj de demrengz.

Maningq youh haenqrengz vad raemx geij baez, hoeng mbouj miz yungh, de saedcaih baeg lai, “vang vang” sing daemq raeuq dwk, sing neix wnggai dwg heuh gouqmingh, ronghda gouzgouq hawj vunz simcieg.

“Budung”， miz vunz saet roengz dah bae, naeuz raeuz fwngz nengh fwngz bae gouq duzma ba!

“Budung, budung……” boux riengz boux saet roengz raemx bae, cibbet boux fwngz langh fwngz fouz gwnz raemx, song ga cengj raemx mbouj dingz, lingh gyoengqvunz gwnz haenz gaem maenh boux nduj ndaw raemx, “saeudaeuz” gaem maenh le, daengx duivuj couh onjmaenh lo.

Duzma raen yienghneix, angq lo, youh haenqrengz youz baez moq, coh “diuz cag gouq- mingh” youz daeuj, dauqdaej ndaej gouq lo, gyoengqvunz gwnz haenz angq hemq hwnjdaeuj.

Maningq ndang miz di saenz, aiq dwg lau dwk mbei yaek dek ba.

“Ndei lo, mwngz ancienz lo, fouz saeh lo!” Miz vunz aeu gaen uet gij raemx gwnz ndang duzma bae caemh nai naeuz.

Duzma dwg madoj bingzciengz ndwi， hoeng gyoengqvunz cungj vih de ndaej gouq sim’angq. Duzma yawj dah mbat ndeu, youh yawjyawj gyoengqvunz humx de haenx, baet rieng mbouj dingz, menhmenh biek bae, yamqdin ndeu nyeux gyaeuj dauq sam baez, yawj vunzlai, ronghda unqswnh, hawj vunz roxnyinh caenmaed, nyeux gyaeuj dauq geij baez le, de buetyedyed bae lo.

Vunzlai hix sanq bae lo, gak boux gag lienhndang、guh’angq, haenzdah youh caem roengz- daeuj lo……

Gingqdaeuz Ngeih: Haenzdah Donhlaj

“Meh, mwngz yawj, boux haenx youzraemx lumj duzma vat namh nei, haha!” Laeqnyez aiq miz haj roek bi he daihsing hemqnaeuz.

Daxmeh riengz ronghda daeglwg yawj bae, gyangdah caen miz bouxsai ndeu, cij raen donh mbaq dauq gwnz, gizde liz haenzdah aiq miz 30 mij gyae, song gen de luenh vat, yiengh de lumj youzraemx youh lumj cakdai.

“Daihgya daeuj yawj, bouxde dauqdaej dwg youzraemx roxnaeuz cakdai?” Daxmeh haenx sing hung simgaenj dwk hemq, yinx daeuj haujlai vunz.

“Youzraemx ba, mboujcix baenzlawz ndaej bae daengz gyangdah ni?”

“Yi, cungj yienghceij youzraemx neix caen miz di gvaiq!”

“Neix dwg angj gij gisuz youzraemx de.”

Bouxngonz yied daeuj yied lai, lwnhyaeng’yaeng.

“Yi! Lumjnaeuz dwg cwngzgvanj Lauxk nei. Deng, caen dwg de dahraix!” Bouxngonz ndeu nyinh ok boux gyangdah.

“Caen dwg bouxcwngzgvanj?”

“Dwg caen.” Boux haenx haengjdingh dwk naeuz, lij yiengq gyangdah hemq: “Lauxk, mwngz baenzlawz la?”

Boux gyangdah mbouj dap, roxnaeuz dap lo, mboujgvaq sing daemq lai, dingq mbouj ndaejnyi. Seizneix, ndaw raemx cij raen aen hoz caeuq aen gyaeuj de lo, song fwngz luenh vad, aen gyaeuj bibuengq de seiz caem seiz fouz, gannanz cukcak.

“Mbouj doiqdaeuz！Lauheiq yaek miz maz loeklak, vaiq di gouq vunz!” Bouxsugnaj hemq.

“Hw hw, bouxcwngzgvanj!”

“Ndaw dah dwg mbouj dwg miz vunz baij dan, de roengz bae sou ngaenz?”

“Yawj, dah mbiengjde miz vunz epbya, boux- cwngzgvanj neix aiq dwg yaek bae cazyawj de miz mbouj miz cingq, fouz cingq ngaiz fadcienz bw.”

“Raeuz vaiq di fwngz langh fwngz bae gouq vunz!” Bouxsugnaj youh simgaenj dwk hemq.

“Mbouj miz cingq, bae gouq vunz, dwg mbouj dwg habfap? Lau ngaiz fadcienz nw!”

Bouxngonz yied daeuj yied lai, hix miz gij vunz daxbaenh gouq duzma haenx.

“Daxbaenh miz baenzlai vunz roengz dah bae gouq duzma, seizneix vihmaz mbouj miz vunz roengz dah bae gouq vunz ni?” Laeqnyez haenx ngiengx gyaeuj yawj daxmeh cam.

Daxmeh seizndeu mbouj rox gangj maz ndei, saeknaj yakfaz dwk yawj gyoengqvunz seiqhenz.

“Duzma caeuq vunz miz gamjcingz ne!” Boux- ngonz ndeu naeuz.

“Daxau ndaw dah dwg youzraemx ndwi, gaej you de.” Daxmeh haenx gangj sat couh daiq laeqnyez liz gyae lo.

Bouxsugnaj heuh gouq vunz haenx, yawj seiqhenz mbouj raen byawz ning, swhgeij youh mbouj rox youzraemx, couhcinj rox youzraemx, boux dog bae gouq, fungyiemj hung lai, liux le de heuh 110.

Seizneix, aen gyaeuj gyangdah caem le fouz, fouz le caem, youq de cakdai.

“Lauxk, dingjyouq, 110 yaek daengz lo, dingjyouq!” Bouxsugnaj haenx yiengq aen gyaeuj gyangdah hemq.

Minzgingj daengz seiz, aen gyaeuj gyangdah cij lw nyaeb byoem ndeu fouz gwnz raemx, najraemx gizde seiz mbouj seiz mauh bop.

Minzgingj dauqdaej vax boux caemraemx haenx hwnjdaeuj lo. De rueg geij amq raemx, doq rueg doq saekndaek……

“Lauxk, mwngz mbouj dwg rox youzraemx ma?” Bouxsugnaj cam.

“Gen ga hwnjgeuq, dwglau lai lo!” Lauxk miz heiq mbouj miz rengz naeuz.

Vunzlai comz daeuj yawj, “caen dwg Lauxk, bouxcwngzgvanj bingzseiz moegdoeg caepfap haenx.” Miz vunz naeuz. Daihgya baez dingq, huzhaz sanq bae liux, mbouj nyienh lai rah saek da, lumjbaenz lai rah da ndeu couh ngaiz fadcienz nei.

Lauxk raen yienghneix, ndawsim maz feih cungj miz.

Diuz roen haenzdah gig vaiq youh lumj yienghgaeuq nei caem roengzdaeuj lo……

Gingqdaeuz Sam: Gwnz Gai

“Vaiq di buet, bouxcwngzgvanj daengz lo.” Miz vunz hemq.

Gij dan gaicawx song mbiengj roen haenx, lumj bang roeg ngaiz hwk nei baez yaep da buet liux, din fwngz gyoengqde riengjret. Gij dan neix cungj dwg danriuzdoengh, gai liengzcaz、mienhdiuz、sawz、mak daengj, dingzlai dwg gai byaek. Miz daxbuz aiq miz caetcib bi he, gij nyaeuq gwnz naj de lailai, naj co fwngz co. Saenj hanz vang gwnz namh guh daengq, de naengh gwnzde, song gyaeujhoq doxdeq, song fwngz seiz mbouj seiz nyaenjnap gyaeujhoq. Bangx din de miz song loz byaek, loz ndeu dwg byaekdoengzhau, lingh loz dwg byaekhing. Mwh vunzlai buetdeuz seiz, de hix ndwn hwnq, hoeng din fwngz mbouj riengj, saenj hanz ngamq con gvaq cag loz, caengz hwnj mbaq couh ngaiz bouxcwngzgvanj gaemhdawz lo.

“Youh dwg ndaek vunz neix, yaep dem aen caengh gou youh ngaiz de euj raek bw.” Daxbuz ndawsim swenjdai, de cuengq saenj hanz, diem dazcaengh haeuj ndaw byaek bae le, song fwngz gaem maenh aen caengh, yo dauq baihlaeng, yungh aen ndang byomnyieg de daeuj baujhoh aen caengh, song da dinghdingh yawj bouxcwngzgvanj mbouj oksing.

“Daxbuz, henz roen mbouj hawj baij dan.” Lauxk naeuz.

“Dou mbouj ciemq roen, dou youq baihgwnz bien roen.”

“Yingjyangj yienghsiengq ndawsingz.”

“Fuengbienh boux cawx byaek ne. Mwngz yawj, mboujguenj dwg song loek roxnaeuz seiq loek, mbouj yungh roengz ci, de ndenq ngaenz, gou ndenq byaek, faencung ndeu gaicawx, fuengbienh dangqmaz.”

“Yienghneix rox saek ci, mbouj ancienz.”

“Faen song faencung gaicawx, mbouj ngaih gyaudoeng ne.”

“Bae giz gveihva gai ba.”

“Gizhaenx rimrad, caenj mbouj haeujbae lo.”

“Fanjcingq gizneix mbouj hawj baij dan, cingj mwngz boiqhab gij hong dou.”

“Ndaej ba, gou bae.” Gencueg niuj mbouj gvaq gabi, caiq gaemh youq, lau loz byaek deng dik boek roxnaeuz aen caengh deng euj raek bw, daxbuz lauxsaed nda rap deuz lo.

“Gvih gwnz gai gai di byaekheu lij ngaiz cwngzgvanj gyaep, mingh haemz ha!” Daxbuz doq bae doq damz, “geizheih lai lo, ngoenzneix ndaek vunz neix gangj vah unq nw, mbouj lumj bingzciengz yienghhaenx manz lo!”