“Hai, caih de lo, duzvaiz mbouj gwn raemx, gaemh gyaeuj hix mbouj roengz ha!”

“Miz mbangj lwgnyez couh aeu vunz daz aeu vunz coi cij baenz, lumj Mingzfeih lwg neix bonjlaiz couh gvai, mbouj coi de hag ndaej ndei caen hojsik.” Gou naeuz.

“Gou rox sou dwg vih Mingzfeih ndei, siengj hawj de gauj ndaej okbae, mbouj deng guh reihnaz. Hoeng dou mbouj gamj siengj daiq lai, caenh siengj an’an onjonj gvaq saedceij.”

Raen boh Lij Mingzfeih “maenzswnx nyaemh aeuq、mbouj haeuj gyulauz”, Siz yaucangj hixnaengz gangj bieng bae：“Aen biengz raeuz yienghneix hwngfat roengzbae, daengzcog boux mbouj miz dungxcaiz couh mbouj rox guh saek gaiq, daengz seiz youh guhlawz gvaq ndaej an’onj?”

Boh Lij Mingzfeih mbon bau ien ndeu okdaeuj boux ci boux ci baenfat gvaqdaeuj hawj dou le, de caemh gag diemj feiz cit gaemz ndeu, hoenzien hau daj conghndaeng conghbak conh okdaeuj goenjgoenj geujgeuj, cw bae baenz mbiengj naj. De menhmenh gejnaeuz：“Sou cungj dingqnaeuz gvaq Lij Cwngzyenj ba? De dwg goeng’au iq gou. Daxgoeng gou sam beixnuengx, goeng gou、goengngeih gou cungj gyaeu baenz caet betcib cij bae, lwglan lwglaenj baenz gyoengq. Lij Cwngzyenj ne, dai vih ndaej doegsaw daiq lai, ngaiz fangzsaw nyuk bae camgya ‘luenhdangj’, caengz aeu yah couh deng guenfouj dawz bae raemj gyaeuj. Hawj vunz guh fwen gae naeuz：‘Cwngzyenj dai caeux, aen gyaeuj deng doek bae, rox saw miz maz ndei, yiengfeiz ndi vunz ciep’.”

Dingq daengz gij neix, Cangh Binh mbouj angq lo：“Daiq gvaqbouh lo, goeng Lij Cwngzyenj seizgonq vih gij saehnieb gwzming vutmingh, doiq guekgya miz goenglauz, baenzlawz ndaej yienghneix bae riu de、 yawjcuij de?”

Boh Lij Mingzfeih youh cit gaemz ien ndeu, hoenzien youh goenjgoenj geujgeuj sanq okdaeuj, de lumj boux gangj saw nei laebdaeb gangj roengzbae：“Mbouj dwg gag goeng’au iq gou roeb cungj boihseiz neix. Nungz Cisiengz baihhaenx youq mwh Minzgoz bing vueng max luenh okrog bae doegsaw le fouq ndok couh mbouj rox deng vit youq gizlawz lo. Lij miz Veiz Yaucungh aen sigij gonq betcib nienzdaih gauhcungh bizyez bae dangbing, hix doek raemx dai. Miz goeng deihleix sienseng ndeu yawj ndaej ok, naeuz dieg Mbanjmoeghim dou bauj boux lauxsaed guh vunz、gwn boux dungx miz sawmaeg……”

Cangh Binh naengh mbouj onj lo, de naeuz：“Gij haenx dwg vah luk vunz, sou baenzlawz bae saenq de?”

“De mbouj heuh raeuz saenq, hoeng saedsaeh baij youq dangqnaj ha!”

Seizneix, gou roxnyinh dou geij boux caen dwg “caengz baenz lungz baenz baj、 gangj vah mbouj miz yw” ha. Ndaw ranz neix aenvih mbwn hoiznamz, cien deihbanj mbaeqsubsub, mbouj ndeiyouq saek di.

Haj

Cungqgyang aen mbanj, golaehcei laux ndeu daengj youq gwnz hamq daemz, lumj aen liengj hung cw raemh benq dieg ndeu. Gwnzgo gaenq ok nyodva, baenz di baenz di iet ok byai’nge, nengzgengz douh rim bae, danghnaeuz mbouj miz vunz daeuj cot yw bauj va, yienghneix roengzbae lauheiq daengz seiz cungj mbouj ndaej gwn saek aen. Aen ranz sam fungh song caengz laeuz ndeu gag soengz youq baihhenz fwzliklik. Neix dwg aen ranz haihoih yaeng saeh daengx mbanj, baeznaengz doihguhhong baihgwnz roengz mbanj daeuj couh dwg youq gizneix coh vunzlai cienz cwngcwz “lajmbanj saenqhwng”, hix dwg youq gizneix fatdoengh caezgya doxcaeuq haenqguh dajcauh mbanjranz.

Goeng daeuzmbanj gwn gvaq song cenj laeuj, gij yiengh de yaek maeuz yaek fiz, simcingz haengjheiq, coenzvah daegbied lai. De naeuz：“Gizneix yienzlaiz dwg aen ranzhag ndaw mbanj, doenghbaez mbanjmbanj cungj gag miz hagdangz, gij lauxsae gunghban mbouj gaeuq yungh, couh anbaiz lauxsae minzban bae son. Caenhguenj vunz Mbanjmoeghim mbouj maij soengq lwgnyez doegsaw, hoeng baihgwnz ciuqyiengh daeuj banh aen diemjsonhag ndeu. Ngamq gaenh ngeihcib bi neix cij cietsiu gij diemjsonhag lajmbanj, gyaebcomz gyoengq lwgnyez bae hagdangz gwnzhaw doegsaw, aen ranzhag neix couh bienqbaenz aen ranz haihoih ndaw mbanj lo.”

Raq rumz ndeu ci gvaqdaeuj, golaehcei laux byai faex ngauznyetnyet, geij go moeggva deng mwi dwk gvaq mbaw loenq ndoqndangndang, lumj geij diuz dienhganj nei dinghdingh baek youq fag dwngjdaemz haenx, mbouj ning mbouj doengh, caengz raen dauq did nyod moq, cix mbouj rox dai roxnaeuz lix.

“Rox saw ndi mingh souh, beg daeuj daengz yiengzgan, caengz aeu yah baenz ranz, lumj gorangz daigoenq.”

“Dungxsaej miz sawmaeg, Moeghim yungz mbouj roengz, bouxguhnaz noek boengz, ndaej baenz goeng baenz coj.”

“Lauxsaed guh naz gwn, gaej loqhwnz luenh ngvanh, doegsaw mbouj miz caenh, rox deng nanh deng dai.”

Geij naih buzlaux gwn raeng le mbouj miz giz siu, doxcomz naengh youq luengqhongh guh fwen gangj saenzsied, bak dinj linx raez, sing fwen coeg haeuj gyaeuj haeuj rwz.

Dou caen yawj mbouj roengzbae lo, mwh daj Mbanjmoeghim dauqma, lij mwngz coenz gou coenz damzlwnh.

“Geij naih haenx caen boihseiz, cungj mbouj rox di fwen lawz hab eu di lawz mbouj hab eu.”

“Danghnaeuz ndaej fung bak gyoengqde bae couh ndei lo.”

“Deng, aeu naemj banhfap fung bak gyoengqde bae!” Cangh Binh sawqmwh gangj coenz ndeu.

Haeuj hwnz, ronghndwen goz lumj diuz heujmou nei venj youq gyangmbwn, lengq aen lengq aen ndaundeiq ronghmyanmyan, byai faexgoen swnh rumzhaemh yauzyedyed, doengxhaemh lajmbanj lij loq miz di nit. Gou youq gwnz mbonq fonj bae fonj dauq cungj ninz mbouj ndaek.

Roek

Seizgan dangq raemx lae, ciet bae ciet youh daeuj, ndwenngeih lungz daiz gyaeuj, vunzlai coux fuk ma.

Baez baenqlet, ngeih nyied co’ngeih youh daengz lo. Dingjlingz dwg singhgiz roek, Cangh Binh iu gou caeuq Siz yaucangj dauqbae cunz Mbanjmoeghim, bae yawj aen Ranz Lizsij Mbanjmoeghim de, swnhbienh camgya guh six gouznyienh.

Daeuj daengz Mbanjmoeghim, aen miuhdojdeih hoenzien hoenzcoemcoem, goenjngaungau, benq dieggvangq naj miuhdojdeih vunz lai vunz daih, dauqcawq venj miz geizcaij、daeng’va, geij boux goengdauh youq gizde dawz giemq doq hemq doq foux guhfap foux hwnj foux roengz, mbangj vunz foux lungz foux saeceij, hix miz mbangj vunz gaj bit gaj gaeq guh dajcawj, engqlai vunz ndwn dingh yawj nauhyied.

Cangh Binh cigciep daiq dou bae yawj aen Ranz Lizsij Mbanjmoeghim. Aen Ranz Lizsij Mbanjmoeghim youq ndaw ranz gaeuq Lij Cwngzyenj sienseng ngamq haiguh, baihndaw geij faq ciengz guh baenz geij aen cienlanz ciengzbauq hung, saw doz caez gyaeu, ciengzsaeq gaisau gij yinzvwnz lizsij、doenghbaez baenzlawz swnghhoz, yungh bienfuk raezrangrang gejgangj caeuq danqhaenh ligdaih boux maenh’ak boux yinghyungz ndaw mbanj, lumj boux camgya Sinhhai Gwzming Lij Cwngzyenj、boux maenh’ak dingjhoenx Yizbwnj Nungz Cisiengz、boux yinghyungz dingj raemxrongz gouqcai Veiz Yaucungh daengj doengh boux neix. Lingh fungh ranz baij miz muhrin、aendoiq、congzrok、gonghgen、buhluiq daengj doenghgij doxgaiq roxnaeuz hongdawz guh gwn ciuhgonq……

Yawj le Ranz Lizsij Mbanjmoeghim, Cangh Binh couh daiq dou bae yawj aen daizheiq vwnzva cunghsinh, aen de couh guh youq doiqnaj ranz haihoih. Geij boux mehmbwk youq gwnz daizheiq eu fwen angqvauvau, Cangh Binh naeuz ndaw mbanj ngamq laebbaenz aen doih eu fwen neix, gij saw fwen de dingzlai dwg boux doihguhhong roengz mbanj raiz, hix miz dingz dwg boux ndaw doih eu fwen gag guh, boux doihguhhong fucwz dazyinx gyoengqde guh gij fwen miz rengzcingq. Mwngz yawj, gyoengqde eu naeuz：

Doegsaw rox baenz ndei,

Bouxmaenh bae yiengjfuk,

Lwg mbouj ngawz mbouj huk,

Gaej fug cimh laeng vunz.

Dajndaem caen sinhoj,

Dajciengx goj dwgrengz,

Lai doegsaw cij deng,

Mengzsaw cix vijsij.

Din ndaej byaij cien leix,

Dungx ndaej coq fanh saw,

Boux bae hag ndaej dawz,

Ndaej rox saw baenz ak.

Boux roengzrengz doegsaw,

Rox gvai ndaw gvai rog,

Aen mbanj raeuz daengzcog,

Rox ok fungh ok lungz……

Dou dauq byaij daengz miuhdojdeih, seizneix gyoengqvunz cingq boux daengz boux dawz ceijfouz nding ndeu nem hwnj bangx goreiz gouznyienh. Seizneix gou yawjraen Lij Mingzfeih caemh ndwn youq laj goreiz laep da doengh bak nambedbed, yiengh gig caensim.

Lij Mingzfeih gouznyienh sat le okdaeuj yawj raen gou, naeuz：“Lauxsae, Mwngz caemh bae gouznyienh ba! Gou gouz lo, gou gouznyienh aen yozgiz baihlaj hagsib cingzcik ndaej baenz ndei, daengzcog gauj ndaej cungdenj dayoz!”

“Haeuj mbanj baiq dojdeih”, dou geij boux caemh coh goengdauh lingx aeu gep ceijfouz ndeu haeujbae gouznyienh！（2 sat）