第十二期

原文: 天雷滚滚我好怕怕，劈得我浑身掉渣渣。突破天劫我笑哈哈，逆天改命我吹喇叭。嘀嗒嘀嗒嘀嘀嗒。 ——电影《哪吒之魔童闹海》

译文：

1

Byajraez maenjngaungau,

Dwglau ndi miz beij.

Haep ndaej gou saenz saeq,

Aenndang saenzboubou.

Re ndaej gvaq diencai,

Simhai riuhaha.

Nyig mbwn gaij mingh la,

Boq lahbah baenzngoenz.

（来宾市兴宾区：潘玉珍/Banh Yicinh ）

2

Byajraez rumrum gou lau dangqmaz,

Doxgaiq gwnz ndang gou loenqsasa.

Ndoj gvaq byajben gou riuhaha,

Angqhoh lix mingh gou boq laxda.

Didda didda diddid da.

（平果市：余执/Yiz Ciz）

3

Byajraez rumrum gou lau raixcaix, bag

dwk ndang gou naeng doekbyoegbyoeg.

Dwkbyoengq mbwngoeb gou riuhaha, mbouj dingq mehmbwn gou boq hozlez.

Dibap dibap didi bap.

（平果市：Dwngz Dwngz/滕腾）

4

Byaj rongx maenjfoed gou gig lau,

Luemz daengz ndang gou moekmoenq goemq.

Cungbyoengq mbwn giep gou riu haenq,

Nyig lawh minghhoen gou boq hauh.

Dida dida didi da.

（凤山县：韦竞富/Veiz Gingfu）

5

Byajraez humhum gou lau dai bae,

Bag gou daengx ndang soiq baenz naez.

Buekmingh deuz nanh gou riuhaha,

Mingh mbouj hab dai gou boq lahbah，

Dida dida didi da.

（南宁市西乡塘区：覃媛/Cinz Yenz）

6

Gwnz mbwn byajraez humhum gou lau mbouj ndaej mbouj ndeq,

Bag ndaej gou daengx ndang loenqrere.

Gyongz byoengq mbwnloiz gou riuhaha,

Nyig mbwn gaij mingh gou boq hozlez.

Liled liled lili led.

（平果市：廖玉洁/Liu Yigez）

7

Byajraez gongon gou lau dangqmaz,

Byajcek daengx ndang gou doek nyapnyaj.

Cungbyoengq diencai gou riuhaha,

Fanj mbwn gaij mingh gou boq lahbah.

Dida dida didi da.

（南宁市武鸣区：黄蓉蓉/Vangz Yungzyungz）

8

Byajraez rumrum lau gijmaz,

Bag gou naenggaeq hwnjsasa,

Cungbyoengq mbwn fad gou riuha,

Nyig mbwn gaij mingh boq lahbah,

Dida dida didi da.

（南宁市武鸣区：潘雪平/Banh Sezbingz）

9

Gwnz mbwn byajraez sim mbei dek,

Laeblingh cek gou naeng ndok siu.

Cungbyoengq hojcawq coh mbwn riu,

Ciuh gou gaijbienq boq lax yiengj.

Dida ciengq fwen hoh gejduet.

（德保县：黄赛利/Vangz Saili）

10

Byajraez byajmig maenjrumrum，

Lumj dienh cot vunz naenggyaeuj bok.

Baihdoiq diencai riugokgok,

Mbouj dai dauq ak mboknaeuz coi.

Didat didat didi dat.

(平果市：黄秀碧/Vangz Siubiz)

11

Byajraez rumrum mbwn yaek doemq lo, fwj roemj roengzdaeuj, mbwn fan mbwn laep rumzgeujgaeq miz di dwglau. Byaj cek roengzdaeuj bag deng aenndang gou gauz liux lo, sauz gou cienz ndang ndaem baenz mij, gyaep ha、 naeng ha、 noh ha loenqbyoegbyoeg. Hoeng gou damjlaux, mbouj lau gveijgvaiq lanzloh, doeksat ndaej cungbyoengq okdaeuj, gou angq daengz diuq hwnjdaeuj riuhaha naeuz:“Gawqyienz mbwn mbai mbouj bingz, gou bienh caeuq mbwn doxbuek, nyig mbwn dauqnyangz, gaijbienq minghhoen, gou guh ndaej baenz lo.” Mwhhaenx gou boq aen hozlez goksasa. Dida dida didi da.

（平果市：黄武丹/Vangz Vujdanh）

(4)